بقلم كابتن / هديل رسلان
مقال طويل شويه لانه مهم لللي مهتم برياضة القوس والسهم للمكفوفين .
بما إن في ناس معندهاش معلومات عن رياضة القوس والسهم للمكفوفين فحبيت اوضح لحضراتكم كام نقطة تفيدكم
*رياضة القوس والسهم للمكفوفين فيها اختلاف بسيط (ولكن مهم فهم الاختلاف كويس جدا) عن رياضة القوس والسهم للمبصرين من ناحيه:-
١) في رياضة القوس والسهم للمبصرين اللاعب بيستخدم حاجه اسمها (Site) والسايت دا أداه بتساعد اللاعب علي تحديد وإصابه الهدف في Target Face.
و(Site) بيكون فيه نقطه صغيره خالص اسمها سن الpin اللاعب بيستخدم عينه اليمين أو الشمال ودا بيكون علي حسب الاختبار اللي بيتعمل لللاعب علشان يتحدد أي عين هي الاقوي علشان يشوف بعينه من النقطه (سن الPin) ويحدد هدفه في Target Face ويصيبه .
Target Face:-
هو عباره عن ورقه قويه مرسوم بداخلها ١٠ دوائر تبدأ باللون الابيض ثم اللون الاسود ثم اللون الازرق ثم اللون الأحمر وتنتهي باللون الاصفر ويسمي الجولد.
*بالنسبه لللاعب الكفيف في البدايه مينفعش نفرض عليه يمسك أي قوس وخلاص لازم نعرف انهي أيد أقوي عنده وبناءا علي دا هنحدد هل اللاعب هيستخدم أيده الشمال ولا اليمين، وبعد كدا هنبدأ نشتغل علي الجزء دا.
*طيب دلوقتي اللاعب الكفيف إزاي هيحدد نقطه التنشين بتاعته؟
عن طريق حاسه اللمس.
وذي ما وضحنا سابقا إن اللاعب المبصر بيستخدم (Site) واللاعب الكفيف بيستخدم (Site) بردوا بس الفرق إن اللاعب المبصر بيستخدم نظره واللاعب الكفيف بيستخدم حاسه اللمس.
وطبعا علشان تعرف وتشوف الكلام دا يفضل أنه يكون عملي لأن الفهم مش هينفع يكون معتمد علي الشرح النظري فقط.
٢) *لاعب القوس والسهم المبصر بيعرف يحدد وقفته بسهوله في كل مره بيروح يجيب الأسهم ويرجع تاني عادي.
*لاعب القوس والسهم الكفيف بيعرف يحدد وقفته بس مش بيعرف يثبتها في كل مره بيروح يجيب فيها الاسهم علشان كدا أحنا بنحتاج (محدد) ودي أداه من خلالها بنقدر نحدد وقفه اللاعب عليه علشان يبقي سهل أنه يعرف يقف الوقفه بتاعه صح ذي كل مره من غير لخبطه.
*هل اللاعب الكفيف لازم يروح يجيب أسهمه بنفسه ؟
مفيش مشكله إن اللاعب يروح مع المدرب ويجيب الاسهم بتاعته وقت التدريبات ولكن في البطولات المدرب هو اللي بيروح يجيب الأسهم لللاعب.
٣) النقطة دي مهمه جدااا وياريت تركزوا فيها كويس
رياضة القوس والسهم رياضة فردية وليست جماعية بمعني انت كا نادي لما يكون عند لاعب أو ٢ أو ٣ مثلا وبينزلوا بطولات و يحققوا مراكز متفوقة علي الانديه الأخري دا بيكون أفضل بكتير من نادي عنده عدد كبير من اللاعبيه وبينزلوا بطولات ومحدش يحقق أي نجاح.
علشان كدا انت كمدرب حاول حاول تشتغل علي اللاعب نفسه لأن كل لاعب ليه تكنيك خاص بيه مهم جدا انك كمدرب تبقي عارف السيستم بتاع اللاعب اللي معاك ولازم اللاعب يكون ليه استجابه وقتيه لتعديلاتك ودا بيحصل عن طريق تكثيف التدريب لللاعب وثقه اللاعب فيك.
*هل ينفع إن اللاعب الكفيف يكون ليه أكتر من مدرب؟
مش محبب، وخلينا متفقين أن كثره التوجيهات للاعب من اكتر من مدرب وخصوصا في بدايه تدريب وتأسيس اللاعب دا هيعمل تشتت في افكار اللاعب.
فمثلا اللاعب المبصر في بدايه تدريباته بيحتاج مدرب معاه لحد ما يتأسس صح ووقتها اللاعب هيوصل في مرحله معينه هيكون فيها مرايا لنفسه وطبعا مش هيبقي ناسي تعليمات وتدريبات مدربه ليه وممكن اللاعب يقرر يسيب مدربه ويحترف الرياضة دي في بلد تانيه ذي محمد صلاح كدا لما نجح ولقي نفسي بره.
لكن تعالي بقي اقولك علي حاجه بالنسبه لللاعب الكفيف ودي نقطه مهمه جدااا معظم المدربين للاسف مش واخدين بالهم منها لكن المدربين برا مصر بيعملوا بالنقطه اللي هقولكوا عليها دلوقتي
انت عارف انك كمدرب رياضة قوس وسهم للمكفوفين عليك مجهود أكتر من مدرب رياضة القوس والسهم للمبصرين هقولك ليه، علشان انت كمدرب رياضة القوس والسهم للمكفوفين شئت أم أبيت هتكون مرايا لللاعب اللي معاك يعني (انت عنيه) وركز فالكلمه دي كويس علشان كدا انت كمدرب الشخص الوحيد اللي تقدر تخلي اللاعب بتاعك يثق فيك وبناءا علي الثقه دي هيبدأ النجاح.
علشان كدا انت كمدرب هتكون مرايا لللاعب اللي معاك من خلالك هو هيشوف وهيكون أفكار فياريت تخلي المرايا بتاعتك فيها ثقه وخوف وأمان علي اللاعب بتاعك علشان لما تضغط عليه في التدريبات يبقي عارف إن دا لمصلحته هو كلاعب قبل مصلحتك انت مدرب.
والأهم من دا أنك تحافظ عليه لأنه بني ادم مش أداه انت كمدرب بتستخدمها لتحقيق غرض الفوز فقط.
دمتم بخير