كان ياما كان

كان بابا بيديني جنيه

وعمري ما قلت اعمل به ايه

كنت اجري بيه الصبحية

اجيب فطار للعيلة

ب ريال فول والباقي طعمية

ناكل ونشبع ع الطبلية

وبعدها العيلة فريقين

فريق بيشرب شايه سادة

والتاني يزود له حليب

لا كنت عمرك تحسبها

ولا شغلك في كام في الجيب

اصل الخير كان مالي البيت

فرن الطين ابو جاز وحمّية

ريحة خبيزه قالبة البيت

تاكل منه لقمة هنية

وبعد العيش الله 

ع ريحة البطاطس في الصنية

ورز معمر جوة الفرن 

والسمنة البلدي مغرقاه

وقت الغدا في لمة العيلة

تاكل وتقول الله الله

الخير كتير والعيشة بسيطة

والبركة في لمة العيلة

والبيت بالحب كان عمران

والدفا مش أصله بالحيطان

الدفا كان في القلب الأبيض

اللي ميعرفش غير أنه يحب

ولا كان يفرق ابن عمي من اخويا

ولا مين عمي ومين ابويا

كلنا واحد قلب واحد

ويا سلام ع لمة العيلة

بعد العشية

والفرجة في الأبيض والأسود ع التمثيلية

وبعد منها حديث الروح

وبعدها نشرة ٩ دي كانت عند الكبار غية

واحنا الصغار متجمعين نلعب سوا ومبسوطين

ياريتها دامت أجمل سنين لما كنا صغيرين

في حضن العيلة متجمعين.