كان مسار الحلم
زي جناحات الطير
بتحضن شموس الكون
طموحها ماله حدود
ما يمنعها أي سدود
بترسم على الدنيا
بأملها مليون لون
كان الطريق واحد
وقلوبنا متجمَّعة
على قلب كان واحد
وبنينا بالفكرة
مدينة بالحكمة
الكل فيها يشكر
ومكانش فينا جاحد
ده كان مسار الحلم
صحينا من نومنا
لقينا أيامنا
شموسها مطفية
حتى طيور الأمل
مزوية منسية
مقصقصين ريشها
وعلى جنب مرمية
رغم إن الكون براح
مكنش ليها متاح
حسبوا عليها الخُطى
وقفلوا ع الأحلام
بالضبَّة والمفتاح
وحاد مسار الحلم
لكن ف قلب العتمة
وسط غيامة الظلم
يضوي شعاع الخير
ويبدد الضلمة
يصرخ أنين الصمت
من الآهة والحُرقة
يكسر هدوء السُكات
ويهاتي وينادي
ما تقولش حلم ومات
ده مهما طال الليل
وزادت الظُلمات
الفجر هيأذِن
والنور مِسيره يبان
من ربنا الرحمن
خالق السماوات
ولسه باقي الحلم
هند حمدي عبد الكريم السيد
مروة كرم محمد رشاد
د. ايمان احمد ابو المجد الدواخلي
مني مفرح عبد السلام دبوس
داليا فاروق بدر بدر ابراهيم
د. نهله فتحي بيومي حموده
خالد عبد الرحيم خضير العامري
عبير مصطفى محمد متولي
زينب حمدي 
د. عبد الوهاب المتولي بدر 
د. نهله عبد الحكم احمد عبد الباقي 
د. شيماء أحمد عمارة 
د. محمد عبد الوهاب المتولي بدر 
هبه عبد الفتاح عثمان الدقوني 
ياسر محمود سلمي 
حنان صلاح الدين محمد أبو العنين 
م. اشرف عبد الصبور الكرم