مالك يا حزين واقف مكسور ؟

تعبك الزمان يا حزين

 وأنت لسه شباب

لا عاجبني قولك ولا حالك

وحتى صوتك

 اللي كان بيرن في وداني كل صباح

مبقاش مسموع

وحتى ان سمعته كأنه نواح

من امتى وانت يا حزين ساكت

مات الحنين جواك ؟

ولا الحروف هيا اللي ماتت

تكونش يا واد مسحور ؟

عرفاها ألاعيب الجن

تخلي الجدع أبو شنبات

يلف حوالين نفسه ويدور

تعالى عندي زي زمان

وحط راسك على حجري

واحكيلي

اشكيلي

من امتى وإنت بخيل ؟

ترمي كلمتين وتجري

مالك ياضي العين ؟

والله صغير على الحزن ياولداه

وسكوتك ده اللي مش فهماه

وعيونك دي اللي حيرانة

دبلانة من كتر السهاد

من ميتا وانت بتنسانا ؟؟

تكونش بتحب يا واد ؟؟؟؟

خليك ساكت

ولا ترد عليا بكلامك

وخلي يدك على خدك

ماعيونك خلاص ردت

ودموعك اللي حابسها

حيرانة بترقص جوه عنيك

قبل ما تنزل تحرسها

جفونك اللي جرحها السهاد

والله شكلك بتحب يا واد

ومن غير ماتنطق حتى بكلمة

عرفااااك

من يوم مابصيت في عيونك

فهمااااك

تعالى عندي يا وليدي

وسيبك من الأحزان

واسمع لست عجوزة

فاتها العمر وغلبها الزمان

اوعاك تبكي على أمل مفقود

ولا ليلة تسهر عيونك

تستنى اللي خان يعود

وخدها مني نصيحة

اللي يخون وعوده

وينسى أصله وتوبه

اوعاك تخطي حدوده

سيبه ، لا تبكي عليه

لو كان فيه خير يا ولدي

لو كان أصيل ويعرف

يصون اللي هواه

مكنش يقدر أبدًا

يبيع اللي اشتراه

بكره يحس بخيرك

لما يقابل غيرك

ويعرف إن المحبة 

مش بس نظرة وكلمة

مش ضحكة حلوة وغنوة

ده الحب شوق وحنين

وقلب أبيض وصافي

يهوّن على المجروحين

غلب ومر السنين

ولو مالت عليك الدنيا

بحزن وهم ومآسي

وفاتوك اللي الأحبّة

اللي عمل ناسي

واللي عليك قاسي

الحب إنك تلاقي

حبيب جنبك يواسي

الحب عمره ماكان

هم وسهر وأحزان

اسمع كلامي وافهم

اوعاك على اللي فاتك تندم

ولا تجري دموع عيونك

ولا تدبل يوم ورودك

ع اللي هجر حدودك

وإن يوم رجعلك تاني

حبيبك اللي خان

إياك يا ولدي تفرح

وتنسى في لحظة اللي كان

ده قبلك قالوها زمان

اللي يخونك مرة

أبدًا ملهوش أمان