من زمان كنت عاوزة اكتب عن تجربتي مع العفاريت
ما حدش يضحك او يقول اني مجنونة
انا مش بهزر
بجد الى خلاني اكتب عنهم زميلي في العمل
سالني لماذا تركت المكتب
لم اجد غير هذا الرد التلقائي لانه هو الحقيقي
لان المكتب مسكون او فيه حاجة غريبة
زمان اي حد يتكلم عن العفاريت كنت بخاف وبس لكن لم اتوقع ابدا ابدا ان اعيش في مكان به عفريت ونعيش في سلام كاننا اصحاب

ههههههههههه
والله انا بكتب دلوقت الموضوع ده ولو قريته من حد كنت قلت دا بيخرف على المسا
لكن تعالوا اقولكم ايه الى حصل وانتم تحكموا
فى البداية اجرت مكتب صغير مع صديقة لي وبدانا العمل
المكتب عبارة عن جزئين منفصلين كلا بباب منفصل وهناك طرقة خارجية بها مدخل للجزئين وحمام مشترك
كنت كثيرا اجلس لوحدي بالمكتب واقوم بغلقه
ولكن كنت اتخيل ان هناك شخص او شبح يمر فى الطرقة التى امام الباب الحديد
كنت بقول لنفسي دا تهيوئات وبالذات لاني بخاف يعني جبانه جداااااااا
المهم وبعد فترة لو حد دخل الحمام نلاقي باب الحمام اتفتح مرة واحدة بسرعه رهيبة
وطبعا الى جوا الحمام يفتكر ان حد بيهزر هزار سخيف
ويقوم يقفله
وكلما ذاد عدد الاشخاص فى المكتب وحصل دوشة
نلاقي اشياء غريبة بتحصل
لحدد ما شفته بسلامته
كنت قاعده على مكتبي وزميلتي فى الغرفة التانية
قمت اسالها نتغدي ايه
وحسيت بشيء ثقيل جدااااااااااااا ورايا بيتحرك
ما لمسنيش بس شفت هيئة انسان هيئة فقط طويل واسود لم ار اي ملامح
ولكن جسمي كله اترعش فى اللحظة دي
الباب الحديد كان مفتوح
افتكرت حد عدي ودا خيالة
فخرجت اشوف فى ايه لم اجدي اي اثر
والمفاجاة انى لما حكيت الكلام ده لصاحبتي
لقيتها بتقولى انها شافت الى انا شفته ولما بتبقي وحدها بتشوف كدا
المهم يا جماعه انه كان متضايق مننا كل ما نعمل دوشة او صوتنا يعلى يظهر ونحس بيه بيتحرك فى المكتب رايح جاي
بس بصراحة ما هواش مؤذي ولالا حاجة
ههههههه
انا بحكي لكم الموضوع وانا مش قادرة اصدق لحد دلوقت انى الى شفته حقيقة
طبعا وفى مرة كانت الساعه 8 بليل كنت لوحدي
وانا خارجة من المكتب وبقفل الباب الخارجي لقيت باب الحمام اتهبد على الحيطة
بس والله لا يوجد اي تيار هوا ولا حاجة لان كل الشبابيك مقفولة لكن الباب اتهبد كان حاجة كانت منتظرة انى امشي عشان ياخد حريته
ههههه
طبعا مش مصدقيني
وانا نفسي ما كنتش مصدقة
كنت بقول دا تهيؤات وانا تعبانه نفسيا او حاجة كدا
لكن ما كانش عندي شجاعه كافية للاستمرار
فتركت المكتب
وبعد شهرين كنت بزور اصحابي فى المكتب الى تحت منا فى نفس العمارة
وكانوا بيتكلموا عن الدور الى فوقهم ومن ضمن المكتب الى انا كنت فيه وانه اتاجر بعد ما سبته وحكوا ان كل الى كانوا فى الدور العلوي سابوا المكان لانهم حاسين انه مسكون
طبعا صحابي دول ما يعرفوش قصة ريتو صاحبي قصدي العفريت الى انا شفته
وانا ساعتها قلت الحمد لله يااااااااااااه اخيرا ارتحت دا انا كنت رايحه لدكتور نفساني لانى حسيت انى اتجننت وبتخيل حاجات
طبعا نسيت اقولكم انى بحب قوي اقرا كتب انيس منصور بتاعت القوي الخفية وارواح واشباح
لكن بجد كانت اول مرة اشوف شبح
وفضلت تعبانة لمده شهرين لحد ما اكتشفت ان الى شفته كان حقيقي مش وهم ولا تخيلات
ربنا يجعل كلامنا خفيف عليهم
اشتاتا اشتوت
بس الي ضايقني انى ليه ما صاحبتوش مش يمكن كنت علمته اتوكاد او ماكس وكان زمانة ابدع فى العمارة مين عارف
انا قصرت بجد مع ريتو يا جماعه
حد يقوله يسامحني
بجد
ضيعت منه فرصة عمل وشهرة لانه اكيد كان هيبقي شاطر
يلا بقي زمانة سعيد بالهدوء الى هوا فيه دلوقت
يا بخته
ومن ساعتها وانا بدور على عفرت جديد اشتغل معاه
قصدي بدور على مكتب جديد لابدا العمل
ولكن بدون عفريت
تحياتي وامنياتي لكم بعدم النوم