النقاش (دا لو نقاش..مش شتيمه ورمى بالكفر أو رمى بالجهل أو زى كاتب البوست فى الصورة ...اللى على فكره صاحب قناة طحالب...بيشتم اى خلاف معاه فى ربع كلمة بأحقر الألفاظ عشان يدافع عن الدين بقى)..

المهم...الكلام واخد منحنيات عجب...المؤمنين الجامدين اوى اوى شايفينه صفعه على وجه الإلحاد...و الملحدين شايفينه شلوت فى وش المؤمنين...وشغل تالته اول بزيادة...

بص يا ابنى...عشان نتناقش أنا وأنت لازم الاول نتفق على أرضية مشتركة..يعنى حنتناقش بالعلم؟ يبقى نتكلم بمنهجية العلم...بكل شكه و تردده وعدم يقينه و قابليته لتكذيب نفسه فى حالة ظهور أدله معاكسه للمعرفة الحالية.

حنتناقش بالدين؟ يبقى بأدواته...بالمسلمات الاوليه الغير قابلة للنقاش...ولا النقد...ولا النقض...

مينفعش أجر فرضيه من أرض العلم واطلب منها تثبت فرضيه فى أرض الدين...ولا ينفع أجر فرضية من أرض الدين و اطلب منها تنفى فرضية فى أرض العلم...الادوات مش واحدة...اللغة مش واحدة...

هى صور فائقه الدقه لعمق الكون..تتويج لسنين طويلة من العلوم المختلفة.. جميلة ومبهرة لغير العالم....غنيه بمعلومات جديده للعالم الغير متخصص...وكنز للعالم المتخصص...جميلة جمال العلم نفسه..مبهرة بحجم ابهار الكون كله...

لو ملحد بيسأل عن وجود الله.. الصور مش حتجاوبه وتقوله اهوه....حيشوفها صور ما بعد الانفجار العظيم بتاع ستيفن هوكينج...ممكن تقول كلام كتير عن مدى نظام الكون و قابليته للتمدد...بس خلاص..

لو انت مؤمن ..مش حتغير فى ايمانك حاجه...انت عارف وواثق ومتأكد أن ربنا هو الخالق...ميكانيزم الخلق تخصه و الله اعلم حيكشفها لنا ولا لا...وان كان وصف القرآن اقرب للانفجار العظيم...فرصه الاحساس برهبه الموقف و تفكر فى قدرة الخالق..

لو انت مؤمن وعالم...حتشوف اد ايه العلم جميل..منحه الهيه عظمى...حتبص فيها و تفحصها و تقول سبحان الله وأنت بتحلل بيانات عادى...و عندك استعداد أن تحليل بياناتك يطلع بكره غلط..وان الصور الجايه تقولك معلومة مناقضه تماما لما تعرف..من غير ما دا يأثر فى ايمانك بشىء...

اهمدوا على بعض شويه وبلاش هرى وتلبيس عمم...