أول مرة من يوم ما خلصت المرحلة الثانوية أفكر أكتب موضوع بس اللي شفته النهارده حمل علي أعصابي قوي و خلاني أعرف ليه ولادنا اللي بنحاول نربيهم كويس لما بيكبروا بيبقي الواحد يا جبان بيخاف ياخد رد فعل ايجابي يحافظ بيه علي حقوقه يا بلطجي عاوز حقه و لو مالوش ياخد حق غيره.
النهاردة الصبح وصلت ولادي المدرسة و استنيت شوية علشان أكلم المدرس المسئول عن تكريم الطلاب بعد الطابور لحل مشكلة خاصة بابني -و ياريتني ما استنيت- و ما أقدرش أنكر انه كان في منتهي الذوق معايا.
المهم فيه فصل كامل من الطلاب كان متذنب في الحوش لأن بعض الطلبة بيلعبوا بعلب اللبن و البسكويت. و بغض النظر عن أهمية استدعاء ولي أمر الطالب و عن أهمية ان العدل بيقتضي تحديد اسم المخطئ و عقابه و عدم أخد العاطل بالباطل علشان نرسخ أهمية مبدأ الثواب و العقاب بدل مبدأ الحسنة تخص و السيئة تعم اللي أتلف شخصيات ملتزمة كتير و حولها للنقيض فوجئت ان العقاب عبارة عن عملية ترويع جماعي للمخطئ- و قبله المصيب -اتوجهت خلاله عدد لايستهان به من الصفعات للأطفال و هم وسط زمايلهم في الطابور اتسببت في حالة عياط هستيري بين الطلبة كلهم بسبب الخوف و الرعب من العقاب بغض النظر عن هل الطالب اللي واقف ده ومش عارف الدور في الضرب علي مين عمل حاجة أصلا و لا لأ .
و رغم استخدام أسلوب الضرب اللي مفروض انه ممنوع في المدارس لكن ده ماكنش عقاب كافي فتم تحويل الطلبة لفراشين مهمتهم جمع الزبالة من حوش المدرسة من غير ما المربي الفاضل يفكر ثانية ان استخدامه للنضافة كعقاب بيشجع ولادنا علي القذارة و النفور من عملية النظافة لأنها هترتبط في ذهنه بالعقاب و مافيش حد بيحب يتعاقب.
و قتها افتكرت نقاش دار بيني و بين أعز صديقة ليه و كنت مستغربة قوي ليه فيه ناس بتقبل الاهانة و مش بتعترض عليها . يعني مثلا أنا عارفة ان الحرامي لازم يتعاقب انما عقابه بيكون بمحاكمته مش بضربه بالشلاليت في القسم فمن حقه رفض أي اهانه توجه ليه بطريقة مخالفة للقانون فقالتلي جملة بترن في ودني قوي دلوقتي ( فيه ناس عندنا في مصر متخيلة ان عادي قوي لما حد يغلط ينضرب و يتهان لأنه أخطأ و كمان فيه ناس مقتنعة ان السلطة - في أي مكان - ليها كامل الحرية في التعامل براحتها خالص و كما يترائي ليها بغض النظر عن أي قوانين منظمة لكيفية التعامل مع اللي أخطأ و الل ما أخطأش ).
ياتري ممكن نتوقع ايه نتيجة استخدام أسلوب عقاب غلط مع ولادنا و هم لسه في بداية تكوين شخصياتهم ؟
أكيد وقت العقاب لما بيتظلموا بيبقوا حاجة من الاتنين يا اما جبان خايف يتكلم بيقول لنفسه مش مشكلة زيي زي غيري ما هو الكل اتعاقب - بغض النظر عن كونه أخطأ من عدمه - أو واحد بيعترض فتتغلظ له العقوبة علشان ما يتهورش تاني و يرفض يتعاقب . و المعترض لو مظلوم بيبتدي جواه تمرد يا اما بيخليه ثوري و ده قليل جدا بحكم صغر سنه يا اما هيبتدي بيفرغ احساسه بالقهر في زمايله الأضعف منه .
و النتيجة في النهاية هتكون يا اما مواطن بلطجي زي الفل أو مواطن جبان زي الورد .