ابني الذي يربيني

🔻: بقلم: فيروز أكرم القطلبي; ◀️: مدونة فيروز القطلبي; وثق بتاريخ: 24-07-2022; الزيارات: 452

مابعرف المعيار المحدد للأمومة ...بس بعرف كل مدارس التربية بحكم يعني دراستي لدبلوم التأهيل التربوي واطلاعي وهيك ..

وقت كنت حامل بابني... يالله شو هيك خططت لطريقة تربيتو وأسلوب التعامل وقلت خلص رح كون الام المثلى.. ورح تنحكا بتربايتي ..

ولكن ولأنو الواقع غير الحكي.. ابني ياجماعة شيبني وخلاني كب كلشي درستو بالقمامة وكلشي خططتلو انهار.. وقام بتربية نفسه ورباني معه ..

ابني بيسأل أسئلة تعجيزية .. مثلاً

عطريق السفر شاف جبل ..قلي ماما شو هاد.. قلتلو جبل قال كيف بس بدي اطلع عليه واكسرو..؟؟ قلتلو ماما الجبل مابينكسر قال بدي اكسرو ..

ابني عالأكل بيعملي فيها المشرف ماما قعدي منيح ماما مو هيك الواحد بياكل ماما كلي منيح .. لدرجة بحس بدي موت حالي

بالشارع طبعاً بحب يحافظ ع استقلاليتو ولازم كل الشارع يتفرج عليي وأنا عم اركض .. وحاول امسك ايدو وهوي عم يصيح لا تمسكيلي إيدي .. تركيني بحالي ..

وعن جديد مو عاجبو غسيلي لازم يرجع يحمل تيابو ويغسلن ويقلي ماما تعلمي الغسيل ..

انا ابني كل الألفاظ البشعه محرمتا عليه.. بيجو الناس بيقلولو يادب ويا كذا .. ف ابني بجن وبحاول يفهم مني كيف هاد العيب عم يقولوا الناس.. وأنا ماعم اعرف كيف بدي فهموا انو الكبار عادي وهوي لأ...

ابني يومياً قاعد عند مخارج الحكي من تمي عم يعلمني شو احكي وشو قول .. تخيلوا بس ..

غراضي لازم لاقين بالمطبخ ...عادي جداً لاقي قلم الكحله بالمجلى والحمرة بالحمام.. والمشط تحت الكنبايات.. أنا مرة ضيعت كنزتي وبرمت الدني عليها... قلي ماما لقيتا وسخه كبيتا... لقيتا بالزباله ..