دكتورة مادة الأدب الالماني اللي بتدرس لبنتي في الجامعة ست جميلة جدا 

هي عارفة ان المادة بتاعتها تقيلة وحقيقي بنتي من اول السنة بتشتكي، من صعوبة المادة

فالست كتربوية وام وانسانة عندها ضمير قررت انها تكتب بايدها نوتس لكل الدفعة

مليانة كلام داعم وادعية وكلام حلو

وكمان جابت حاجات حلوة ليهم 

اللي بهرني انها كتبت بخط ايدها لدفعة كاملة 

هي دفعة بنتي قسم الالماني مش كتير بالمعني هما حوالي ٣٠٠ طالب وطالبة 

لكن الدكتورة كتر خيرها كتبت اكتر من الف ورقة وضيعت من وقتها ومجهودها 

والصبح اول المحاضرة وزعت عليهم النوتس دي ولقيت بنتي نشراها حالة ع الواتس 

وبعديها بشوية ادتها نوتس تاني لانها جاوبت 

ودا كان اثره ايجابي وعظيم ع الولاد

لقيت شاهي وصحابها ناشرين وكاتبين ان دي كانت اجمل محاضرة وانهم فهموا وجاوبوا وانهم بيحبوا الدكتورة بتاعتهم 

اوي 

وكان الاجماع انهم النهاردة اكتر حاجة فرحتهم ان الدكتورة بشوشة وبتضحك وكانت بتعيد الحاجة مرة واتنين وتلاتة ووزعت النوتس، وفتحت نفس الولاد 

ودا يخلينا نفهم ان اي صعوبات ف العموم البشاشة واللطف والدعم قادر يدوبها

خالص حبي واحترامي للدكتورة ولاي وكل انسان عنده ضمير ومحبة واخلاق