ياريت تتحملوا مني الخمستاشر ألف كلمة دول ????

أنا مش هاشرح فائدة الفيس بوك ولا هاشرح أضراره ولامزايا ولاعيوب .. ببساطة لأن إحنا اللي بنحدد الحاجات دي بنفسنا لنفسنا ، نسن قوانيننا و نرسم حدودنا و قيودنا كمان .. أرسم حدودي لنفسي ، بمعنى ؛ إن الحدود دي بتكون لي أنا .. زي حدود الأرض .. لا أتخطاها  واروح ابرطع في أرض غيري زي مانا عاوزة و ازرع واحصد واختار منها كمان وآخد اللي عاوزاه ، والخبط الدنيا واقول عادي ، لاء ..

وزي مابحترم حدود حضرتك ، كمان لازم حضرتك تحترم حدودي .. 

حضرتك طلبت إضافة ، على راسي ..

⬅️ ( إضافة مش صداقة )

الإضافة حاجة والصداقة حاجة تانية ، هنا لامكانها ولايمكن يكون مكانها .. لأن معنى الصداقة الحقيقي لايمكن يتحقق هنا  .. 

ماينفعش بأة تسيب محتوى صفحتي واللي هو أساس لتبادل ثقافي ، فني ،  أو طرح آراء مثلا ، أو مناقشة نستفيد فيها من أفكار بعض ، أو حتى لقطة خفيفة مضحكة ، في حدود أخلاقياتي و قناعاتي أنا ... 

وتدخل بأة حضرتك عالرسائل ؛

كلميني عن نفسك ؟

إنتي بتشتغلي ؟

إنتي منفصلة ولا أرملة ؟

إنتي عندك كام سنة ؟

ممكن اكلمك فون ؟

لاء معلش حضرتك كدة بأة بتحاول تتعدى حدودي أنا .. 

وهذا لا يصح .. وغير مقبول .. 

كل شخص هنا كاتب في معلوماته جملة تعريفية لشخصه ووظيفته و ديانته وحالته الاجتماعية .... الخ  المعلومات دي بتكون مناسبة لرؤيته وحريته الشخصية فيما يود مشاركته مع الغير من عدمه .. 

أحترم أنا كدة وبس خلاص ، مش تروح حضرتك بأة عالخاص وتسأل أسئلة زيادة و المفروض إني أجاوب بأة واحكي ؟؟!!!!

ليه ؟!!!

هو أنا أعرف حضرتك منين عشان أجاوب على أسئلة معاليك ؟!!! واقولك على خصوصياتي بأة و حياتي وعادي بمنتهى البساطة  !!! مش معقول ..

 

رجاءً بدون تَجاوز مُوَجَّه للغير .. 

Hebba El Mofty