في يوم معرفش كان إمتي قلبي حب…

بس مش حب عادي..

مش اللي الناس بتتكلم عنه في الأفلام أو الروايات...

ده كان حب مختلف…

حب من غير ملامح ..من غير عنوان.. من غير اسم حتي..بس كنت حاساه…

كنت كل يوم أصحى وأحس إني مستنية صوت ، مستنية كلمة ، مستنية حد مش عارفة هو مين ، بس قلبي حافظه.

كنت بشوفه في تفاصيل يومي ..

في لحظة هدوء وسط الزحمة ..

في نسمة بتعدي على وشي وأنا واقفة على السطح ببص للسماء ..

في قطة صغيرة بتيجي تستخبى جنبي..

في كل حاجة بسيطة بس بتحسسني بالحياة ولسه بحب.

كان حب من نوع تاني..

حب بيضمني من غير ما يلمسني..

يحتويني من غير ما يكلمني..

ويصدقني حتى وأنا ساكتة...

ناس كتير قالتلي: إنتي بتحلمي وانتي بتتعلقي بالفراغ ..

بس أنا كنت عارفة…

عارفة إن الفراغ ده أحن من قلوب كتير..

هو ده حب المجهول…

اللي بيطبطب على جروحي وأنا نايمة..

اللي بيخليني أكتب كلام من قلبي وأنا مش لاقية اللي يفهمني ..

اللي بيظهر في صورة كلمة حنينة .أو حضن من صديقة أو طبطبة من قلب طفل ..

صوت مش بشوفه ولكن دايما حاساه جنبي.

حب المجهول مش ضعف مني لكنه أمل.

أمل إني لسه بقدر أحب، رغم كل اللي اتكسر جوايا.

أمل إني لسه بستني ..رغم إني فقدت الثقة في الناس.

وأمل إن يوم ما هيتجسد..

هيكون أحن من كل حاجة فاتت ..