ليه الستات بتفضل جواز البارت تايم أكتر من الرجالة ؟  

١- البيت اللي فيه راجل بيت مشغول طول اليوم و له مواعيد ثابتة و ده بيخلي عندها روتين لو طلعت منه اليوم يبوظ 

فغالباً بتتفرغ للجواز طول اليوم كل أيام الأسبوع … و الجواز هنا مش مقصود منه الراجل و لكن المسؤولية 

يعني حتى لو هيرجع البيت لمدة ساعة واحدة بس فضروري تكون كل حاجة في مكانها و في غدا موجود في البيت و له نصيب متشال و شغل البيت كله معمول و على ما تخلص اللي وراها بيكون اليوم كمان خلص و طاقتها كمان خلصت فبتقعد في البيت و تكنسل الخروجات و السفريات و تلغي الزيارات و تكنسل الفرص 

٢- فرصتها أكبر انها تكون حاجة مستدامة الى جانب الحياة الزوجية و ليكن كاريير أو أنشطة مهارية أو أنشطة خيرية و تكون إجتماعيات مختلفة عن النوع ده من العلاقات

٣- بتحس بأنوثتها عشان عارفة إنه بيكون موجود عشان عايز يكون موجود مش علشان ده البيت و كده كده لازم يرجع

٤- بتريح جسمها و أعصابها من الشدة النفسية تجاه المسؤولية و تفاصيلها 

٥- عندها فرصة تلجأ لأطراف تانية تساعدها في شيل الأطفال زي الأهل و الصحاب غير الراجل اللي بيكون معظم اليوم في شغله 

٦- بتظبط وضعها و شكلها و تفاصيلها قبل ما تقابل زوجها و ده بيخليه يحس انها متغيرتش بسبب المسؤولية 

٧- بتحافظ على مشاعر الاشتياق لرؤياه و بتكون محوشة مجهود محترم تبسطه بيه في الوقت اللي هما فيه مع بعض 

٨- كواليتي التعامل بينهم بيكون مختلف لما بيرجعوا لبعض في اوقات معينة دون غيرها عشان مثلاً بتكون عارفه انه بيكون عايز يتكلم فهي بتعرف تسمعه بإنصات مش بتسمعه و كل شوية حد يقاطعهم أو و هي مشغولة و بتعمل حجات للولاد و كده 

و هو كمان بيركز في تفاصيلها و بيساعد عشان عايز يشيل عنها بحب و مزاج مش عشان متعود ان ده الروتين و لازم يعمله

فالاتنين بيحسوا ان قلبهم على بعض بجد مش انها علاقة و سايرة و خلاص. 

٩- مساحة الحرية الموجودة بينهم بتحافظ ع الاحترام متبادل طول الوقت عشان الاتنين عارفين انهم بينضجوا 

غير الموجودين سوا أوقات ييعيقوا عملية النضج لبعض نتيجة مشاكل نفسية أو مادية و غيره.