إمبارح فى الحلقة رقم (6) من المسلسل المهم "الراية البيضا" 

سمية الألفي أو " أمل " كانت سهرانة بتقرا حاجة قبل ما يدخل أبوها ويسيب لها التليفون جمبها، الكاميرا سجلت اسم الكتاب اللى كانت مسكاه " مقاطع من أغنية قديمة" وهى المجموعة القصصية اللى كتبها مؤلف المسلسل أسامة أنور عكاشة ونزلت سنة 1988 وكانت مقاطع سردية لطيفة جدا 

المسلسل اتعرض مئات المرات وأول مرة أخد بالي من اللقطة، يمكن ماحدش ياخد باله لكن عشان عارفة شغل عكاشة الأدبي وحافظة غلاف المجموعة عرفت، بس الحقيقة لفتة حلوة خلتني اتصل بأستاذ محمد فاضل المخرج أسأله عنها فقالي " أكيد المؤلف مش هايطلب مني أخلى حد من الأبطال يقرا شغله لكن حسيت انى الدراما ذاكرة فقررت إنى سمية الألفي تمسك المجموعه القصصية لمؤلف المسلسل، إضافة انها كانت عجباني" .

فى محبة المسلسل اللى بعتبره ونس لطيف جدا أخر اليوم بقعد قدامه واسمعه كويس من كل قلبي، ومحبة الفن، والمخرجين اللى مؤمنين بالناس وقادرين يشوفوا الجمال ويسجلوه حتى لو كان لقطة ممكن تمر عادي جوة مسلسل من 30 سنة <3