مش مسيطرة لأ 

كل ما حد يسألني يعني يا آيه بعقلك و دماغك دي في حياة راجل مش بتسيطري ! 

الله يمسيها بالخير جدة عيالي بردو كانت تقوللي ده انتي بتاعت علم نفس يا آيه ! 😅

—————

 السيطرة في حد ذاتها عمرها ما كانت شئ ملهم بالنسبالي 

بالعكس ! 

بحس اني بفقد جزء كبير من أنوثتي و انا بعمل ده 

و عادة على مدار حياتك لو شايل مسؤولية نفسك فانت بتكون مسيطر معظم الوقت 

فيوم ما أكون تحت جناح راجل بدل ما يشيل مسؤوليتي ! أكمل سيطرة !!! 

ده الواحد ما بيصدق يلاقي كتف يسند عليه !!! 

——————

يعني انا مثلاً عمري ما كنت الست اللي بتمسك مصروف البيت 

أصلاً فكرة ان دي مش فلوسي بتخليني تلقائي اللي هو جيب اللي تجيبه و ترتضيه و انا هعملهولك 

لا بتناقش ولا بفاصل 

بشوف ان ده حفظ حقوقي بشكل كبير جداً سبحان الله ! 

—————-

في مرة ليندا بتقولي قولي لأحمد لو عمل في اوضته كذا هتكافئيه و لو معملش الكذا ده هتعاقبيه 

قولتلها جميل ! بس انا لو عملت كده المرة دي .. ده ميضمنش ان يبقى قلبه على اوضته و بيعمل ده بدافع المسؤولية 

فقولت لأحمد … انت كل الامتيازات اللي أخدتها في البيت ده انت اللي طلبتها وللا انا اللي بديهالك ؟ 

قالي انتي بتديهالي 

= بديهالك ليه ؟ 

- مش عارف 

= عشان انا واثقة فيك 

- …….. 

= و حابه بصراحة تكون اد ثقتي فيك عشان مبعرفش أعيش مع حد مش واثقة فيه 

من بعدها و بقى في احساس بالمسؤولية نوعاً ما مكانش موجود خالص قبل الكلمتين دول .. و بيتحسن 

————-

ف لا يا جماعة انا مش بسيطر ولا بحاول أعمل ده في نطاق حياتي الشخصية أبداً حقيقي ! 

مهما دفعني المجتمع ل ده 

و مهما ناس حاولت تدخلني في صراعات ل ده 

لأن الكسبان نفسه كسبان كتير 

و محدش هينفعني لما أفقد أنوثتي و اعيش دكر في كل تفاصيل يومي ! 

كفاية الشغل بجد و الله !