بحب الناس 

واحب اللمه والصحبه

واحب اضحك

ويكون لي كمان

أحباب

بيسألوا عني لو هخفى

وهسأل ع اللي منهم غاب

راح اجري بسرعه ناحيتهم

و ادق الباب

ونفسي يا قلبي بقلوبهم

يقابلوني 

قبل ما يفتحوا الأبواب

ليه تستكتروا الفرحه

على قلوبنا

وليه ظنونكم توديكم 

وبتجيبكم 

على حسابنا

وعهد الله 

وأنا واللهِ أخاف الله

لا عمري يا خلق 

قسّيت حد

ولا أنا ممكن 

أجور على حد

واقول دايما 

هقدم سبت

علشان بكره 

جاي الحد

فلا هينفع 

نعيب على حد

ولا يمكن

نفرق صحبه

ونبيع حد 

ده كله يومين

وراح نمشي

فليه منسيبش 

لينا ذكرى

وصحبه تعيش 

عشان بكره

وكلمة حق

تكون معنى 

وتفضل بعدنا

ك فكره

ليه تبكوني 

وانا المظلوم

وعهد الله 

على فكره

ده كل القصه

نفسي أموت

وجوايا أكون عارف

اني عزيز

وليا غلاوة

في قلوب حد 

ليه يا خوانا بعتونا

وبكتوا قلوبنا 

ليه .. ليه بجد؟