كدابة دنيتنا

كدابة دنيتنا

وعلى أد مابتكدب

غمضنا ياما عنينا

وصدقنا كدبتها

ومشينا وسط سراب

نحلم بفرحتنا

عايشين أمل كداب

وبرضوا بنصدق

بنحلم كتير لكن

الخوف جوانا ساكن

وكل حلم نعيشه

عمره مايتحقق

وفي وهم سكتنا

قابلنا ياما كتير

وحلمنا حلم كبير

لكن في كل نهاية

برضوا مفيش تغيير

حلم العمر اللي عيشته

لقيته وهم كبير

دخان ومن غير نار

بين السحاب بيطير

على عيني ياعيني

تشوفي فرح الدنيا

وسعد أيامي

بس في أحلامي

وفجأة تصحي ياعيني

على جرحي وآلامي

وكأني جيت الدنيا

بس عشان أحلم

زي الطير الحزين

يحلم يلف الدنيا

فرحان بجناحاته

يوصل للسما في ثانية

يتهنى بحياته

لكن ده حلم كبير

بس الحقيقة إنه

محبوس في قفص حديد

حزين ده زي حالاتي

لاعمري شفت الفرحة

ولا عدا عليا عيد

هو كمان مسكين

لا يوم هيعيش حياته

ولا ليها لازمة جناحاته

عايش حياته في حلم كبير

لكن حقيقته ده زي حقيقتي

لاعمري شفت الفرحة

ولا هو في يوم هيطير