على خدود الجبل
رسم الزمن تجاعيد
دنيا وفيها العبر
فيها ملوك وعبيد
يارب هونها
مع كل دخلة عيد
الناس تعبانه
م الهم شقيانه
تجرى للقمة عيش
يارب ياجبار
أجبر كسر فقير
م الفقر وأولاده
شايل هم العيد
دا لبس ودى كسوة
ياقهره م الكسرة
ضهره خلاص اتحنى
م الهم وكمان مرضين
مرض اسمه القهره
والتانى اسمه الدين
كسر وسطه بدرى
مع أنه لسه شباب
تشوفه تتعجب
وشه اتملى تجاعيد
م الحزن والكسرة
مع كل دخلة عيد
يارب يارحمن
ارحم كل العبيد
يومهم بيتقضى
حتى لو كام رغيف
يارب يامعين
أجبر قلوب مساكين
تنام تتغطى
بضى قمر بعيد
وسما زرقا صافيه
تيجى بليلة صيف
ربى كريم جبار
قادر يفرحهم
والخير يملى الدار
يارب يا منان
أجبر كل كسير
للهم أصبح اسير
على خدود وجه‍ه
رسم الزمن تجاعيد
تجاعيد زمن قهره
خلاه بقلب حزين
لا فى يوم قدر يفرح
ولا يتهنى ب عيد
دنيا وفيها العبر
فيها ملوك وعبيد