في مشاعر تبقى برغم البُعد

ومشاعر تبقى عشان البُعد

ومشاعر تبقى بتاعة حد

ونسرقها

نكدب والكدبة نصدقها

في مواقف نصنع تفاصيلها

ومواقف جاهزة بتفاصيلها

والناس بتحدد مسافاتك بمواقف واضحة و عارفينها

خطوة لقدام من غير حسابات

دي كفيلة تهد اللي بنيته

في مسافة تعدي كلام وعيون

ومسافة تخلي الغالي يهون

مسافات مش ممكن ترجعها وحاجات مش ممكن تحييها

و مسافة لازم تمحيها

ومسافة لابد هتمشيها

وكتير في حاجات بنخبيها

بنخبي ساعات الضحكة علشان بنخاف م العين

ونخبي ساعات الدمعة علشان عين الشامتين

ونخبي كتير من روحنا فبيجهلنا الجاهلين

فعشان متعدش تعاني

وتضيع في البنزين

متخليش شيء مجاني

واعرف بتعامل مين

ولمين هتخطي بقوة

وان عاز تديله عنيك

 وفي مين تستخسر نظرة

او حتى سلام بايديك

واخصم على قد ما تقدر

في الناس اللي متسواش

ده الخصم الناقص منك 

يرجعلك تاني معاش