أول ما طلعت شريهان في الفوازير لابسة الفوشيا مع الأزرق، انقسم الناس إلى شباب شايفينه جرئ وتغيير وتمرد.. وكبار شايفينه يع

أرجع بالزمن أكتر.. وأنا تقريبا 7 سنوات يعني من خمسين سنة طلعت كلمة طنش.. بعض الآباء لو ولادهم قالوها لهم "طنش يا بابا وماتضايقش نفسك" مثلا، كان ممكن يتضربوا بالقلم وللا بالجزمة

لما ظهر محمد منير واشترينا شرايط الكاسيت بتاعته، الكبار قالوا ده محتاج يستحمى، ولما لقونا بنحب أحمد زكي قالوا ده مش ناقص غير يلعب في مناخيره

العجيب جدا.. جدا جدا.. أن اللي مروا بالحاجات دي لما يشوفوا الشباب بيحبوا حاجة مش بيفتكروا اللي حصل معاهم، لأ بيكرروا نفس اللي اتعمل فيهم!

نفتكر قول فيلسوف الإسلام والعرب سيدنا علي بن أبي طالب وهو بيقول "خُلقوا لزمانٍ غير زمانكم".. طيب أنتم مجربين، مش بتستفيدوا بالتجربة ليه؟.. أنتم عارفين كنتم بتفكروا في كبار زمانكم ازاي لما يقولوا لكم كده، بجد يعني تحبوا الشباب يفكروا فيكم نفس اللي عارفينه بينكم وبين نفسكم أنكم فكرتم فيه؟

 أقول وللا ربنا أمر بالستر