= كل الهجوم اللى حصل على فدوى مواهب تركز على شغل والدتها وان والدها من اصول سورية وهل بناتها محجبات ام لا !!! ... محدش من العلمانيين تحقق من صحة ما قالته ... محدش تعب نفسه وعمل سيرش على جوجل (هل يجوز للبنت تقعد بهوت شورت امام امها ده على اساس ان كل مشكلة بناتنا الهوت شورت) محدش منهم عمل سيرش على العورة والعورة المغلظة .. وانها لا تكشف الا على الزوج او الزوجة فقط ... محدش قرأ عن الفرق بين الدين والشرائع ... تعالوا نناقش صحة ما قالته .. ولو قالت حاجة غلط تعالوا نصححها لها انما هجوم شرس فقط على اصولها وصلت لحد تقديم بلاغات للنيابة فهذا هو قمة العبث والعجز.

= قصة بيع بنك القاهرة وقبلها عشرات الوقائع التي تزكم رائحة فسادها انوف الكوكب كله لا يمكن ابدا ان تحدث لو عندك برلمان حقيقي بيمثل الشعب او عندك صحافة حرة .. وللاسف انت حاليا تفتقد الاتنين ... توقع استمرار هذه المساخر حتى تحقق احدهما على الاقل ... الديمقراطية والحكم المدني الرشيد ليس ترفا بل ضرورة .. وايوه جايه جايه ... وايوة #هانت 

= دراما رمضان ليست مجرد شوية مسلسلات بتسلى الناس .. لا دى وسيلة فعالة جدا لزرع الافكار وبناء او هدم القيم والمبادئ للاجيال القادمة .. لذلك هي اخطر من ان تتركها لشوية مفسدين ينشروا افكار البلطجة والرقاصات او اظهار ان مصر عبارة عن كومبوندات وعشوائيات فقط .. مع ان اغلب مصر هى احنا الطبقة الوسطى اللي بتكافح حتى لا تنزلق اكثر واكثر لخط الجوع وليس الفقر .. وشوفنا قد ايه الجمهور متعطش للاعمال المحترمة والهادفة زى برنامج سامح حسين اللى اتعمل باقل الامكانيات.

= رفع اسعار البنزين والسولار والغاز المتوقع قمة الاستخفاف بالشعب .. انت بتحسب السعر اللى بتبيع ليا المنتجات على اساس سعر النفط العالمي .. طب ليه متحسبش الجزء من النفط والغاز اللى مستخرج من ارضنا بسعر التكلفة بتاعته اللى هي اقل بكتير من سعره عالميا ... هو ده مش بتاع المصريين والمفروض ياخدوه بسعره مش تكسب منهم وتقول انك بتدعمهم؟ يقولك ده تكلفة الفرصة البديلة لو كنت صدرته كنت حكسب !! 

النقطة التانية انت اصلا بتحصل اعلى جمارك في العالم على السيارات لمجرد انك تسمح بدخولها مصر (بعض الفئات الكبيرة بتاخد ضعف ثمنها لمجرد انك تعديها من الجمرك) وعشان كده سعر اى سيارة في مصر اغلى من سعرها في كل الكوكب.