يا سلام على أيام الطفوله البريئه مش عارفه ليه لما شوفت عنوان لا تفعلوا مثلي 3 أعادتني ذاكرتي الى ايام الأبتدائي يمكن علشان كان فيها حاجات كتييييييييييير تنفع توضع تحط هذا العنوان
بس الموقف ده بالذات يعتبر درس للفتكين اللى بيحبوا يتفاتكوا زي وأنا يا سلام الحتة دي بتاعتي نادرا ما أقول ما أعرفش لازم أفتي:D
ما علينا أحكيلكوا على الموقف ده ,وانا فى الصف السادس الابتدائي وفي نهايه السنة عملنا حفله فى الفصل وعزمنا كل المدرسات(زي حفلة تخرج صغيره كده),وياريت ما عملنا لأني وفى أثناء تجهيزات الحفله العيال زمايلي اللى غاوين فن قرروا يعملوا مسرحية وأنا ولسوء حظي كنت حاضره البروفات بتاعتهم
وبغلاسه الاطفال المعهوده روحت وقفت جنبهم وقولتلهم: عاوزه أمثل (وطبعا أنا ماليش فى التمثيل نهائي)
قالولي: مفيش دور تعمليه
رديت:اتصرفوا أنا عاوزه أي دور أن شاء الله أكون كومبارس صامت ربنا يخليكوا
وفعلا ألفوا دور مخصوص علشاني ومكانش ليه أي لزمة فى المسرحيه آه واللهي مالوش لزمه أبدا عارفين لدرجة ايه مكانش ليه لزمه ؟؟
لدرجة أن المسرحية خلصت وأنا لسه واقفه فى الكواليس منتظره دوري,أما كان حتة قلم ,شوفتوا بقى مليش لزمه ,أصلا أنا كنت هأقول كلمه واحده والله أنا حتى دلوقتى مش فاكراها
أنا مالليش فى التمثيل يبقى ليه لازم أمثل
أنا ماليش فى الخياطه يبقى ليه لازم اخيط
أنا ماليش فى الكوره يبقى ليه لازم أحكم
أنا ماليش فى الهزار يبقى ليه لازم أستظرف
أنا ماليش فى..........يبقى ليه لازم........
المهم في النهاية تكونوا تعلمتوا من غلطتي


ومين بقى اللى هيقول لا تفعلوا مثلي 4