أزيكم أنا علا فاكرني أنا اللي جربت لعبة الموت. أنا اللي جاية من المستقبل عايزه أقولكم إن تجربتي الأولي رغم الأهوال اللي قابلتني واني كنت خلاص هموت بجد، رجعت لزمني تاني، واللعبة سجلت كل حاجة،و َنجحت نجاح كبير جدا،بقا عليها إقبال ضخم جدا وشركات كتير حوالين العالم اشترتها من شركتنا اللي كانت مهددة بالإفلاس خلاص. مش عايزة أقولكم أهلي لما عرفوا إني عملت التجربة دي من وراهم أيه كان رد فعلهم . اللي خفف الموضوع وحل أي مشكلة موضوع انتشار التجربة وبثها على الشاشات ومتابعة الناس للمغامرة وتسابق الشركات في شراء اللعبة منا . وطبعا إني رجعت ومجراش ليا حاجة.!

  مع الوقت تم تطوير اللعبة بإضافة خيارات للأفلام بقا كتب وبرامج إذاعية من اللي بتهتم بالماورائيات والرعب..

بيني وبينكم أنا حبيت اللعبة جدا تقدروا تقولوا إن انكسر جوايا حاجز الخوف. بقيت ادخل المبني بشجاعة واختار أني أجربها وأخوض التجربة تاني من غير أي اعتراضات من العاملين في المؤسسة وكمان العلماء بعد تطوير اللعبه قلت نسب المخاطرة بشكل كبير لأنهم بيعتمدوا علي الخلفية الحقيقة للقصة أو الحكاية وبقوا يتوقعوا أسوأ حاجة ممكن تحصلنا وازاي نتفادي المخاطر دي..!.

صحيت من النوم وبصيت لشاشة الأخبار لقيت نفس الكلام بيتردد العائلات المالكة بقيادة مجلس العلماء تتمني لكم يوما جديدا مفعما بالنشاط والأمان..!

مع خلفية موسيقية هادية ..ومكتوب على جانب الشاشة النهاردة استهلاكك من الطاقة 30في الميه

ونصيبك من حصة الماء 40 بالمائه

وحصتك من الغذاء المصنع بشكل حبوب دوائية ثلاث عبوات ومن الغد نعود لبداية النظام الغذائي النباتي ثم الكرنيفور و الصيام التام عن الطعام والاكتفاء بتناول العصائر المكتملة العناصر الغذائية ..

تململت في السرير بضيق وانا بقول خلاص عرفنا ان لازم نهتم بالصحة.. غيره ..! .

بصيت جنبي وسألت نفسي الساعة كام دلوقتي؟..

ظهرلي مجسم لساعة أدامي بيقول الساعة السابعة صباحا إذا كنت ستتوجه للعمل يمكنك سلوك الطرق الطائرة المخصصة للذهاب للمؤسسات الحكومية وإذا كنت ترغب في قضاء يوما بين أحضان الطبيعة يمكنك أن تسلك الطرق المخصصة لذلك مع تمنايتنا لك بقضاء عطلات سعيدة.

قمت من السرير واخدت شاور ضوئي ولبست هدومي وقولت أروح المؤسسة أشوف أيه الأخبار وأيه الجديد اللي انضاف للترفيه، احنا عندنا كل لحظه اختراع جديد واكتشاف أجدد..

نسيت اقولكم اني بقيت مديرة قسم الترفيه أصغر مديرة في المؤسسة وأن المنصب ده اللي كلفني بيه مجلس العلماء الدولي .. لأني كنت سبب في ان العلماء يعيدوا تطوير منظومة الترفيه ..

 دخلت المبنى وتوجهت للقسم المخصص للترفيه واخترت قسم لعبة الموت ..

قعدت أتجول بين الخيارات اللي ظهرت لي

أفلام رعب

أفلام رومانسية

أفلام بكل الجنسيات

كتب

روايات

برامج

ضغطت على خيار كتب لأنه من الأقسام المتطورة المنضافة حديثا للعبة.

لقيت كتب خيال علمي ومجموعة من المغامرات العلمية لكبار الكتاب وكذلك كتب الرعب .. ومع كل كتاب مقطع فيه ملخص للكتاب اللي هتدور فيه اللعبة..

حسيتا ني لازم اقرأ الكتاب الأول علشان لو حصل واتعرضت لأى مفاجأت لازم أكون مستعده صح .. وموضوع القرايه دلوقتي مرهق ..

طيب أجرب البرامج كده .. أيه البرامج اللي ممكن تكون موجوده وتنفع للعبة الموت.. وضغطت على القائمة ظهر لي مجموعة برامج علمية ووثائقية وبرامج بتحكي مغامرات عن الجن والعفاريت .. و ...

مذكرات نادر فوده...!

قولت نادر فوده ..!

أنا سمعت عن الاسم ده من قبل بس من مين مش فاكره..

ضغطت على الاسم ظهر لي حلقات كتييرة

المشرحة وسر الاطباق الطايرة والنعوش الطائرة والاسرة الملعونة وغيرها ..

حسيت بدقات قلبي بتزيد وانا بقرأ العناوين ..

قولت وانا بفكر كده

لو دي العناوين اومال الحلقات هتكون ازاي اكيد مليانه مخاطر اكتر ..

لقتني بضحك زي المجانين وأنا بقول يا ترى شكله أيه نادر فوده ده

طيب أيه اللي خلاه يدخل المجال ده

قولت وأنا هحير نفسي ليه ما أجرب كده وأشوف حظي معاه وهناك هلاقي الإجابة على أي سؤال..

ولسه هختار عنوان لقيت الموظف داخل بيقولي بجدية ممنوع يا أفندم

قولت له أيه هو اللي ممنوع؟

قال إحنا لسه في مرحلة التجريب مينفعش نخاطر تاني ده هيعرضنا للمسؤلية .

رجعت بضهري لورا وقولت له :أنت بتقول الكلام ده ليا أنا؟

عموما أنا مكنتش هجربها أنا عارفه أني لسه راجعه من الإجازة بس تمام يعني

بص أنا بصفتي المسؤل الأول هنا فأظن من حقي متابعة سير الأبحاث خصوصا بعد الغيبة الطويلة اللي كنت فيها.

أتفضل بلغهم بتجهيز اجتماع فوري في غرفة الاجتماعات الاليكترونية

الموظف قال بانضباط واحترام كده : هبلغهم فورا ومشي

أول ما مشي، الاوضه اللي أنا فيها ضلمت خالص ومبقاش فيها نور إلا في المكان اللي أنا موجوده فيه بس

سمعت ملخص لقصة نادر بسرعة كده وعلى وشي ابتسامة كبيرة وأنا بضغط على زر قبول في نفس لحظة ظهور الموظف وهو بيحاول يمنعني ووو

لقتني واقفة جنب شاب في منتصف الثلاثينات لابس قميص وبنطلون واقف أدام بيت فلاحي كده من بيوتنا الجميلة اللي بنقرأ عليها في كتب التاريخ

لقيته بص في الساعة بعدين بص لي وقالي هو في أيه؟

قولت له معرفشي؟

قالي طيب ما تيجي نتمشى كده نشوف أي حد يفهمنا أي حاجة

أنا عارفه طبعا أحنا هنا ليه بس مقدرشي أتكلم كل اللي اقدر اعمله أني أكون اكتر حذر بس.

مشي معايا وهو بيقولي رئيس التحرير طلب مني موضوع يكون مرعب ولما دورت لقيت أن البلد ري بيحصل فيها حاجات غريبة فقولت أجي أشوف بنفسي..

قولت له : طيب مبتخفش؟

قالي هخاف من أيه بس .. الخوف ده شعور زي المرض كده بيتنقل من اللي حواليك بعدين لو خفت هشجع أي حد انه يستغل النقطة دي ضدى. متنسيش ان في مخلوقات بتتغذى على الخوف.!!

قولت له : احييك بصراحه ونفسي أكون زيك

قالي وهو بيبصلي بتركيز كده: أنا عارف أنتي هنا ليه؟

قلبي دق كده ولحظة خوفت قولت له : ازاي؟

قالي : المدير معينك علشان عايز يعرف أن اللي بعمله يستحق المصاريف اللي بسحبها من الحسابات كل مرة ولا لا.

حسيت براحه لظنه ده.

بعدين ابتدت الدنيا تضلم كنا المغرب .. وشوارع القرية تقريبا فاضية..لسه هنتحرك نسأل على بيت الحج سلام لقينا صوت بينده علينا بنبص ورانا لقينا طفل صغير واقف بين مفترق طرق وبيشاور لينا وهو بيقول تعالوا أنا هوديكم للحج سلام..

نادر متعود على الحاجات دي مستغربش ظهور الطفل في الوقت ده . أنما أنا ابتديت اقلق مانا عارفه أن الطفل هيقابلنا بس مش دلوقتي..!

مشينا ورا الطفل فضل يجري من طريق لطريق لحد ما ودانا شارع تقريبا مهجور على جهته حقل وارض زراعية والناحية التانية للشارع بيوت بتتبني لسه وبيفصل بينهم مجرى مائي زي ترعة كده..

الطفل وقف جنب الترعه ونادر رايح وراه مسكت ايده قولت له استنا أنت رايح فين ..

قالي لو خايفه خليكي هنا لازم اعرف عايز أيه مني وسابني ومشي

ببص ورايا بخوف وترقب كده وعنيا على نادر اللي قرب من الترعه وهو بيدور على الطفل اللي اختفى ..

وفجأة لقيت ظل اسود كبير واقف ورا نادر وهو مش واخد باله والظل أضخم من نادر حجمه تلات أضعافه تقريبا وشكله بيخوف لسه هنده لنادر لقيته بيقولي خلي بالك .. ببص ورايا وهو في نفس الوقت حس بالظل اللي وراه .. لقيته اتكعبل ووقع في الترعه وايدين كتيير اووي بتشده لتحت في الميه وهو بيحاول يخرج ويبعدهم عنه..

وأنا اتسمرت مكاني لما شفت الظل الضخم اللي ورايا واقف وبيبصلي بتركيز وعنييه فاضيه ومكانها نار وحوالين رقبته سلسلة زي الجنزير كده ضخمة ومليانه جماجم مختلفة الاشكال .. لسه برجع بضهري لورا لقيت حاجة لفت على رجلي وشدتني لورا بسرعة وفضلت تشد فيا لحد ما رمتني في الترعه لقيت نادر عمال يبعد الايادي اللي بتشده لتحت وكأنه في مصارعه والميه مغرقه وشه والايدين بتضغط على راسه لتحت وتانيه بتخبي عنيه . من الخوف مقدرتش اعمل حاجة خوفت أتحرك ياخدوا بالهم مني بعدين ببص حواليا وأنا بقول ده كله تخيل مفيش حاجة متخفيش متخفيش غمضت عنييا وفتحتها لقيت بنت جميلة اووى اووى واقفه ادامي في الميه وبتمد ايدها وبتقولي تعالي معايا متخفيش.. هتنبسطي اووي ..

ابتديت اقرب ليها ببطىء وكأني متنومه مغناطيسي .. فجأة لقيت نادر بيقول بصوت عالي .. اعوذ بالله من الشيطان الرجيم ..

متروحيش بسم الله الرحمن الرحيم وقال أول جزء من آية الكرسي و..

ببص جنبي لقيت الولد الصغير بيقولنا تعالوا سلموا على الورداني الأول .. قبل ما تروحوا لبيت الحج سلام...

ببص على هدومي وعلى نادر لقتنا واقفين مكانا لسه .. قولت الحمد لله انها مكنتش حقيقة ..

ببص لنادر لقيته بيقولي وهو بيزعق لازم تاخدي بالك بعد كده أول ما تحسي أن في حاجة مش طبيعية تحصني بالقرآن أو استخدمي مراية أو ازاز دي الحاجات الوحيدة اللي ممكن توقفهم أو تعطل تأثيرهم السحري علينا ..

بقول له أنت بتقول كده ليه ؟

قال لي وهو متعصب علشان كنتي هتتخطفي مني النداهة كانت هتاخدك

قولت له : يعني أنت شوفت البنت الحلوة دي

قال بعصبية : طبعا مجنونه دي ولا أيه ..!

امشي ومتنسيش اللي قولت لك عليه ..

مشينا وإحنا ساكتين وكل شوية يهجم علينا زوبعة هوا جامدة تكون هتزقنا توقعنا ونسمع صوت سلاسل حديد بتخبط في الأرض وصوت عضام بتتخبط في بعض.

مشينا وإحنا بنتجاهل اللي بنسمعه رغم أن الصوت كان بيقرب منا كل مرة..

لحد ما لمحنا ناس كتييرة جايه من بعيد أول الشارع..

الناس لابسه جلاليب سودا وعينيهم زي ما تكون بتشع بالون مالوش مثيل مش من الألوان اللي نعرفها وصوت رجليهم عامل زي صوت الجنود في الجيوش الجراره بتاعة زمان وفضلوا يقربوا منا لحد ما لاحظنا أنها جنازة وان الناس دي ضخمة اووي وأنهم شايلين نعش طوله مترين أو اكتر وقربوا منا وبداو زي ما يكونوا ناس عادية بعدين لقينا الزوبعة الهوائية دي قلبت بعاصفة كبيرة اووي طيرت هدوم الناس وغطت وشوشهم والنعش طار من على كتفهم ووقع على الأرض والناس عماله تحاول تشيل من على وشوشهم الهدوم مش عارفين ونادر وحده جري في وسط العاصفة وهو حاطط أيده أدام وشه وبيوطي يبص في النعش لقى غطاه بيتزاح بشويش وبتظهر صوابع طويلة كلها عضم ولونها اسود

أتجمد مكانه لحظة والغطا بيتشال خالص وقام الكفن متقطع وطلع منه جثة بصت لنادر اللي عامل زي المسحور وفتحت بقها وصرخت صرخة هزتني وكأنها بتنده على كل المخلوقات اللي في الجحيم ونادر واقف مذهول أدام الجثه ولسه بجري ناحيته ظهرت لي البنت الجميلة اووي دي وهي بتقولي بصوت حلو اووي كأنه نغمة موسيقية تعالي معايا أنا سيبك منه.. وبتمد ايدها ليا

حطيت أيدي على ودني علشان مسمعش صوتها السحري وببص عليها بنص عين كده بعد ما غمضتها لقيت شكلها الحقيقي شكلها وحش اووي هيكل عظمي وليه ديل زي الديناصور وراسها زي المحروق كده ومعندهاش شعر في راسها وريحتها وحشه اووي

ببص حواليا لقيت مخلوقات كتيير اووي اووي شبه البنت دي جايه علينا وعاملين دايرة ولسه بيقربوا من نادر علشان ياخدوه قولت له

نادر يا نادر سد ودانك

انتبه لصوتي وحط أيده على ودانه لقى كل حاجة اختفت فجأة.. واحنا ماشين مع الناس في الجنازة وواحد بيقولي مفيش ستات بتمشى ورا جنائز هنا احنا مش في البندر..

راح نادر قاله طيب طيب واخدني ووقفنا على جنب وقالي انقذتي حياتي المرة دي انتي ..

قولت له مش مهم مين ينقذ مي نيلا نشوف بيت الحج سلام ده فين..

فضلنا نلف شوية لحد ما قابلنا واحد خارج من المسجد ودلنا على بيت الحج سلام اللي استقبلنا بترحاب وعزم علينا بلاكل وصمم ناكل

قعدنا ناكل ونشرب معاه الشاي وهو بيقولنا اكيد استقبلوكم

بصينا لبعض وضحكنا قال يبقا قابلوكم

بصوا مش هقدر اقولكم ايه بيحصل هنا لان مهما قولت لكم مش هتصدقوا بس تاكدوا أن السيطرة عليهم سهل اووي بس مبيعرفش الطريقة إلا اللي عنده ثقة في نفسه و..

ظهر أدامهم الظل الضخم والسلاسل حوالين رقبته وكلها جماجم

صوت الحج سلام اختفى فضل واقف مكانه وفاتح بقه وعنييه كلها خوف وفزع وجلد وشه بيسيح ووعنييه بتقع ورموشه وشعره فعليا كان بينصهر زي ا لشمعه ادامنا ..

جريت أنا ونادر وفضلنا نجري ونجري بخوف واحنا حاسين ا ن ورانا اقدام كتيير اووي بتطاردنا وكل ما نيجى نجري لمكان محدد يحاصرنا الصوت من المكان وكأنهم بيجبرونا نروح طريق معين لحد ما لقينا نفسنا ادام المقابر ..

وقف نادر شوية وقالي وهو بينهج

هما جابونا هنا علشان دي منطقتهم انتي ايه جابك بس يا بنتي

قولت له : على فكرة انا مبخفش

سمعت صوت دق على كل ابواب المقابر وكأنهم بيحاولوا يخرجوا ..

لزقت كتفي في كتفه وقولت له : ايه ده؟

قالي مش عارف ..

وفضل يمشي وهو بيبص حواليه بهدوء وبيردد ايات من القرآن في سره والصوت بيزيد واختلط بصوت صرخات وكأن اصحابها بيتعذبوا في الجحيم صوت الصرخات دي كان بيخوفني جدا كنت بترعش كل ما اسمعها..

لحد ما كل حاجة اختفت ولقتني واقفه معاه جوه دايرة وحوالينا الظلال دي وهي ماسكه جماجم في ايديها وبتهمس وبتقول

تعالوا .. تعالوا مش هنسيبكم ..

وفي النص لقينا الظل الضخم ظل الورداني

اللي قال بصوت بيخوف

متخافوش احنا مش جعانين دلوقتي وضحك بسخرية ضحكة شيطانية ونادر راح شاددني من ايدي وزقني جوه قبر مفتوح وقالي اتحصني بالقرآن وجري والظلال وراه زي الضباع اللي بتطارد فريسة ..

قعدت مكاني وأنا ببص حواليا بخوف، فتحة القبر كانت كبيرة ماهو لسه بيتبني .. لقيت الورداني بيبص لي من الفتحة وهو بيقولي بصوته اللي بيخوف تعالي هوريكي حاجة وشدني لبره وأنا بقاومه لقيت الناس بتجري وراه وماسكين سيوف وخشب ونازلين فيه ضرب وهو بيخبي وشه بايده منهم فضلوا يقطعوا فيه وهو واقف وراهم بيتفرج على جسمه وهو يبتقطع وكل واحد اخد حته منه ومشى في البلد واكلوها للكلاب والكلاب تعوي زي الذئاب وتجري ورا الناس وتاكلهم وهو بيقولهم عايز الجماجم عند رجلي هنا

الكلاب تاكل الناس وتجيب الجماجم وترميها تحت رجليه ..

ونادر بيجري وسط الناس والكلاب بتطارده وهو بيقول اعوذ بكلمات الله التامات اعوذ بكلمات الله التامات لحد ما بيبص وراه لقى بيت مهجور دخله بسرعه وهو بيدور على حاجة يستخبي وراه وهو بيتنفس بصعوبة لحد ما دخل اوضه زي الحمام كده عنيه وقعت على مرايه كبيرة مكسورة ومقسومة نصين راح قلع القميص بتاعه ولف كفوف ايده ومسك المراية بايديه الاتنين ودخلت الكلاب جوه البيت وهي بتلف جواه ماشيه ورا ريحته لحد ما قربوا منه لزق نفسه في الحيطه علشان يحمي ضهره واستخبا ورا المراية

الكلاب تيجي ادام المراية وتتحول لرماد والورداني بيتهز ويتحول لرماد هو كمان وهو بيبص لايده اللي مسكت ايديها بالوشم اللي عليها و.. صوت صراخه بيهز البلد اللي الحجارة بتاعة البيوت اتصدعت من شدة الصرخات لحد ما اختفى الصوت خالص..

تمت