يا خبر... ده باينله بجد !!!
مش واقف جنبك حد !!!
وإيه يعني...
حونس روحي بروحي
طول ماخطاي بتتمد
وأطبطب على نفسي بنفسي
وأكتب لها حاجة جميلة
وأسهر أستنى الرد
مش أحسن م الخاينين
اللي عيونهم كدابة
وأحسن من لايمين
يشكوا زي الندابة
وأحسن م الفاكرين
إن الدنيا دي غابة
الوحدة دي نعمة لذيذة
وخصوصا وسط الناس
قوة مخفية في قلبك
تحميه من غير حراس
عشان لا في مرة تآمن
ويقع منك يندش
ولا يتبهدل حيرة
مع خلق لها ميت وش
يا صاحبي اسمع مني
وحدك لكن ونسان
أحسن م الحوجة المرة
لمشاعر إنسان

رانيا ثروت