ليه إحنا أولياء الأمور بنكمل تعليم أولادنا بالرغم من اننا عارفين ان النجاح المالي مش ضروري له خالص النجاح الأكاديمي 

الأول و قبل ما أبدأ ضروري تفرق بين النجاح الأكاديمي و بين التعلم 

التعلم عملته حد زي سوزي الأردنية … بتحاول تطور من نفسها فبتروح تركب اكستنشن لإنها إتعلمت ان المظهر ضروري لقبول الناس ليك 

بتروح تعمل ميكب عند ميكب آرتيست عشان تظهر بشكل لطيف فيحبها الناس و منه تعمل اعلانات فتحيب فلوس 

بتتعلم كل يوم حاجة جديدة عشان تفضل على قمة السوشيال ميديا و تطور من نفسها عشان ترضي متابعينها

بغض النظر عن كلامها اللي بيتقال في ڤيديو و يسيح في الفيديو اللي بعده و اللي مبقاش حد بيحاسبها عليه لأنه في المعظم هرتلة 

و لكنها شاطرة و بتتعلم 

بتتعلم تتلون و تقولك كلام يريحك حتى لو هي مش فاهماه ولا مقتنعة بيه، بتتعلم تغير الكلام و تأيفه باللي يخليك ترضى عنها و تعملها لايك و شير ، بتتعلم ان تلقائيتها و عاطفتها الأوڤر و انبهارها الدائم بيغذي الايجو بتاع الناس من حواليها فبتنجح  

هل هي عاملة إستراتيچية للنجاح ده 

لأ معتقدش خالص 

هي مجرد بنت مجتهدة و محتاجة للقرش و ده اللي عملها قيمة في وسط مجتمعها فطبيعي تمسك فيه بايديها و سنانها … حتى لو في الحقيقة خرب كل الأصعدة التانية في حياتها 

و بالمناسبة هي محظوظة نوعاً ما لإنها في مقتبل العمر فمتعرفش الأصعدة التانية دي اللي هي ايه أصلاً

——————-

كده يبقى عرفنا ان التعلم و ان النجاح المالي دي كلها حجات ملهاش دعوة بالتحصيل الأكاديمي

أمال إيه لازمة التحصيل الأكاديمي بقى ؟ 

لازمته و فايدته ببساطة هو انك متحتاجش للقرش للدرجة اللي يخليك تبيع نفسك و مبادئك و أخلاقك و قيمك و اللي ترضاه ليك و لعيالك  

لازمته و فايدته ببساطة هو ان القرش هو اللي يجري وراك مش انت اللي تتحرك و تجري وراه كأنك مربوط في ساقية 

لازمته و فايدته ببساطة هو الشبع النفسي و الثبات و التأكد

مش أكتر 

مش أكتر ؟!!!!!! 

آه مش أكتر 

و لو شايف ان دول شوية، حاول تسأل حد مكملش تعليمه و دايماً هتلاقي جواه حتة ناقصة حاسس انه لو كان كمل تعليمة مكانتش هتبقى موجودة 

الحتة دي متعلقة تماماً بالنفسية  

إنما الواقع ان كلنا بنتخرج نشتغل في شغلانات مختلفة عن الشهادة اللي أخدناها و اللي مننا بيشتغل بشهادته بيقبض ملاليم

فالتحصيل الأكاديمي بيعلمك مهارات لو عرفتها سوزي و إهتمت بيها هتبقى في يوم ما سيدة مجتمع مش البنت المقهورة المبهورة.