في حضن الطيبة والخضرة

أنا اتربيت

وفي ضل أبويا وجوا حضنه

دفيت

وتحت السما الصافية

أنا ياما روحت وجيت

وكبرت واتعلمت

وعشقت واتحبيت

ومن عيدان الصبر

حبيبي بنى لي بيت

نملاه محبة ووفا

ووياه وبيه

أنا راضية واستكفيت

نسهر ليلاتي سوا

ولأجل خاطر عيونه

بالحنة أنا اتحنيت

وأنا وهو في حبنا

مجانين

في عيونّا لهفة وشوق

وحنين

عاشقين.. تايهين

دايبين

ولا عمرنا حسبناها

لفين الدنيا واخدانا

ولا حتى بدأنا منين

وفي عز فرحي وهنايا

وأنا جوا طيشي وغفايا

من نومي صحوني

وسقوني من أحزان الوجود

مِية كاس وكاس 

والله ما رحموني

عشان بجرأة 

رفعت أنا عيوني

وقولت لعوازلي

فارقوني وسيبوني

جاروا عليا 

وكادوني وظلموني

شوفت الضماير

وبكل حُرقة بكيت

على حلم جوايا اتدبح

بنصل سكين من شبح

زمان عليه حنيت

وبكل صدق عطيت

وبكل كسرة 

هجيت ومشيت

لكن يا ريت 

ويا ريت يا ريت

هينفع بإيه الندم

وأنا كل أملي اتهدم

يا دنيا ليه على الأحلام

بنتحاسب؟

وتموت أمانينا وتتصادر

عشان أطماع ومكاسب؟!

عجبي عليك يا زمان

يا خسارة فين الناس؟

وليه غاب الإحساس؟ 

يا ريتني يا رب

ما كان عندي قلب

ولا عمري عرفت الحب

و لا بالحلوة والمرة في يوم

أنا دوقت أو حسيت