وسط البلد، طعم تاني، جو تاني، كانت ماما تعشقها تاخدني معاها شغلها وتنزل بدري نتمشى وتشتري لي لبس وحاجات وتشتري لنفسها اشيك واغلى جلود وجزم وشنط وجواكيت من وسط البلد المشهورة بالجلود.

ماما كانت اول ما اتجوزت لسه طالبة في الجامعة لكن جدي (باباها) جاب لها واسطة واشتغلت، في (هيئة حساسة) 

كانت تنزل هي وبابا الصبح يفطروا في اكسلسيور او حديقة (الامريكين) الخلفية ويطلع كل واحد على شغله. 

كانت بتدرس وبتشتغل وبابا كان بيساعدها في دراستها وفكل حاجة، !

 انا كبرت على حب وسط البلد، عريقة، عتيقة، بتفكرني ب ماما كانت تعشق التمشية في وسط البلد والشوبينج،

 ساعتها كان فيه تلات أماكن فقط للشوبينج، بالنسبة لسكان شبرا، هما وسط البلد ومول رمسيس هيلتون والزمالك، 

 انا لسه باحب وسط البلد،

 لسه باشوف ماما بجمالها وشياكتها ورقنها وهي ماسكة ايدي وبنتفرج على الفترينات لسه فاكرة نظرات الناس المعجبة بيها وبجمالها وشياكتها،

لسه فاكرة وهي بتجيب لي اي حاجة انا عاوزاها، وتصمم نقعد ناكل ونشرب في أي مكان اختاره، ماما❤ كانت ست جميلة جدا وراقية في كل حاجة ،