....ما بين مستر "الفنان" و ميس "عفريته" تجد عموم مدرسينك ، ما بين النوعين ، و لكن حظك بقى بيحدد بدايتك كانت مع مين ....و لو بدايتك مزدوجه مع كل منهم ....بيتحول شعورك لمزيج زي الكنافة بالمخلل .... فتحب مادة مستر الفنان جدا حتي لو كان بيدرس،هيروغليفي ....و تكره مادة ابلة عفريته جدا حتي لو كانت بتدرس العاب او موسيقي !!
الغريب ان شخصية ا. فنان و ابله عفريته غالبا بتكرر معاك طول مشوار حياتك من مرحلة ابتدائي او ما قبل ابتدائي "و هي بدعة كي جي و تمهيدي و ما شابه " لحاااد ما تخلص تعليم ان شا الله حتي في الدكتوراه ...يظل هناك الفناااان ، و العفريت او عفريته ، يطلع لك في مشوارك !!!

ما بين النوعين ....هناك استاذك ذو الاسم الحركي "مهيب الركن " ، او بالبلدي مستر رمضان مبروك ابوالعلمين .... صارم بس طيب .... مخيف و مهيب ، بس تحبه ، و ده صراحة بيبقي فنان برضه بس من طراز خاص !!!

عودة الي الفصل .....
و الفصل ، لفظ مرتبط بعدة معاني ، فالفصل فيه الفصل .....فصل ما بينك و بين البيت و ابوك وامك و اخواتك .....فصل ما بين لماضتك اللي غالبا بتسيبها في البيت و تتحول في المدرسة من قط شرس في بيتكم الي فار زراعي مبلول ..... او فصل بينك و بين بنت الجيران اللي كنت تحب تلعب معاها و انت صغير و تطلع اخوك الصغير من اللعبه عشان ترضيها ....او خطاب استدعاء ولي امر و انذار فصل اتبعت معاك في يوم من الايام و انت مش عارف ازاي تدخل علي ابوك تدي له الصدمة اللي ممكن تسبب لك عاهه مستديمه او تسبب له جلطة بسبب اعمالك الجليلة !!!

.......داخل الفصل

و جوا الفصل دايما ....سيل من الذكريات ، ما بين ذكريات صاحبك الغلس ،اوانت ممكن تكون الغلس اللي بيقفه المدرس عالفصل يكتب اسم اللي،بيتكلم ، او الغلس 2 اللي كان هزاره معاك انه يلطش سندويتشاتك و يسيبك في الفسحه جعان ....او الغلس المهذب اللي ما يسيبكش تتهنى علي سندويتش اللانشون و لا الجبنة الرومي و يقولك ...ما تيجي نبدل خد المربى و هات ده ، و انت لانك مرهف الحس تبدل و انت من اعماقك بتقوله بالسم الهاري !!!

في الفصل ذكريات عصاية استاذالعلوم اللي كنت بتتلسوع بيها لما ما تعملش الواجب او تكمل الدرجات اللي نقصتها في،امتحان الشهر بالعصاية " طبعا هذا العرض فقط كان حصريا للي حضر جيل التعليم بجد، مش مرحلة مدرستي جميلة نظيفة و متطورة و منتجه جبنه و مربى و زبادي!!!"

المرحلة دي من التعليم المحترم ، استمرت طويلا ، و كانت تحمل اسم "العصا ...لمن عصى" ،-لكن مع الايام تبدلت الاحوال و بقت العصا للمدرس اللي يلمس،طالب ، يشتكوه و يبهدلوه و ينقلوه و النصر للطالب قليل الادب !!

العصا في مشوارنا ما كانتش بس العصايه بالمعني المعروف ، لكن ممكن تكون من اول مرحلة ايديك لفوق و وشك للحيط ، او مسطرة علي ضهر الايد ، مرورا بضربة "الطقش" و هي ضربة احترافيه بمفاصل اصابع القبضة المضمومة في اماكن محدده من عضم الجمجمة بحيث،تسبب لك عقاب الالم المطلوب من غير ما تودي المدرس السجن او تفقده وظيفته ، و وصولا لمرحلة وحش العقاب و هو الناظر ....و طريقة التذنيب تحت الجرس لتكون عبرة لمن لا يعتبر ، و هي حتي لو ذنبك اسبوووع في الشمس،ارحم من انه يفكر يستدعي ولي امرك ... . لان ده زي ما قلنا ممكن يؤدي بك الي عاهه مستديمة لك ، او جلطة لولي امرك تبعا لسبب استدعاءه !!!!

** الحصص ..... هم بالليل و مذلة بالنهار
في مشوارك ، بتلاقي انطباعك عن حصص المدرسة متباين تباين الطقس في مصر علي مدار سنة 2018~ 2019، تلاقي فيه حصص كنت بتنتظرها انتظار قيس لليلي، او انتظار عنتر لعبله و هي رايحه عند نبع الماء ..... و دي غاااالبا و في مشوار اغلبنا بتكون اما حصة الالعاب ....او حصة الموسيقي ، او ربما لو انت من النوع الحرفي شوية تبقي حصة المجال الزراعي و الصناعي ، او لو بقي انت من نوع الواد الثقافي تبقي حصة المعمل او الكمبيوتر او ربما حصة المكتبة !!!!
،لكن قلما حصة المشتاق دي،تكون حصة دراسية فعليه ، الا لو كانت حصة الاستاذ الفنان ، زي حصة الدين بالنسبة لي في خامسة ابتدائي مع الاستاذ كرم خليفة اللي،كان يدرسنا قصة "اسدالله حمزة بن عبدالمطلب" رضي الله عنه ، باداء تمثيلي مسرحي بارع حببنا كلنا في القصة و البطل !!
بينما بقي ممكن تتحول حصة الرسم الي درب من العقاب لو تولت مهمة تدريسها زي ما قلنا اي حد من طراز سلام قول من رب رحيم !!!

الحصة الذهبية ......

زي ما فيه البظ الذهبي في برامج المواهب و اللي بيتضرب فجاة بدون سابق انذار و يكون مفاجأة مدوية للجميع كان فيه برضه الحصة الذهبية ....وهي الحصة الا حتياطي !!!!
و يا سلام لو كانت الحصة الاحتياطي،دي لابلة عفريته سالفة الذكر. ...يا سلاااااام بيبقي العيد القومي لفصل 3/2 ، لولا الملامة كانت التلميذات تلقتها بالزغاريد و الولاد تضرب نار ..... !!!