رمضان: سلام عليكم

دنيا: وعليكم السلام..حمد الله على سلامتك ياحبيبي..أجهزلك الغدا

-عاملالنا إيه النهارده؟

-عدس

-إحنا مش كلناه إمبارح؟؟

-الموجود..قال أطبخى ياجاريه كلف ياسيدى

-خلاص..أنا هنام..هما العيال فين؟

-نهله ومعتز فى الجامعه وضياء ونهى فى المدرسة وملك بتلعب عند الجيران وإياد خد رضعته ونام،وأنا هروح أنام شوية عشان الحمل تاعبنى

-روحى جاتك داهيه وانتى عامله زى اﻷرنبه كده

-بتقول حاجه يا رمضان؟

-ﻻياحبيبتى وﻻ حاجة بقولك ربنا يخليكى لينا..إيه رأيك يادنيا أنا بفكر أعمل مشروع جنب الوظيفة يوسع علينا كده؟

-وماله بس هتجيب فلوس منين؟

-أعمل سلفه وللا قرض

-وليه بس ما احنا مستورين ومرتبك آهو بيمشي الحال

-مرتب إيه وزفت إيه..هو دا مرتب وللا دى وظيفة دا احنا بنستلف من يوم خمسه فى الشهر

-ليه كده بس يارمضان ..إنت هتكفر..دا انت موظف فى البوسته قد الدنيا

-آه ياختى قد الدنيا..روحى إعمليلي كوبايه شاى وحطيلى سبع معالق سكر وهاتيلى عيش

-ليه إنت هتغمسه؟

-هتنيله عندك مانع

-أنا خايفه عليك..انت عندك سكر ..انت نسيت وللا إيه؟

-وعندى ضغط وكوليسترول ومرارتى إتفقعت منكم

-مالك بس؟فيه إيه ؟؟

-مفيش..أنا هأجر محل الواد سيد اللى على أول الشارع وأفتح سوبر ماركت كبير

-وايش مِعنى يعنى سوبر ماركت؟؟

-أى حاجه فيها أكل هتمشي..إيه رأيك؟

-خلاص نفتح سوبر ماركت

-وأنا هخلص كل حاجه على أول الشهر..نظبط المحل ونجيب البضاعة ونتوكل على الله

*وبعد شهر

-دنيا: ماشاء الله ..المحل يهبل وفيه كل حاجة..هو إيه دا يا رمضان؟

رمضان: أنا عارف الراجل باعت حاجات غريبة كده..دا شاور جيل..ودا سكر دايت ..ودا لبن جوز هند..يللا آهو كله أكل عيش وخلاص..إنت يا واد يا معتز سيب اللى فى إيدك ده..يابت ياملك إيدك والحاجة ..إنت يا واد يا ضياء..ماتحوشي العيال يا دنيا

-الله..ماتسيب العيال تفرح يا رمضان

-ياواد سيب البرطمانات دى هتتكسر..حاسب..حاسب..وقعتهم..كده كسرتهم يابن ال....بقولك إيه يادنيا خدى العيال دى واطلعوا برة ..مش عاوز أشوف حد فيكم هنا

-خلاص..خلاص..طالعين ماتزعلش كده..يللا يا واد منك ليه على فوق يللا

-إسمعى يادنيا إنتى ماتاخديش حاجه تانى من المحل إنتوا كده هتخربوا بيتى

-يعنى إيه؟يبقي عندنا محل ونشترى من برة

-ﻷ بس خدى الضرورى ..الضرورى جدا

-طبعا ياحبيبي..أومال إيه

وبعد يومين

-دنيا: واد يا معتز ..إنزل هات كرتونه صابون ومسحوق غسيل ..الكيس الكبير..أكبر كيس..وكرتونة جبنه من أحسن نوع ورز ومكرونه وزيت..زيت درة ياواد..وهات أربع أزايز شاور و......إيه تانى يا دنيا...إيه تانى..آه..عشر علب زبادى عشان أخوك بيسنن و.....آه..ازازتين رايب لحسن حاسه إن عندى حرقان فى معدتى..وارجعلى تانى أكون إفتكرت الباقي

معتز: باقى ...هو لسه فيه باقى..أنا مش فاضى

-فيه إيه يا واد..إنت وراك الوزارة يعنى

-طاب بقولك إيه..أنا عاوز جيل لشعرى وباكوين بسكوت وعلبتين عصير عشان رايح النادى ..لحسن والله ما اجيب حاجه

-روح اتنيل خد..بس اوعى تقول ﻷبوك ان احنا خدنا حاجه

-تدينى كام وانا ماأقولش

-غور جاتك داهيه..عيل رخم ..والله ﻷقوله

-انتى تقولى وأنا أقول

-غور يابن ال....

وبعد اسبوع

-يا دنيا..انتى ياست يا اللي فى البيت..ياهبابه

-إيه فيه إيه؟مالك داخل تزعق كده ليه؟

-بنتك..فاتحه علبه حبنه كبيرة من أحسن نوع وبتأكل القطة ع السلم..هى الحاجات دى مش بفلوس وللا إيه؟

-خلاص خلاص أنا هشوفها..ماتزعلش نفسك..كل ده عشان علبه جبنه

-إنتى حاسه بحاجه..إحنا ورانا اقساط وإيجار محل و......إيه ده؟إيه اللي فى إيدك ياواد يا ضياء...دا رابع كيس شيبسي أشوفه فى إيدك النهارده

-الله ماتسيب العيال ياكلوا..انت هتعد عليهم

-إنتى إيه..فيه حد مسلطك عليا...عاوزة تموتينى ناقص عمر

-سلامتك ياخويا خلاص حقك عليا أنا هربيهم العيال دول..غور ياواد انت وهو وهى على جوة..على مهلك ياحبيبي أقعد استريح

-خﻻص أنا بقيت كويس..روح ياواد يا ضياء هاتلى علبتين سجاير من المحل

-وليه التبذير ده ما كفايه علبة واحدة

-عندك حق..كفايه علبة ..إيه الريحة دى ؟

-ريحة إية؟

-هو انتى حاطه إيه فى وشك؟

-دى خلطه لبن جوز هند وملح الحليب والزبادي بس إيه..بتخلى وشي إشطه

-والحاجات دى منين؟

-من المحل طبعا

-حسبي الله ونعم الوكيل فيكم

-رمضان يا رمضان..رد عليا..إلحقوا أبوكم يا وﻻد

***تمت**