رٌد عليا إيه مالك؟

ليه ساكت ؟ما تتكلم ؟!

أخد جنب وعايش وحدك

لإمتى تٌصد و تبلم؟

لا قادر يوم تجيب حقك

ولا من الناس بتتعلم

فالح تفرد أوي ف طولك

كأنك هيبه ومِعلم

ده كٌلك م الجراح دايب

وكف الحٌزن على وشك

بقا مِعلم

بلاش تكدب على نفسك

شيل رايتك على كفوفك

واستسلم .. وروح سلِم

وخلي الدمع مداري

مهما تحس بالغربه وهتتألم

كِبرنا يا قلبي ع المداديه

يا تكشف كل أوجاعك

بدل ما تهاتي وتبرطم

يا إما تموت وخلصني

يكون أسلم

إيه يعني يجرى

لو تصرخ بعلو الصوت

بدل ما تطق أو تندم

ما كله بيحكي وبيشكي

ده عن حبه وده عن خيبته

وده اللي يوماتي نومته ف غم

وكل الناس بقت سلاطه

لا عارفين فيها مين طيب

ولا اللي طعنا مليون سهم

خلاص دلوقتي هتطاطي

وسايبني ف وحدتي آهاتي

وأشيل خيبتك وكل الهم

ياما قالولي فوت قلبك

وعيش مرتاح بقا واتلم

أقول لأه ومتهونشي

وأخرتها .. شقانا يا عم

ماشي يا قلبي خد راحتك

وعهد الله لكون بايعك

عشان خيبان

ولا عندكش ريحة الدم