وقالوا عليك إنَّك زعلان

قلبك دامي وكمان حزنان

دايخ م التوهة والنسيان

وقالوا عليك عيونك دامعة

حزينة وخالية من اللمعة

نفسك م الدوّامة مش سامعة

نبض قلبك وصوته العالي

دا لوحده ليلاتي يعاني

وقالوا عليك إنَّك مقهور

إزاي وأنت يا غالي صبور

دا العقل بصبرك مبهور

وشك بدر ومليان نور

اوعاك تعيش مقهور

اوعى تحسّ إنَّك مغمور

اذكر ربّك تكون مذكور

وقالوا عليك إنَّك غلطان

علشان عايش إنسان

قلبك، نفسك، إنسان إنسان

سيبك منهم وخلليك

امسك في حلمك بإيديك

وعلى اد سعيك ربّك هايدّيك

وقالوا عليك إنَّك زعلان

إلجأ يا غالي للرحمٰن

دا مالكش غيره يا إنسان

وبلاش تسمح لحدّ

إنّه يحطّم فيك ويهدّ

اقفل باب السلبي وسِدّ

وابني ما بينكم حيط وسَدّ

شِدّ حيلك قوم وعافر

اسرح بخيالك وسافِر

جدد أملك يا معافر

دا أنت باليأس كافر

وقالوا عليك إنَّك زعلان

قلت سيبوه في حاله

مالكم أنتوا وماله

بعيد عنكم هايكون فرحان.