قبل كل نشرة دي طاقة عامة بتأثر علي الكل بشكل متفاوت مش علي #برج معين وحسب خريطتك الفلكية

النهاردة #القمر و #الزهرة و #عطارد في برج #الجوزاء طاقة خفيفة بتحسوا برغبة كبيرة في التواصل مع اللي حواليكم ...في السفر ... في الخروج 

#القمر في زاوية سعيدة مع زحل المتراجع ...ناس كتير هتتفاجئ برسايل او مكالمات مع ناس متكلموش من فترة 

يوم مناسب جدا تبداوا اي حاجة جديدة وتضمنوا انها تستمر لفترة طويلة ..يعني اللي عايز يبدا مشروع...ياخد كورس...ينقل بيت جديد...ارتباط عاطفي..الكتاب والفنانين اللي عندهم قفلة كتابةابداوا اكتبوا سطر واحد وهتدعولي:) لان النهاردة يوم بيدعم الاستمرار والاستقرار

#القمر مقترن بعطارد كوكب التواصل والاتصال وكمان مقترن بكايرون وكايرون ده كويكب صغنن بس جبار بندور عليه في الخريطة الميلادية علشان نعرف مكان الجرح النفسي اللي لو قدرنا نتشافي منه نلاقي سلامنا النفسي وبما انه حاليا في الحمل ومتصل بزوايا سعيدة مع عطارد والقمر ومع هيمنة برج الجوزاء في السما بكل الكواكب اللطيفة دي فالنهاردة يوم مناسب جدا للصلح بين المتخاصمين ...الناس اللي لبخت في الكلام مع حد او قالت كلام مكنش ينفع يتقال النهاردة فرصة كبيرة تصالحوهم وهتعرفوا تستخدموا الكلام المناسب استغلوه...مناسب للتفاوض وحل النزاعات بشكل ودي

برضه النهاردة يوم مناسب للاعترافات والاعتذارات ...والمبادرات العاطفية...مناسب تقدم لوظيفة واي اجراء حكومي او اوراق متعطلة فرصة النهاردة الامور تمشي اسرع

يوم مناسب لصيانة العربيات والاجهزة الالكترونية والموبيلات

شوية بتزيد الحساسية الجلدية تحديدا في الايدين والدراعين وحساسية #الجيوب_الانفية

طبعا مفيش طاقة في الدنيا بيقدر يستفيد منها الكل ده محكوم بامور كتير لكنه بشكل عام يوم لطيف حظوظه كويسة للي هيقدر يستغلها 

#نشرة_اخبار_الكواكب