سكوت هنصور

سكوت هنصور قلنا سكوت

ممنوع كلامنا ورفع الصوت

سكوت هناخد للوطن صورة

خبي همومك والعينين مكسورة

وفر صراخك لماتش الكورة

ولو حابب تصرخ قول توت

سكوت هنصور قلنا سكوت

ممنوع دموع بلاش تبكي

ممنوع فضفضة أو تحكي

ما هو لو شكيت لمين راح تشكي

كلها يومين والعمر يفوت

سكوت هنصور قلنا سكوت

وطن ضايع وكمان مسروق

حق متهان وضمير مخنوق

اوعى تفكر يوم وتفوق

كونك إنسان محتاجه ثبوت

سكوت هنصور قلنا سكوت

مطلوب ضحكة ع الشفايف

اضحك لو مغلوب أو خايف

مثل شعورك حتى لو زايف

غير مودك ولو بزر ريموت

سكوت هنصور قلنا سكوت

لو حياتك قهوة خليها زيادة

تخيلها بسكر لو كانت سادة

دنيا ظالمة وقاسية كالعادة

عايش ميت مسخ وهلفوت

ع الهامش هتعيش وتموت

سكوت هنصور قلنا سكوت