زمان، كنت باغني لولادي أغاني أطفال لحد ما يناموا

كنت باختار لهم أغاني نيللي في مسلسل مبروك جالك ولد، وأغاني شريط عفاف راضي وعمار الشريعي

لما كبروا وبقوا رجالة، في قعدة عائلية قعدوا يضحكوا ويقولوا إني كنت باغني لهم أغنية رعب

أنا اتصدمت في الكلمات اللي كنت باغنيها ومش في دماغي الصورة البشعة اللي فيها

أغنية الشاطر شريف..

كان في نسناس نشيط ..... واكمنه كان أليط في مرة ماخدش باله، وقع في بير غويط وصرخ ولا حد جاله

أنا اتفاجئت

المشهد بشع.. وقع في بير غويط.. صرخ.. ماحدش جاله! 

تتغنى لأطفال في الضلمة قبل النوم!

التلقي السهل بيودي العقل في داهية.. الشريط طلع وانا في سن سهل التوجيه، والتوجيه ان ده شريط أطفال، والتهليل لعفاف راضي وعمار الشريعي في الإعلام.. النتيجة هي التصديق دون التدقيق

والنتيجة التالية انها علمت مع ولادي لدرجة انهم يفكروني بها بعد أكتر من عشرين سنة

دي أحد اعتذرات كتيرة باعتذرها لولادي عن أخطائي معاهم

ويعيش المعلم ويتعلم