عماد: مها يا مها....فين البنطلون الكحلى عاوز اخرج وارجع قبل الحظر...انتى ياللى اسمك مها

مها: ايه ياعماد بتزعق ليه..هتصحى البنت وانا منيماها بالعافية..وطى صوتك شوية

- طيب..فين البنطلون الكحلى؟

- ايه ؟..عَلِى صوتك شوية..مش سامعه

- يوووووه

- ايوة يا ماما دا عماد بيدور على بنطلونه علشان خارج...اقفلى وشوية واكلمك...ايه ياعماد فيه ايه؟

- الله ..ماانتى سامعه أهه

- ايوة يا أخى سامعه..بس كنت بكلم ماما ومش مركزة

- انتى على طول مش مركزة ...فين الزفت عايز اخرج؟

- ماقلنا وطى صوتك..البنطلون فى الغسيل

- بينيل ايه فى الغسيل؟

- مغسلتش ياعماد ..ايه جريمة يعنى؟

- طاب فين الاسود؟

- عايز يتكوى

- طاب فين الابيض

-وانا ايش عرفنى ..انا هحرسلك هدومك..تلاقيه ملقح هنا وللا هنا..اوعى بقي عشان اللحمه هتشيط..ومتنساش تعدى على الجزار وتقوله يستنضف اللحمه اللى بيبعتها وللا اروحله انا

- لأ..إلا كده...أنا اللى هقوله

- انت بتغِير ياروحى

- أغِير دا ايه..انا مش عايز فضايح..هو أنا مش عارف لسانك

- كده ياعماد...طاب اخلص بقي قبل معاد الحظر وهاتلنا جوانتيات وكمامات معاك 

- ما انا لسه جايبلك امبارح

- العيال لعبوا بيهم و قطعوهم

- وانتى كنتى فين يا هانم؟

- انت هتقف ترغى كتير والأكل هيتحرق

- طيب انا ماشي..عايزة حاجة تانية

- اه ..هات لبن وبامبرز ..وزبادى للسحور وفول و...و. ...اه...ورز ومكرونة ...وعيش فينو...وسمن وزيت ...وكنافه...و

- ايه..حيلك ...كل ده ناقص...اومال انا بجيب ايه كل يوم؟

- احتياطى محدش ضمن الظروف

- طيب..انتى هتعملى ايه ع الفطار النهاردة؟

-فيه بواقى أكل من امبارح

- ميت مرة اقولك مبحبش الأكل البايت

- وانا مليون مرة قلتلك ان الظروف صعبة دلوقت ومحدش عارف بكرة فيه ايه؟

- حااااضر...اللى تشوفيه ..اوعى بقي خلينى ألبس.كان يوم اسود يوم ما اتجوزت

- بتقول حاجة ياحبيبي؟

- لا ياحبيبتى بقول فين البنطلون الاسود

- أهه ياقلبي

- ايه ده؟...دا مبقع...دا مغسول ده

- ايوة مغسول بس بنتك بقي اكلت زبادى ومسحت ايدها فيه هههههه

- انتى بتضحكى...بس فالحة تقرفينا بالكمامات والكلور والديتول ودروس النضافة وسايبة البت تمسح ايدها فى بنطلونى

- انت بتزعق ليه؟ هو حصل ايه يعنى...انت هتذلنا عشان نازل تجيب الطلبات ..انت رايح السوق مش رايح تتفسح

- يعنى انزل مبهدل

- بقولك ايه.. هروح انا واقعد انت مع العيال

- يكون احسن برضه

وبعد قليل

عماد: ياواد بطل ضرب فى اختك...بس ياحبيبتى تعالى ل بابا تاكلى زبادى ...لأ...طاب تاخدى الرضعة ...هات ياواد ياعمر الببرونة من عندك. ..يييه دا اللبن بارد ..لما اقوم اسخنه..ايه الريحة دى؟! ..اووووف ..انتى عايزة تغيرى ..فين يازفت البامبرز ؟ أمك حطاه فين؟ ياواد رُد عليَّ..أقوم أدور أنا..أنا عارف أمك إتأخرت كده ليه؟

وبعد اربع ساعات

عماد: حمد الله ع السلامة ياهانم ما لسه بدرى

انتى ماصدقتى خرجتى من البيت..دا السوق جنبنا

مها: اسكت ياعماد ع اللى حصل؟

- ايه إتخانقتى؟

- وانت عرفت منين؟!

- هو انا مش عارفك، واتخانقنتى مع مين بقي ان شاء الله؟

- الاول مع الجزار وشتمنى شتمنى ياعماد ..تصور؟!

- هو انتى قلتيله ايه الأول؟

- بقولك شتمنى تقولى قلتيله ايه؟

- ما انا عاوز افهم الأول

- أبداً مقولتش

- ايه شتمك كده من غير مناسبة؟!

- لأ..انا بس قلتله لحمتك وحشه

- وايه كمان؟

- و....و حرامى و...وانى هبلغ عنه الصحة..دا بيغلى سعر اللحمه ويستغل الأزمة ...تصور...انت مالك كده ولا كأنك سمعت حاجة؟!

- يعنى عاوزانى اعمل ايه؟

- تدايق..تزعل..تروح تتخانق معاه

- ماهو أنا مستنيكى تكملى علشان انزل بالمرة ...ومسكتى فى خناق مين كمان؟...هاه....إبهرينى

- أبداً والفكهانى ....وبتاع الخضار ...و.... وواحد كده كان واقف وبيضرب فى بنت صغيرة ...بس إيه بهدلته..و....فى الآخر طلع أبوها....و......عماد...ياعماد انت نمت وللا ايه؟

- هاه...لا...معاكى ..وبعد ما البنت ضربت بتاع الخضار حصل ايه؟

- بنت مين اللى ضربت بتاع الخضار بقولك راجل كان بيضرب بنته....عماد...انت نمت تانى 

- بصى...انا هنام شوية ...وابقى صحينى بعد العصر 

- تنام دا ايه ؟ دا بتاع الخضار والفكهانى جايينلك دلوقت ياخدوا حق الخضار والفاكهة اللى بعزقتها فى الارض

- نعم ياختى...انتى مش اتخانقتى وبس..كمان رميتى حاجتهم ع الأرض

- اه ...يعنى عاوزهم يقلوا ادبهم عليَّ واسكتلهم

- لا وتسكتى ازاى...ميصحش..لازم تعمليلى فضيحة..ميت مرة اقولك بلاش تتهورى

- يعنى عاوزنى اسكت على جشعهم و غشهم للناس...دول بيستغلوا الأزمة ويزودوا فى الاسعار وبيغشوا فى الميزان كمان

- وانتى مالك...ما زيك زى الناس...مش عاجبك متخديش

- عماد...انت جبان وسلبي

- وانتى قليلة الأدب...ولسانك طويل

- كده ياعماد...طاب ايه رأيك بقى انى قلتلهم انك شغال فى الداخلية ..وانك هتلبسهم قضية وتعتقلهم..وطلعلى واحد فى وسط الزحمه وقالى انه من حقوق الانسان وطلب اسمك وعنوانك

- يخربيتك...وعملتى ايه؟

- طبعاً إديته اسمك وعنوانك...تلاقيه عيل نصاب..هو فاكرنى هخاف

- حسبي الله ونعم الوكيل فيكى يا بعيدة...اشوف فيكى يوم...والله ما انا قاعدلك فيها

- عمااااد ياعماد...اومال مين هيساعدنى فى الفطار ؟! انا جايه تعبانه من السوق..ياعمااااااد

*****يتبع***