زعلان من التبويخ ؟
سقَّفت للباطل لما عَلَاَ استفحل
سقَّفت بالكفين وصرخت ليه يااهبل
فاكر علاه هيدوم ؟ وقوّته هاتفضل
طب كنت بتفكر ؟ وللا نسيت تسأل
ما قريتش ليه التاريخ ؟.
...............
بيضت وجه الظلم
والعدل ليه تسود
متقولش ده كان حلم
ولا أصلى متعود
لو عاده بطل بقى
وفى الديون سدد
.............
الحق موسى النبى
ف تابوت على الميه .
فرعون بقى الباطل
وعروشه ع الميه .
موسى و ربك معاه
هوا اللى يتولاه
يحميه من الميه
فرعون مكذب عصاه
وهامان وزيرُه معاه
تهلكهم الميه
عرفت ايه هيه ؟
.............
الحق يابن الناس
مهما ضعف قوِّيه
بس احنا بنسقف
للظلم و نعلِّيه

.............
فاكر زمان صهيون
لما استباح سينا؟
حرقوا الزتون والتين
واغتالوا اهالينا ؟
وهجروا التانيين
م الصحرا للمينا ؟
لو يومها ماوقفناش
كان حالنا يبقى ازاى ؟
...................... .
ايوه احنا ناس سَكه
لا حرروا فلسطين
ولا غاثوا يوم عكا
أمه وعاشقه النوم
واخده الفراش تِركه
يورثها جيل ورا جيل
مغزوله و بحِنكه
يا أمة المليار
يا مفرقه الفُرقه
فوقوا كفاياكوا دمار
والنوم ف جوف بِركه
كافى بقا استهتار
من مطرقة 👈لخِرقه