انا قلبي طير من غير جناح
عايش وحيد وسط البراح
شارد لفوق وسط السحاب
هايم شريد زى الغريب
ياقلب ليه عايش وحيد
رافض تكون عايش سعيد
انسى اللى فوق وعيش هنا
على أرض زحمة وسط البشر
لا انا احب اعيش بعيد بعيد
عن البشر وقهر البشر
ظلم البشر شر انتشر
ياريت اعيش دايما وحيد
طير وحيد بالف ايد
وريش جميل على الجناح
زى الحمام فارد الجناح
وسط الغيوم اطير لفوق
حبة مطر تنزل قوام على الجناح
تغسل ريش الطاووس
طيب ازاى وانت منحوس
عهد المطر. ولى وراح
ارجع وعود من البراح
وانسى قوام كل اللى راح
ياقلب ليه عايش حزين
بجناح كسير بالف لون
ألوانه باهته بدون روح
قلبك حزين مليان جروح
عا الأرض يوم لازم تعود
واختار طريق مزروع ورود
حاول تعيش وسط البشر
بقلب ابيض من غير شر
انسى الاهات ويا الدموع
تنسى الزمان والمكان
وعيش يومين فرح وهنا
يمكن جناحك يعود سليم
وانسى السحاب ويالغيوم
ازرع زهور بالف لون
لون الحياه وردى وجميل
يابو قلب اخضر كما عود ريحان
ياعم نام بلاش جنان
يمكن تشوف حلم جميل
مع الحبيب وتعيش سعيد
تصحى على صوت البشر
تندم على انك صحيت
صحيت على صوت البشر
تهرب قوام تانى لفوق
وسط السحاب والغيوم