ياعم يا بتاع الحاجات القديمة

هات لنا زمان وناس زمان

ايام ما كانوا الجيران

اكتر م الأهل والخلان

قلوبهم بيضا

ونفوسهم صافية

فرحهم واحد

وحزنهم واحد

طبلية واحدة

تجمع الرايح والجاي

مش مهم في ايه عليها

لقمة هنية تكفي مية

والجودة بالموجودة

لما كان وقت العصاري

تحلى اللمة مع كوباية شاي

وستي تضحك وتنده

ع الرايح والجاي

تعا اشرب شاي

والبراد ع النار بيغلي

واحنا الصغار متجمعين

حوالين جدي في دايرة كبيرة

مستنيين يحكي لنا حكاية

والمغربية الكل يجري

ع داره ينام من بدري

لاجل في الفجرية نصحى

ع صوت الديك بيدَن

اصل ستي علمتنا

إن في البدرية بركة

وإن ركعتين الفجر

خير من الدنيا وما فيها