-مها..انتى عملالنا إيه ع الفطار النهاردة؟

-إيه ياعماد دى تالت مرة تسألنى السؤال ده،وقولتلك عامله فراخ ورز وباميه ..قلتلى اعملى صينيه رقاق جنبهم،ورجعت وقلتلى اعملى ملوخيه..عاوز ايه تانى؟

-لا ياحبيبتى بس اعمليلى حبه فاصوليا جنبهم وطبق بطاطس صغير،وإوعى تنسي السلطة

-فيه إيه ياعماد هو آخر زادك..ليه الأكل دا كله؟

-يا ماما أنا صايم عارفه يعنى إيه صايم..هاه وإيه أخبار الحلويات؟

-حلويات!! كمان حلويات ..ياعماد حرام عليك أنا زهقت من وقفه المطبخ ..تعالى ساعدنى شوية 

-يابنتى أنا صايم وتعبان ..طاب أقولك هاتى اعملك السلطة 

-إيه السلطة بس؟؟ إيه النغمه الجديدة دى ياعماد؟

-وربنا صايم وتعبان..دا كفاية حرقه دمى فى الشغل طول النهار..إيه الخضار الكتير اللى بتقطعيه ده؟

-دا عشان شوربه الخضار بتاعتى

-أنا مش عاوز شوربه خضار بتاعت العيانين دى ..أنا عاوز دسم..فاهمه يعنى إيه دسم..لازم آكل كويس عشان أعرف أصوم بكرة

-ياحبيبي الأكل فى رمضان مش بكُترُه ..أقولك كُل معايا شوربه خضار وسلطه وطبق رز صغير ..دا أكل صحى ..مش هيتعبك خالص

-إيه أكل صحى !! ليه أنا عيان زيك؟

-هو أنا كده أبقي عيانه؟! إنت حر..انا مش هعمل حاجه تانى..المطبخ أهه والأكل عندك ..أنا تعبت خلاص

-لأ عيب عليكي أومال مين اللى هيعملى اللازانيا اللى بحبها؟

-أووووف. صبرنى يارب

-طاب هو المغرب قرب؟؟

-سألتنى السؤال ده ستين مرة ..روح نام وللا اعملك حاجه..روح من وشي دلوقت ياعماد

وبعد قليل

-عماد..انت بتهبب إيه؟

-إيه ياحبيبتى بآكل هو مش المغرب أدن..أنا صحيت لاقيته بيأذن فى التليفزيون

-مغرب إيه يخربيتك دا مش آذان مصر

-يعنى إيه؟ كده أنا فطرت؟ وانتى بتشغلى قنوات مش مصرية ليه..انتى مبتحبيش مصر

-انت اللى متلكك..مش تستنى آذان الجامع..إنت مالك مسروع على الأكل كده ليه؟

-وانتى بتحطيه بدرى ليه؟؟

-هو أنا لو إتأخرت تزعل ولو حطيته بدرى تاكل زى المفجوع

-طاب أعمل إيه دلوقت؟

-وأنا إيش عرفنى أقعد بقي لمانشوفلك فتوى..ايه ده؟ انت هتكمل أكل ..طاب على مهلك شوية الأكل الكتير دا هيتعبك

-خليكى فى حالك

-طيب ياعماد هخلينى فى حالى

وقبل السحور

-ياعماد..عماد..كل دا نوم ..كل ما أدخل ألاقيك بتتشقلب شوية على جنبك اليمين وشويه ع الشمال وشوية على وشك ..إنت تعبان وللا إيه؟

-أنا...لأ خالص

-أومال مالك نايم وبتتقلب من ساعه الفطار كده ليه؟ 

-أقولك الحق..عندى مغص جامد ومش قادر آخد نَفَسي من ساعه الفطار وحاسس بسكاكين بتقطع فيا..إتصليلى بالدكتور

-دكتور!! انت خليت فيه فلوس فى البيت للدكاترة ما كله رايح ع الأكل من أول رمضان،وأنا قادرة عليك ..عمال تحشر فى الأكل..دا انت قربت تاكلنى..خد دراعى أقطم فيه ياعماد لتكون لسه جعان

-آهو أنا مكنتش عاوز أقولك من الصبح عشان لسانك اللى متبرى منك ده

-أنا لسانى متبرى منى..طاب استنى عليا

-هتعملى إيه ؟ وإيه اللى فى إيدك ده؟

- دى شَربه زيت خروع ودى شَربه ملح..هتاخدهم ورا بعض ..عشان تخف ياحبيبي

-بلاش يامها والنبي ..مبحبش الحاجات دى..هاتيلى دكتور

-أنا اللى هعالجك ياروحى..هو أنا فاضيه أجرى ع المستشفيات ..عشان تبقي تتأمر تانى،وإيه رأيك هتاخدهم عافيه

-بلاش وحيات ابنك..بلاش...لأاااااه

****يتبع****

#سهير_عسكر