أرقى درجات السلام النفسي هي إنك تعيش وحيد مع نفسك متفاعل مع الناس

تتعامل وتتفاعل وتركز وتشتغل وتخرج وتذاكر وتزود مهاراتك وتشوف كل اللي حواليك بعين المتفرج .

تتعاطف مع أزمات ومشاكل اللي حواليك وتساعد في حدود قدرتك النفسية 

متحملش نفسك اكتر مما تحتمل، وممكن تحتمل كتير أو قليل لأن درجات الاحتمال بتختلف باختلاف الطبائع

لكن متجيش على نفسك لأن ده بيستتبعه ندم أو إرهاق نفسي أنت في غنى عنه

تستقبل الأحداث برضا وروية وتتخلص من الأسفنجة اللي جواك واللي بتشفط كل المؤثرات لحد ما تتملي وتبقى مش قادر تقوم حتى بمهامك الشخصية الضرورية

ده بيتطلب استقلال مادي وفكري ونفسي علشان تقدر تكمل.

محدش أهم من نفسك ودي مش أنانية لأن استنزافك لنفسك مش هتجني من وراه غير مزيد من الانطواء والانفراد والوحدة

لو حسيت ان اللي حواليك عبء عليك

و مش معنى كدة انك تتخلى عن مسؤلياتك الشخصية تجاه الناس المهمين 

لكن معناه انك متزودش على المهام دي وتكلف نفسك بمسؤليات متخصكش

تاني

ساعد في حدود امكانياتك النفسية وقدرتك على التحمل

علشان تكون جزيرة سلام لنفسك وللي حواليك