مشوارك ..... مجرد استرجاع لذكريات ....جميلة ، عبيطة ، و واقعية ، لمشوار حياتك ، لمراحل كلنا او بعضنا ...او محدش مننا ، عدينا عليها ، او عدت علينا ، او خبطنا في بعض
بس المهم ان في تقليبنا للذكريات دي ....هتلاقي حاجه منها ، عدت عليك .....في مشوارك
مشوارك ، مش مجرد كلام هزار ، و لا كلام جد ، ،،،، يمكن هو استرجاع للذكريات ، او ترحم عاللي فات ، .. . او نصايح للي ما شافش ....كان ايه شكل مشوارك !!!
تعالوا مع بعض نسترجع ايام الزمن الجميل و الذكريات ،و نشوف ايه اللي انت فاكره ، و اللي حابه ، و الللي مخبيييييه ..... في مشوارك ، لحد ما وصلت للشكل اللي انت بتتخض لما تشوفه في المرايه كل يوم الصبح .....قبل ما تبدء .....مشوارك !!!
الحلقة الاولي
"بداية المشوار ..... الطريق الى المدرسة"
طبعا احنا مش هنبدء المشوار بطفولتك ما قبل المدرسة .....لان الحكاية مش ناقصة بامبرز ، ده لو كنت من الجيل اللي حضر البامبرز اصلا فيبقي هترجعنا لمرحلة ما قبل الكوافيل ، و ده مشوار مش ظريف لا ليك و لا للي شافك و انت في المرحلة دي و لا للي ما شافكش. ....اذا خلي المشوار يبدء علي نضافة .....و تبدء رحلة الطريق الي ايلات ، و قوات العمليات و هي في طريقها الي اول خطوة ، علي الطريق الصعب .....مشوارك في طريق المدرسة !!!!
في مشوار طريقك الي المدرسة ......اللي لما بتفتكره بتحس نفسك "علاء مرسي" في الطريق الي ايلات لما بتفتكر ما الت اليه الامور ، و ان في النهاية بتكتشف ان بقي لك فترة من الزمن بيتضحك عليك عن التفوق و نتائجه المبهرة ، و ان كل المجهود اللي بذلته في 11، 12- سنة تعليم بمراحلة سوبر ماريو المختلفه بتاعته ، اهم ما فيه حظك لحظة مقابلة الوحش .....و الوحش ده انت و بخت و حظ جيلك ......
اما وحش سنة واحدة ثانوية عامة خبطها و جبت المجموع اللي هو اللي دخلك الكلية اللي هيييي ، اللي بتطلع في الاخر وولا ليها اي علاقة باحلامك مطلقا ..... او ......بس احنا اللي هيدخلنا علي مرحلة الوحش من الاول ......تعالوا نرجع لمشوار كل واحد فينا في اوله و هو ماريو صغير لسه ما بقاش سوبر ماريو ، و هيبدء مشواره المدرسي !!!! /
البدااااااية ...
و كل منا له ذكريات مع بدايته ، لكن اغلبها بيكون ذو طبيعه واحده ..... شخص كبير مسؤل عنك. ..ابوك ، عمك ، خالك ،....جدك لو حظك حلو و لحقت لك جد ..... حدمن الجيران .... المهم انه واخدك في ايده ، و محسسك بالامان و المسؤليه ، و اذ فجأة ، .....ما ان يظهر ذاك المبني المهيب ، الرهيب ....الا و تفاجأ بالخيانة ....و يتخلي عنك هذا المسؤل ، و يلقيك في غيابات الجب !!!!
و مرحلة الالقاء في غيابة الجب المدرسي كانت بتختلف من مشوار شخص لاخر ..... بعض،منهم حنين قوي فيدخلك لحد الفصل و كمان يشوف واسطة يحجز لك اول تخته " و التي تسمي،بنش و دسك حاليا بلغة ابناء الكي جي " .....و يطمن عليك و يلقي عليك نظرة وداع حانية مبتسمة ، بتقلب بدموع اول ما يلف و يسيبك شبه مشهد "منى زكي" في نهاية فيلم مافيا و يسيبك بقي .....لبداية مشوارك !!
ممكن بقي البداية تكون متطرفة شوية ..اما ام حنينة قوي مع بنت دلوعة قوي فلازم ماما كل يوم تيجي،تقعد جنبها عالتخته عشان تهدىء من روعها و تمسح دموعها و تقوي من عزيمتها و تقرف اهل مدرسينها عشان بنتها تاخد اول خطوة في لحظة الفطام المدرسي !!!
او الطريقة الوسطية ،
و هي ان ولي امرك اللي وصلك المدرسة يعمل لك باااااي ما ان يراك تنخرط في السلك المدرسي بدخولك في طابور من الاطفال فيهم اللي مسبسب قوي،و واقف في فخر و شياكة زي "حسين فهمي" ،في،فيلم الرصاصة لساتها في جيبي ، او اللي مناخيرة نازله و بلت صدره من كتر البكى و العياط علي المصير المجهول الذي ينتظره بعد هذا الطابور !!!
او بقى النوع العكسي ، للام الحنون ، و هي الجافية ......و هو ولي الامر القرفان ، اللي جاب الولد او البنت ....و علي باب المدرسة و كانه جاي يطلقها عند مأذون . .. و يرميه او يرميها قرب باب المدرسه كانه قافز مظلي مثلا تم القاءه من طائرة عسكرية ..... و مش مهم النتائج ،،،، الواد يبكي ، يدخل المدرسة ما يدخلش ، ....يتوه ...... هو عمل اللي عليه و رمى كيس الزباله عند سلة المهملات ، و اكيد هيجي له صاحب النصيب اللي،هيشيله من الارض ، و يرميه في سلته !!!!
* و ابتدى المشواااار .....
و دايما بداية المشوار غالبا بترتبط بشخصين ، مدرس او مدرسة اسمه الحركي، "الفنان".....
و ده لانه فنان فعلا .....المدرس اللي بلباقته و طيبته و شطارته مع شخصيته المتميزة و خبرته كمعلم فعلا ،،يحببك في المدرسة و الفصل و التعليم
و فيه الشخصية النقيضة ..... ميس "عفريته " اللي بتكره التلميذ في المدرسة ، و حوش المدرسة ، و سيرة المدرسة ، و الشخص اللي قلنا عليه من شوية اللي جابك المدرسة ....و اعتقد اغلبنا في مشواره صادف النوعيتين في احد مراحلة ،لكن بيكون من حسن حظك انك تقابل الفنان في بداية مشوارك. ....او فقر اهلك بقى ان مشوارك يبدء بميس "عفريته" !!!!!
2
-2
