بلاها يا قلبي

قالت لُه:

"ازرعني في قلبك ولا تخشَنِي

فأنا كالياسمين والياسمين لا شوك له.."

قال لها:

قلبي خلاص بقى أرض بور

ما عادِتش تصلح للزراعة

بزيادة مين راحوا وفاتوه

ولسَّاه بيندِب كل ساعة

بيدُق بالرِّتم الحزين

ويهاب خياله وأي حاجة

حتى لو جاله اهتمام 

بدون لزوم أو أي عادة

بيخاف يحس إنُّه مهم 

أو إنه غالي ع السيادة

لا ف عز نومُه ف العسل

يلبس ف حيط وبدون إفادة

ويرجع يلالي ف وحدته

زي اللي مسلوب الإرادة

يسهر ليلاتي بدمعته ووياه أنا

حزنان وبشرب قهوة سادة

بنعي نصيبي وقسمتي  

وحظي اللي متقَنْدِل 

ودا بمليون شهادة 

أي واللهِ زيمبقولك كدا!!

ف على إيه يا قلبي..

بلاها ضعفك

دول كلمتين مالهومش عازه

اِركن على حيطان البَلادة

لا مشاعري ناقصة

ولا حتى قابلة للزيادة

خليك بعيد..

وافضل وحيد..

وتملِّي بان صلب وعنيد..

الوِحدة صعبة.. حقيقي آه

والحزن مؤلم شيء أكيد..

بس عارف إيه اللي أصعب ..

إحساسنا بيهم

من بعد ما ندوق السعادة