ياولدي ليه بتلملي في الهدوم
وتصر في منديلي الهموم
على فين ياولدي موديني
رويتك من لبني وحنيني
وكأس الغدر بتسقيني
على فين يابني واخدني
مش كفاية الزمن خاني
ومعندني
كنت فاكره العوض فيك ومنك
يا ابني
كنت فاكره إن وحدك نصفني
عشان عارف شقاية وعرفني
ليه ياولدي بتخليني أحس بالأذية
دا أنت وعيالك فرحة قلبي ونور عنيه
حلفتك بالأمانة تسيبني هنا
أنا نسيت المرار اللي شفته
و فاكرة الهنا
يا ولدي بلاش عليك أهون
وافتكر إني شلتك في بطني
تسعة من الشهور
وإني ضحكت وبكيت
وإني حتة..... من حيطان البيت
وانى أمك لو عضم في قفة
وانت أغلى اسم ع الشفة
وإني عارك مهما أكون
مين قالك ترمي أمك
مين سن القانون
أمانة يا ولد بطني
سيبني أعيش ع الذكريات
كل حيطة وكل باب
معلم في قلبي م الحيا للمات
عشت مع أبوك سنين طوال
أحلى السنين
دخلت بيته زي الغزال
ونسيت كل البشر ....
الأهل و العم والخال
كنت عود مفرود مهما الزمن مال
سيبني عايشة على ذكريات السنين
سيبني ناسية الأسى فاكرة الحنين
فاكرة دخلت أبوك علينا
والأيدين بالخير مليانين
وصوته في الأذان
والفاتحة وسورة التين
وطبطة أيديه ع ضهر الحزين
فاكرة برد الشتا
وصيف الليالي
فاكرة قعدت أبوك قبالي
وهو يتملى في جمالى
ويقول أحمد الله عل الخير عطاني
فكراله كل الحاجات الطيبة
منا منه كنت قريبة
وكان شمعة حياتي ونسها
لسه باكل من التينة في وش الباب
اللي بأيده غرسها
لسه خيره علينا
لسه شالُه من الصقعة مدفينا
لسه حاسة لمسة أيديه فوق كتافي
لسه بترن في وداني كلمته
وقت الشقا
الله يعافي
يابني أبوك مكانه مش في قبره
مكانه في قلبي ولاحد قبله ولا حد بعده
سيبني عايشة ع الذكريات
هي الطعام حتى لو فتات
وحياة حبيبك محمد يا ولدي
سيبني عايشة بين الحيطان
سيبني فاتحة بالمحنة كل البيبان
سيبني بين ولادك أحس بالدفا والأمان
لما أحط راسي عل المخدة وأنام
1
-1
