واقف في وسط الفضا

أناجي رب الكون

سرحان في عمر انقضى

تايه في ليل ونجوم

ياااربي سبحانك

عبدك أهو جالك

غرقان في بحر ذنوب

رافع إليك كفيه

نظرة ياربي إليه

نفسه يارب يتوب

ياربي كلي عيوب

لائذ أنا ببابك

راجع طلبت المدد

منك ياصاحب المدد

ذنوبي مالها عدد

نفسي أنا ارفع عيني

واملي بنورك عيني

لكن بقيت مكسوف

أرفع أنا عيني

كل اما بصلب طولي

ذنوبي تحنيني

مدد يا صاحب المدد

لا صاحب نفعني ولا ولد

ولا جاه ولا سلطان

ده أنا اللي كنت زمان

على مالي بتسند

والقوة والعافية والهيبة والسند

واللي يضحك بوشي

واللي يحرس في عشي

واللي بيدعيلي واللي بيرقيني

قال خايف لاتحسد

واللي يقول مسعود

واللي يحقد عليا

واللي يقول ده اتوعد

بماله وعياله اتسعد

ياسلام على الدنيا

لما تغر الضعيف

كان كوم تراب ينداس

وعملتي منه بطل

وبضعفه صدق نفسه

ونسي الموت والحساب

نسي إن بعد الدلال

هييجي يوم العذاب

ومدد يا صاحب المدد

رجعت بذنوبي ولا مال ولا ولد

طال السفر بيا

وكل اللي حواليا

خليوا خلاص بيا

بعد ما راح المال

وكبروا عليا العيال

وانفضت اللمة

ولا حد مدلي إيد

وبقيت ياربي وحيد

راجع بمد الإيد

ومنايا على بابك

ألاقي أمل جديد

ارحم يارب عبدك

من بعد قوة وهيبة

غلبت ملامحه الشيبة

راجعلك ياربي ذليل

لامال بيسندني

ولا عزوة تحميني

محتاج ياربي إليك

وتشهد دموع عيني

ومدد يا صاحب المدد

ذنوبي مالها عدد

لكن لجأت إليك

راجع ياربي حزين

وأملي يارب الكون

تحسبني من التايبين