شنطة سفر

شنطة سفر

حطيت فيها ألبومات 

حبة ندم ....وشوية آهات

خدت ريحة الحيطان..... 

وشوية ذكريات 

خدت حبة من تراب الأنين 

وشوية .....من رمل الحنين 

خدت فيها شوية بشر 

شالوا القلوب.....وحطوا حجر 

شنطة سفر

حطيت فيها صرخة سكات

وكفن حلم غالي

 مات 

وضريح بقبره من الآلام ...... 

....وشوية كلام 

وكتير كتير غدر وخيانة 

وبحر من.......الملامة 

وشوية نغم 

من وتر الحياة 

ولحن ع الناي والربابة 

وكتير كتير رتابة 

من سنان وعض الديابة 

وزحف من الطحالب

ومكر من التعالب

واخدة فيها أمواج العناد 

 اللي فاتلة أحبال البعاد

 وقاطعة حبل الوداد 

واخدة فاتورة م الحياة 

مطلوبة السداد 

شنطة سفر شايلة فيها كل المشاعر

كل كلمة حب أو حنين كتبها شاعر 

واخدة فيها موادن الجوامع

و أجراس الكنايس 

و هتلاقي كل المعابد فيها

.......جايز

واخدة فيها كل خيوط العنكبوت

وضحكة حلوة كيوت

غرقانة في بحر الهموم

واخدة فيها السما 

واخدة فيها الغيوم 

واخدة فيها طعم البيوت

وحبة كلام تعبوا م السكوت 

وعالم بتصرخ مافيش أمان

 ولا حتى قوت

واخدة فيها حياة. .... 

 مليانة موت 

واخده فيها شوية شروق 

...سرقاهم قبل الغروب 

واخدة فيها حكمة بتقول ..... 

...الكفن مالهوش جيوب 

شنطة سفر 

واخدة فيها الطيابة

واحلام الغلابة

اللي ماتت.......

قبل الولادة 

شنطة سفر 

واخدة فيها

ريحة المطر في الارض التراب 

واخدة فيها شوية غيوم 

وشوية سحاب 

واخدة فيها شوية فرح ...... 

سكر ...في المر.......داب