متحاصر من يومك

جوه مربع

لو تقدر ..هاتنط وترجع

وتدور من تاني

جوه حيطان ف مربع

على إيه دايما ..متسربع؟!

هاتلف ..تلف ..يمين وشمال

هاتعدي جواك

ألف سؤال وسؤال

ودروب ..بتشيل رجليك

حواليك

ومفيش ف الآخر

إلا حيطان ف مربع

فتلف وترجع

وتزهزه جواك أحلام

تفتح لك ف العتمة بيبان

وقصور ..رياحين وجنان

تكبش من خير الدنيا وتطمع

فتلف ..تلف

تشدك أحلامك

وتسلسل جواك روحك

وانت عليك بس تطيع وبتسمع

فتنط تنط

يزقطط جواك إنسان

فرحان

بالدنيا تقرب

فتشوفها عروسة ف كوشة

وزفة وهيصة

وناس حواليك

تلهيك

تتبعتر أوراق روحك

ولا تعرف أي رصيد

 راح تجمع

وتفوق تلاقيك

بتنط تنط وهي بترميك

على آخر جدران ليك

ف مربع !

على إيه متسربع ؟!