ح١٦
شرطة ...ودكاترة
وممرضات
ماليين اوضه تقى فالمستشفى !
واتفتح التحقيق مع حسن الى معندوش اى مقاومة انه يهرب او يدافع عن نفسه
حسن: ايوة انا الى عملت فيها كده
الضابط:انت تبقالها ايه بقى
حسن:مافيش صلة قرابه...جارها مش اكتر
الضابط:مممم طالع تسرقها بقى
حسن:حضرتك اسرقها ليه انا دكتور محترم
الضابط:اه دكتور..بطاقتك لو سمحت
حسن:مفيش معايا اى ورق ليا ، انا لما لاقتها اغمى عليها نزلت بسرعه عشان انقذها لانى ضربتها من غير وعى
الضابط: بس هادى يعنى وجايبها وجاى ولا كأنك عامل حاجه ! لو علاجها انكتب فالتقرير يلزم اكتر من ٢١يوم
هتبقى جنحه
ب ٣سنين
عشان تبقى تكسر بنات الناس كويس
حسن:انا مكانش قص...
الضابط:كنت طالع ليه
حسن:(ساكت وباصص فالارض)
الضابط:ضربتها ليه وانت ملكش اى صلة قرابه بيها
حسن:(سكووووت)
الضابط:اسمع دكتور مش دكتور ، قدامى جنحه تعدى بالضرب
ومفيش اسباب
وهتلبس يا قضيه سرقه بالاكراه ي طالع تتحرش بيها فشقتها
اصل مافيش سبب تالت
حسن:لا طبعا اتحرش بمين دى بنتى!
الضابط:بنتك ازاى ؟
حسن:لا اقصد انها اد بنتى يعنى ، انا الى مربيها
الضابط:لا م انت مش شيخ عرب يعنى ، شاب وفريعان شبابك
عالعموم هى تفوق وتحكى الى حصل
وانت هيتحفظ عليك لحد م ناخد اقوالها..خده يابنى
وهو بيقوم معاهم بص ع تقى وهى متربطة فكل حته والاجهزة والمحاليل حواليها
مش متخيل انه فيوم يعمل كده ...فبنت قلبه????
فالوقت نفسه كانت جميلة قاعدة فمكانها المعتاد، مستنيه تشم ريحه حسن
ويرمى عليها السلام زى كل مرة
ويقعد جمبها ...بس للاسف بقاله يومين مش ظاهر من اخر مرة عرض عليها الجواز
كانت بفكرها معاه ، ومنتظره ريحه برفانه تعدى ع حاسة الشم عندها
عشان تطمن انه راجع تانى
مش عشان يجدد العرض ، لكن بقت تطمن بوجوده
جميلة بنت فقدت معنى الامان من يوم م الشمس طلعت فيوم وكان ربنا مقدر ليها من انهاردة تبقى راجل وست وام واب وكل حاجه فبعض مسؤله عن نفسها وعن اخواتها..
م صدقت ايد حنينه عايزة تشاركها وتشيل عنها ، رغم انها مشافتهوش بعينها
ومتعرفش عن حياته غير القليل
ومتعرفش كمان اى حاجة ممكن تنزله من عنيها ...بس قلبها حس بإنه انسان كويس
ونضيف
من جواه
عشان كده اتطمنت بوجوده وراح مكان سكنها واكل معاها وشرب ..
من الصعب دقات القلب السريعه من الخوف والالم والوحدة
تهدى وتطمن بوجود حد هيشيل عنها كل ده..فيوم وليلة تتعود انه مش موجود!
♦♦♦♦♦♦♦♦♦♦♦♦♦♦♦♦♦♦♦♦♦♦♦
تكشيرة
ايد متوترة
وهزة رجل سريعه وفى انتظار حسن ....
الدكتورة فايزة: حسن !فيه ايه انت هنا فالحجز ليه ؟
وائل:تلاقيه عمل مصيبه
حسن:(بعصبيه)انت جاى معاها ليه ؟!انا اتصلت بيها اعتذر عن اجتماع مجلس الاطباء الاسبوعى
انت جاى ليه
الدكتورة فايزة: فهمنى ايه الحكاية ؟ وسيبك من وائل
حسن:مفيش . .انا ضربت حد ووصلت للاغماء وكسور متحفظين عليا لحد م ياخدو الاقوال ونشوف
وائل:مش قولتلك يا دكتورة مصيبه ،مقولتش ليه كنا جينا بعيش وحلاوة
حسن:(مركز فعين وائل بغيظ) انا ضربت واحدة مش عايز اقولك غالية عندى اد ايه سببتلها فتربنه فنفوخها
انت بقى انا عندى استعداد ابعتك للأخره بطيارة(بيقرب ناحيته)
وائل:(بيبعد بخوف)الحقى يا دكتورة بيهددنى قدامك وفالقسم كمان
فايزة:وبعدين فيك يا وائل مش معقول كده ابدآ
حسن: ان شاء الله ممكن بكرة هى تفوق وياخدو اقوالها واطلع من هنا واجى المستشفى
ومتشكر جدا لمجية حضرتك لحد هنا
فايزة:اتمنى ذلك ان شاء الله.. هسيبك وهتابع اخبارك وربنا يستر
وائل: مش عايز اجيبلك حاجه من برة ، اصل شكل قعدتك مطوله هنا
حسن:(عمل نفسه بيتناول حاجه يضربه بيها)ياخى حل عن اهلى غور
مشيو وطلعو برة القسم وبتركب الدكتورة فايزة عربيتها ،
وائل:دكتورة !بالمنظر ده حسن بقى سمعه وحشه عالمستشفى ضرب وبتاع
مش بعيد يتحبس وياخد حكم
مينفعش يرجع المستشفى تانى
فايزة: اسمع يا وائل ، حسن من اكفأ الدكاترة فالمستشفى
ومحدش فيكم بيتقدم مع حالاته زيه
ف بليز متحاولش انى اخد موقف ضده لانه مش هيحصل...سلام
دورت العربية وطلعت ووائل واقف بيبرطم فسره
وائل:خليكى معاه لحد م تاخدو اعدام كلكم والمستشفى تتقفل قادر يا كريم
♦♦♦♦♦♦♦♦♦♦♦♦♦♦♦♦♦♦♦♦♦♦♦
فاقت تقى ، لكن بتتكلم بصعوبه بسبب كسر فكها
ورجال التحقيقات مكدبوش خبر وكانو عندها ياخدوا اقوالها...
تقى:(بضيق)ايوة ...حس. حسن هو الى عمل فيا كده
الضابط:ليه ؟
تقى:معرفش إسأل لوه
الضابط: طيب ممكن تحكى الى حصل بالظبط
تقى: كنت ..فشقتى سهرانه حوالى الساعه ٢بليل
ولاقيت
خ. خبط جامد عالباب
فتحت
كان حسن واتهجم عليا بال. بالضرب وبعد كده محستش بحاجه
الضابط:اوك تقدرى توقعى ع اقوالك
تقى:اه
وقعت والضابط وهو قايم كان بيتكلم مع الدكتور عن حالتها
الدكتور المعالج:كسر الفك محتاح عمليه، اما بقيه جسمها فبالوقت بيلتئم
الضابط:العلاج محتاج اكتر من ٢١يوم
الدكتور:التقرير هينكتب انهاردة ، لكن ممكن نقول عشان العمليه هيبقى اكتر من ٢١يوم
الضابط: يعنى جنحه ...تمام
تقى:(بإهتمام) جنحه ازاى ؟ممكن يتحبس
الضابط:٣سنين ..احسن عشان حقك يرجعلك
شكرا يا دكتور
خرج الظابط وكانت مخنوقه من الى حصل والى عرفته ، بس جواها شايل جامد من حسن
وتقى من الصعب تسامح ...
♦♦♦♦♦♦♦♦♦♦♦♦♦♦♦♦♦♦♦♦♦♦♦
"بتلبسى ورايحه فين "
جيلان:رايحه اشوف حسن
وحيد: حسن مين
جيلان:حسن يا وحيد الدكتور حسن
وحيد: ااااه حسن شيزوفرينيا ،مالو بقى
انتى هترجعى للعلاج النفسي تانى
م انتى بقيتى كويسه اهو
جيلان:علاج نفسي ايه يا وحيد، بعد جوازنا انا بطلت اسأل عنه نهائى
اد ايه انا صديقه ندله
انهاردة كان ع بالى عديت عالعياده عنده وانصدمت من الى قالتهولى سمر سكرتيرته
وحيد: قالتلك ايه
جيلان:قالت انه متحفظ عليه بتهمه ضرب واحدة وهى دلوقت فالمستشفى وهو فالحجز والمصيبه ان ممكن ياخد فيها حكم
وحيد: هههههههههه مجنون وابن مجانين شيزوفرينيا ده والله، انا اعرف ان كيف عنده يعرف النسوان ويصاحبهم
لكن يضربهم جديدة دى
جيلان: انا بقولك ع مصيبه وانت واقف تهزر ، اوعى يا وحيد خلينى اخلص لبسي
وحيد: هتروحيله القسم ؟
جيلان: اه هتيجى معايا ؟
وحيد: لا عندى كام مشوار اخلصهم روحى انتى وسلميلى عليه واعرفيلى القصة عشان تيجى تحكيهالى
هههههه والله العظيم ضرب واحدة قال ، اكيد كان عايز يبوسها ورفضت فقال ياخدها غصب واقتدار
جيلان: اوعى يا وحيد عشان انت بجد معطلنى
جيلان زقت وحيد برة الاوضه وطلع وهو فاصل ضحك ع حسن والى حصله
وع بال م نزلت وراحت جيلان لحسن، كانت سلمى عنده هى وجوزها
ومحمد وعنان...
محمد:عملتلك ايه تقى عشان تضربها ،انت مش هتبطل الهمجيه دى يااخى
حسن: محمد انا همجى ولو سمحت متطلعنيش عن شعورى اكتر من كده
عنان:خلاص يا حسن هدى نفسك ، ان شاء الله كل مشكله وليها حل
سلمى:مكانش ينفع تيجى معانا يا عنان وانتى تعبانة كده الجو هنا ميناسبكيش
محمد:قوليلها عشان دى كمان راسها ناشفه اول م عرفت لازم اروح واتطمن عليه ده زى اخويا
واحنا جينا واهو زى القرد اهو
احمد:هى مش ممكن تتنازل عن المحضر يعنى
حسن(ابتسامة سخريه) دى اكدت مش اتنازلت وخلاص ممكن فأى وقت اخد حكم
سلمى:بعد الشر !انا هروحلها ولازم تتنازل والا هقاطعها العمر كله
عنان:مش غصب عنها برضو يا سلمى لازم نشوف حل وسط، اكيد هى متدايقه منه وشوية وهتصلح الموقف
سلمى :وهو انا هستناها لحد م الموقف يتصلح من الست تقى ! غصب عنها تتنازل
جيلان كانت داخله تستأذن فالزيارة ولاقتهم موجودين كلهم ..اتنحنحت سلمت
ودخلت
♦♦♦♦♦♦♦♦♦♦♦♦♦♦♦♦♦♦♦♦♦♦♦
حبيبة فالاوضه واقفه ناحية الشباك وباصه للقمر وسرحانة اوى ع اغنية مشغلاها ع ال mb3
دخلت لها الممرضه بسرعه...
الممرضه : يامدام حبيبة ارجوكى وطى الصوت شوية
حبيبة: هى الدكتورة فايزة مش قولتى انها مش موجودة ..خلاص
الممرضه:بس ممكن اى حد يسمع ويفتن عليا ليها انى بتصرفلك فالحجات دى ، وكده هيتقطع عيشى
حبيبة: طيب خلاص طفيته اهو ، اصلا انتى طلعتينى من الموود
الممرضة: ماشى، عن اذنك بقى
حبيبة: بقولك ، متعرفيش حاجه عن دكتور حسن
الممرضة: اقولك ومتقوليش لحد ، انا سمعت انه محبوس وحد متهمه بحاجه
كان الدكتور وائل بيتكلم مع الدكتورة نهلة
حبيبة: محبوس! يووووه يا حسن مرة محبوس ومرة فالمستشفى
انا زهقت
كل شوية بمصيبه
وبعدين انا مش قادرة بقى
الممرضه منبهه لكلام حبيبة لنفسها ومركزة اوى
حبيبة: انتى واقفه بتعملى ايه ؟ بتراقبى كلامى
روحى شوفى بتعملى ايه
ومتنسيش الدليفرى الى طلبته روحى استلميه من عالبوابه وهديكى الفلوس
الممرضه:حاضر مش عايزة منى حاجه تانى
حبيبة: لا ..بس خليكى موجودة ممكن احتاج فلوس اخليكى تجيبها بال ATM
الممرضه:انا تحت امرك عن اذنك
حبيبة رجعت شغلت الاغنية الى وقفت عليها ورمت نفسها عالسرير وهى باصه للسقف بتردد كلماتها
"انا ايه مخلينى بزيادة متعلق بيك..وحياتى سنينى مالها واقفه عليك"
♦♦♦♦♦♦♦♦♦♦♦♦♦♦♦♦♦♦♦♦♦♦♦
تقى هتدخل العمليات...
الدكتور: مافيش حد من قرايبك نتصل بيه
تقى:لا ...بالنسبة للتكاليف انا معايا فلوس
وهتغطى حساب المستشفى والعمليه
الدكتور:اوك ..جهزوا الاوضه والمريضه
كانو سلمى وعنان رايحين ليها ولاقوها فالعمليات، دفعت جزء من الحساب سلمى واستنوها برة
طلعت وفاقت من البنج
شافو انه مش مناسب يتكلمو فأى حاجة غير انهم يتطمنو عليها ويمشو،
وبعدها بيومين
وبعد م اتقرر ان علاجها اكتر من ٢١ يوم
زاروها تانى سلمى وعنان وكانت حالتها العامة بدأت تتحسن
سلمى :اخبارك ايه انهاردة
تقى:(بضيق) تمام
عنان:ع فكرة حساب المستشفى اتدفع كله متقلقيش احنا اخواتك
تقى:ده ع اساس انه رد اعتبار للى عمله حسن فيا ولا تعويض
سلمى:مش تعويض ولا حاجة يا تقى ، احنا اكتر من اخوات وانتى عيشتى وسطنا ٨سنين
وحسن الى شكتيه ده رباكى اكتر من مامتك وباباكى
تقى:اه ربانى ف ده اداله الحق انه يضربنى ويكسرنى كده
عنان:احنا لحد دلوقتى مش فاهمين هو ده حصل ليه
تقى:انا نفسى معرفش ،إسألوه
سلمى:اكيد كان ف سبب مستحيل حسن يعمل كده مع حد
يبقى لما ييجى يعمل كده يعمله مع تقى
عنان:تقى احنا عايزينك تتنازلى عشان كده مستقبله هيضيع
تقى:حسن مش منتظر انى اضيع مستقبله، هو لوحده ضايع
سلمى:انتى بتركبي دماغك وعايزة تسيبيه لحد م ياخد حكم ، ده خلاص فالحجز وايام وهيتحط فقفص مع المجرمين والشمامين
وهيروح السجن ياتقى
حرام عليكى. . سامحيه ربنا بيغفر
تقى:انا انكسرت يا سلمى، مش بس جسمى
حسن قضى عليا
ده كان هو الى ليا فمصر اخواتى واهلى واصحابي
عنان:انتى مجروحه منه حقك، بس حرام يتأذى بالشكل ده
يبقى ليه سابقه ويبقى رد سجون
تقى:انا تعبانة ومش قادرة اتكلم ، عمومآ سيبونى افكر
سلمى:(بعصبيه) انتى لسه هتفكرى
عنان:(غمزتها) خلاص من حقها ياسلمى تاخد وقتها ...يلابينا دلوقت
سلمى كانت ع آخرها وهدتها عنان ، تقى جرحها النفسي من حسن اكبر من جرحها الجسمانى
ووسط تفكير عميق دخلت الممرضه بالاكل ليها
الممرضه: الدكتور وصى بأكل زيادة ليكى فوجبتك انهاردة ، لانك حامل ومحتاجه تغذيه
تقى:(اتخضت) حد عرف من الى كانو هنا انى حامل ؟
الممرضه: لا بس جوزك عارف ولا الاستاذ الى ضربك ده مش جوزك ؟!
تقى:(سرحت)حسن عرف!!
الممرضه:هو انتى مش عايزة تقولى لحد
تقى:بصى مش عايزة حد من المدامات الى كانو هنا يعرفو بالموضوع ده اوك ..انا مش هقدر اكل معلش شيلى الاكل
سرحت تقى فالمصيبه الى عرفتها ، حسن عرف بسرها
وياترى كله ولا الحمل بس
وماخفى ......هيبقى اعظم !
♦♦♦♦♦♦♦♦♦♦♦♦♦♦♦♦♦♦♦♦♦♦♦
اسبوع كامل من التفكير ، وفالنهاية
وصلت انها تروح القسم بنفسها برغم تعبها تتنازل ، روحت شقتها
لكن حسن اول م خرج مكانش فدماغه انه يعتذر لتقى ويعرف الى حصل
ولا يروح لاخواته يطمنهم
ولا انه حتى يروح المستشفى يبلغ الدكتورة فايزة انه هينتظم فجلسات حبيبة
ظبط نفسه وبسرعه ع جميله ومن غير اى انذار ...لقاها موجودة،كان طول الطريق بيكلم نفسه
اكيد طول الفترة دى حصلت لهم اى حاجه مش مطمئنه
حاسس انه المسؤل الوحيد عنهم ،وكان مستنى طلوعه بفارغ الصبر ...
واول م وقف قدامها من غير م يفتح بوقه
ابتسمت كأنها شايفاه وقالت
جميلة:"انا موافقه نتجوز ، بس زى م جوازنا شركة كل حد فينا هيستفيد من وجود التانى جنبه
ميبقاش اكتر من كده
يعنى مش جواز بحق وحقيق .لانك يا حسن مش هتتحوزنى عشان اسرة وعيلة
وانا مش هتجوزك الا عشان اخواتى ،واهو انقاذ موقف زى م بتقول
انا تحت امرك فالوقت واليوم الى هتقول عليه ....
ح١٧
الباب بيتفتح قدام جميلة واخواتها ، باب الشقه الجديدة..
حسن دخلهم ، وابتدى يعرفهم ع كل ركن فيها ..كانت مفروشه وجاهزة من كل حاجة
حتى التلاجه حسن منسيهاش
والهدوم الجديدة اشتراهالهم
حسن:بس ياستى ودى اوضتك (ماسك ايديها يعرفها)
جميلة:(مبتسمة)رغم انى مش شايفه بس حاسه
كفاية فرحة اخواتى
اخو جميلة : شكرا ياعمو البيت ده جميل اوى
اخت جميلة :ده شبه بيت الناس بتوع التلفزيون
حسن:(مبتسم) الاكياس دى ليكى
ودول لاخواتك
مع الوقت هتتعودى وهتعرفى تتحركى فيها لوحدك
جميلة:متقلقش انا بحفظ الاماكن بسرعه
حسن:انا هاجى هنا بس لما اجيبلكم طلباتكم ، ولغاية م ورق التسنين بتاعك وتطلعلك بطاقه عشان نكتب الكتاب
بعدها مش هاجى غير لما تعوزى
ومش هيبقى جواز بجد زى م اتفقنا
جميلة:ومعلش كان عندى طلب كمان
حسن:اتفضلى
جميلة: انت قولت ان الشقه دى قصاد بيتك ، ياريت محدش يعرف بجوازنا
ولا حتى اهلك
انا مش حمل اهانة من حد .انت ابن ناس وانا .. ..
حسن:متكمليش ! اصلا ده جواز لغرض لاهو لافرح ولا يحزنون
محدش هيعرف
بالنسبة بقى لانك خدتى ع انك تشتغلى وتطلعى وانا مش هرجعك تانى للشارع
جميلة: كنت لسه هسألك
حسن: جميلة انا مبضحكش عليكى ، انا قررت الخطوة دى عشان امنك وحمايتك انتى واخواتك
وعشان تتوفر لكم حياة كويسة تعيشوها زى الناس
انا فكرتلك فشغل ينفع ظروفك وتستفيدى منه
جميلة :ايه هو
حسن: ف دار تحفيظ قرآن ، هتروحى وتحفظى وان شاء الله حسب شطارتك
ع اد م كنتى شاطرة
ممكن ياخدوكى هناك تحفظى البنات والسيدات وتكسبي ثواب وفيه اجر هو رمزى بس انا مش هخليكى تعوزى حاجه
هو ده بس عشان متقعديش فالبيت
وبالنسبة للمرواح والمجى انا هوديكى واجيبك
جميلة: انا مش عارفه اشكرك ازاى، ربنا يردلك كل خير بتعمله مع اى حد
بس كده لو نزلت وروحت وجيت معاك الناس هتتكلم
حسن: انا مبعملش حساب لحد
جميلة: بس انا بعمل ، ارجوك توافق انك بس تعرفنى الطريق اول كام يوم
وبعدين انا هروح لوحدى
حسن: مدام دى رغبتك ، اوك
انا همشى دلوقتى ..البيت ف كل حاجة
حاولى تاخدى عليه....سلام
حسن بعد م مشى اشتغلو اخواتها تنطيط فمكانهم وهما بيتفرجو عالهدوم
اخو جميلة:ده جايب هدوم حلوة اوى يا جميلة
اخت جميلة: انت اتجوزتو خلاص
جميلة سرحانه ف اكبر كرم من ربنا حصل فحياتها، هى صدفتها بحسن
واد ايه حياتها اتغيرت ١٨٠ درجه
♦♦♦♦♦♦♦♦♦♦♦♦♦♦♦♦♦♦♦♦♦♦
حسن اتطمن ع جميله ، وراح المستشفى
بس بعد يومين من طلوعه من الحجز
وكانت م بين الباب والشباك ، حبيبة!
ع نااااار الانتظار
حسن:(٣خبطات ودخل)آسف آسف ع الوقت الطويل الى انا مجتش فيه
ويدوب مكملش جرته جوه الاوضه بلهفة وقعدته عالسرير
حبيبة: مش مهم ، مش مهم اى حاجة انت هنا دلوقتى ومعايا
الحمدلله
انا كنت خايفه موت مش اشوفك تانى
حسن مستغرب رد فعلها ، بس عقله ودراسته ترجمت فورآ حبيبة حاسة بإيه ناحيته
حسن: ليه يعنى ، خايفه مكملش معاكى علاج ووائل يرجع يكمل معاكى
حبيبة: بس متجبليش سيرة الحمار ده ، مش كان عشان كده خوفى يا حسن
انا كنت
كنت كل يوم بفكر ياترى حسن فين طب هو جاى امتى
طب فاكر حبيبة ولا لأ
حسن: والله مكدبش عليكى انا كنت فقرف وبلاوى بس الحمدلله عدت ع خير
ها
مستعدة لجلستنا؟
حبيبة: الحقيقة انى مستعدة انى اقعد معاك اطول وقت ممكن ، جلسه سهرايه
كله فاكس بالنسبة لى
المهم دلوقت ان حسن وحبيبة سوا (عيونها لمعو )
حسن:(فسره) ااااااه يادى الواقعه الجديدة الى وقعت فيها يا حسن وانت مش ناقص،وبدل علاجك من الى فات يا حبيبة
هيبقى علاج للى فات ...والى جاى !
♦♦♦♦♦♦♦♦♦♦♦♦♦♦♦♦♦♦♦♦♦♦
"بيتهيألى طلبى مش جديد ع حضرتك، وانا سألت وعرفت انك بتعمل ده كويس اوى
انا فمصيبه وعايزاك تخلصنى "
الدكتور النسائى: هدى نفسك ، انا اه بعمل اجهاض لأى ست بتطلب ده منى لكن بيبقى فوقت البيبى فيه اصغر من كده
انتى فخامس شهر الطفل كبير وفيه خطورة ع حياتك
تقى : مش مهم ، انا عايزة اخلص بس من الى انا فيه
اموت بقى ده ميخصكش
الدكتور: لا طبعا مينفعشى ، انتى عايزة تلبسينى مصيبه
تموتى عندى هنا فالعيادة
استحاله ، انا مش هعمل العمليه دى
تقى : اوك .. شكرآ يا دكتور
والعمليه انا هعملها
مشيت بعصبيه من العيادة واول خطوات خرجت بيها للشارع، بحر دموع اترسم ع وشها
والناس ماشيه بتبص عليها
فونها بيرن ..مامتها
بتكنسل
مش عايزة تتكلم ولا تشوف حد ، رجليها مشيتها كتير
وقفت قدام النيل ، فكرت تنتحر
خافت حد ينقذها ويتفضح امرها ، رجعت تانى بخيبه امل للبيت
كان حسن طالع من شقه جميله جايب لهم حجات ومشى ع طول
قابلته عالسلم !
اول م لمحها، دور وشه بعيد عنها وراح يفتح باب شقته
تقى:حسن!
حسن عمل نفسه مسمعش وبيفتح الباب ودخل ورايح يقفل صدت الباب ووقفت فوشه
تقى: انا عارفه انى غلطت ، كلنا بنغلط
وكلنا بشر
حسن:(بيدور وشه بعيد عنها)
تقى: اسمعنى ...حسن برغم الى عملته فيا
كسرتنى ودشدشت عضمى بس انت عندى غير كل الناس
انت وسلمى ومحمد
حرام عليك ،مش انت كمان تبعد عنى وتسيبنى لوحدتى
حسن:انا مش عايز اسمعك، ولا عايز اشوفك
والمصحف ماعايز اشوفك
واتفضلى اطلعى لانى عايز اقفل
تقى:وانت كمان الى زعلان(عيونها فيها دموع)
هو مين ليه الحق يزعل من التانى
حسن:ياستى انا مش زعلان من حد ، وانتى مش فدماغى اصلا
واتفضلى عشان صوتى ميعلاش والجيران تسمع
تقى:حرام عليك ،مين مش بيغلط
متبقاش كده ده انت حتى حنين
حسن:كان فى وخلص ، وع فكرة صوتك لوحده بيكرهنى فهدومى
لاخر مرة امشى من وشى لحسن ابتدت عفاريتى تتنطط
وممكن تانى يحصل زى قبل كده ومتحكمش فنفسي
متعصبنيش
تقى: ع فكرة يعنى انا واقعه فعرضك تسمعنى مش يمكن مظلومة يا حسن
حسن: اتحايلت عليكى كام مرة نتكلم ، تحكيلى
يا مدام (بسخريه)
تقى:(عيطت) متتريقش لانك اكتر واحد غلط وشمال فالدنيا
حسن: طب يلا بقى متوقفيش مع الشمال عشان متتوسخيش
وغورى من قدام وشى
ياست
تقى:حتى اسمى مش عايز تنطقه
حسن:(نفخ) اللهم طولك ياروووح
تقى: حاضر يا حسن انا ماشية ، يارب ترتاح
ويارب اموت عشان اخلص من حياتى دى
طلعت جرى عالسلم وهى بتعيط وهو قفل الباب بقوة وقعد عالكرسي مخنوق وخاطط راسه بين كفوف ايديه
♦♦♦♦♦♦♦♦♦♦♦♦♦♦♦♦♦♦♦♦♦♦
وبعد كام يوم ...
كان ورق جميلة خلص لان مكانش ليها اى ورق ، وكان حسن اتفق مع اساتذة يعلمو اخواتها القراية والكتابه
فالبيت
كانت لحظة لاول مرة حسن فحياته ييجى ناحيتها ، هيتجوز !
وحتى لما عمل زى الناس الطبيعين واتجوز
كان له طابع خاص. ...اصل ده حسن
عند المأذون ...و٢شهود
تم كتب الكتاب ، وش جميلة كان كله رضا وسماحه
مفيش ابتسامة وفنفس الوقت مفيش تكشيرة
خلصت المراسم
وروحها عالشقه ...
وزى م اتفقو ، ده جواز قائم ع غرض
وعشان كده حسن عمل الى عليه وبس ...فطريقه لمكان جديد رايح يسهر فيه
جاتله مسج
من نفس الرقم الى بعت قبل كده
"كلنا بنحب وبنعانى "
بسرعه اتصل بالرقم لقاه اتقفل ، واتجنن
بدأ يخبط فالدريكسيون ويكلم نفسه كالعادة
"انت ميييييين! اعرف امك منييييين !
هنشتغل حوارينى يا طيطا ياروح النونة ، ماااااااشى انا معاك
ماشى
ماشى !"
ممكن موضوع تافه يجنن حسن كده !
اكيد بدليل انه شرب اكتر من المعتاد انهاردة ...وقام ورقص مع بنات الليل وغنى وهو تقريبا مش حاسس بالدنيا
ولما تعب بعد ع تربيزته وحت بنت ليل من بعيد متبعاه من اول م جه
بنت ليل: روق يا باشا ، ايه بس الى معكر مزاجك
انت شربت كتير اوى
حسن: (شبه سكران) وانتى مال اهلك
بنت ليل :هههههههه لالالا محبكش وانت كده ، فرفش ده اول مرة ييجى حد فالصالة هنا
زى القمر كده
وابن ناس
كلهم ولاد برطوشه
حسن:عايزة ايه من الاخر يعنى (بيولع سيجارة )
بنت ليل:عايزة اعرف ايه الى معكر مزاج الباشا ، يمكن اعرف اروقه
حسن: بصى تعالى قربي عشان محدش يسمعنا
(البنت قربت)
انا انهاردة اتحوزت
بنت ليل :عريس جديد ! ومالو ياخويا ميضرش
حسن: لا مش عريس ، دى جوازه كده وكده عشان هى مؤدبة ومحترمة ومينفعش تتجوز واحد وسخ زيي
بنت ليل : والنبي
حسن: اه متستغربيش انا وسخ اوى اوى وهى حاجه كده شبه الملايكه
وسبحان الله اتجوزت العبدلله
وكمان كل شوية تجيلى رسالة من حد معرفوش بيتكلم زى حد
مش موجود معانا هنا
بنت ليل: اومال فين
حسن:فوق (شاور لفوق) فوق فوق خالص
بنت ليل : والنبي انا م فاهمة حاجة
حسن: وبعدين واحدة بعالجها بتحبنى ، ودى لو اى حاجة حصلت مش ع مزاجها
او قولتلها انى مبحبهاش
معندهاش تفاهم
بتضرب ع طول
تسمم
وش ...اه متستغربيش
بنت ليل: هههههههههه ده انت طلعت ابن نكته يابن الايه، بقولك ايه تعالى عندى
اوضتى محندقه كده نكمل السهرة وتكمللى الحكاية
حسن: بقولك عريس يا وليه ، تقوليلى اجى معاكى
ولا اقولك
لفى كده
مممممم تمام ...اجى معاكى واهى تبقى ليلتك انتى
بنت ليل :هيهيهيهي ايوة كده دلعنى
حسن : انت قولتى اسمك ايه، ولا مش مهم ماهو انا مش هطلعلك بطاقه
اول م انزل من عندك مش هفتكر السحنه المضروبه ٧٧لون دى
بنت ليل: ومالو براحتك ياباشا ،ياباشا البشوات كلهم .....
♦♦♦♦♦♦♦♦♦♦♦♦♦♦♦♦♦♦♦♦♦♦
وفالعيادة
الشخص التانى الى جوه حسن ، بيكون حاضر
الدكتور المهذب المحترم
معاه جلسه وحالة
حسن: لكن قولى فكرة الانتحار راحت خلاص من دماغك مش كده
سعد: اه ...بقيت بعمل الى بتقول عليه
اشغل يومى
وابعد عن التفكير ده ...واتعرفت ع ناس جديدة من النادى
والفيس بوك
وفيه الى قابلتهم كمان
حسن: بس انت احسن يا سعد انهاردة عن كل مرة ، عايزك تقولى دلوقت فورقه دى
كلمة للدنياالى بقالك شهر مكنتش حاببها وعايز تخلص منها
هتقولها ايه دلوقت
سعد:(بتفاؤل)حاضر
حسن قاعد بيراقب ردات فعل سعد وهوبا!!
دخلة باب قوية
مفجأة غير متوقعه
جيلان بإنهيار عيااااط ووش مبهدل
جيلان :(ماسكه فرقبه حسن) انت السبب الى انتى خلتنى عرفته ، وحيد خد فلوسى وهرب
ومعرفش راح فين وبيكدب عليا طول المدة دى
انت السبب انا مش هسيبك غير فالقسم
حسن:جيلان اهدى (مخضوض)
جيلان: وحيد الى صدقته ،وحيد الى حبيته
باعنى وغدر بيا زيهم كلهم ...خد فلوسي وهرب برة مصر بلا رجعه
بتنزل ببطئ عالارض وهى ماسكاه ...وبتفقد الوعى !
♦♦♦♦♦♦♦♦♦♦
ح١٨
"مراقبة شديدة عليها ، انتى تمشي تيجى الى فالوردية الى وراكى وكل م تصحى ادوها منوم
عايزها ع طول نايمة "
الممرضه: حاضر يا دكتور حسن
حسن :(بيبص لجيلان وهى ممدة عالسرير بلا وعى ) اى حاجة تحصل تتصلو بيا فورآ فاهمة
فأى وقت
خرج حسن من اوضه جيلان كانت دكتورة زميلته فالمستشفى ماشيه فالكوريدور
نهلة زميلته: ازيك يا دكتور
حسن: اهلا يا دكتورة
نهلة : ايه شكلك مش فالمود نهائى ، او مش نايم
حسن: انا كله ع بعض
نهلة : امممم، اخبار الحالة بتاعتك مدام حبيبة ايه
سمعت فى تقدم هايل فحالتها
وبقت انفاعلاتها اهدى كتير من الاول
حسن: (بعدم اهتمام) اه هى اتحسنت كتير ، سمعت صحيح ان ابنك عمل عملية
عامل ايه
نهلة : الحمدلله بخير ، دى عملية اللوز ساهله الحمدلله
حسن: تمام ، ربنا يطمنك عليه
عن اذنك
الصدمة الى اتصدمها حسن لما عرف باللى حصل لجيلان ، كانت صعبه عليه
بنت بيعزها وزى اخته دخلت فحالة انهيار عصبي شديد ومش بعيد تفكر فالانتحار او القتل، وواحد كان صاحبه وواثق فيه ومش عارف عمل كده ليه
التفكير مع عدم النوم خلى الارهاق يبان عليه بسرعه ويسلم انه يروح يرتاح شويه ، بس ازاى وانهاردة اول يوم تروح للحفظ فدار التحفيظ جميلة
ولازم يوديها
هو نسي ، وجه لشقته عالنوووم ع طول لكن هى منسيتش
عشان كده
كانت فالبلكونه من الصبح لحد م اخوها شافه جاى تحت وقالها...وطلعت تستناه
حسن:جميلة ، صباح الخير
جميلة: صباح النور ، ازيك يا حسن
حسن: بخير الحمدلله ، واقفه كده ليه فيه حاجة
جميلة: انهاردة اول يوم اروح ف الدار، ومستنيه تودينى
حسن: اوبس ! اسف كنت ناسي
طيب اجهزى يلا عشان اوديكى
جميلة: حاضر ..اتفضل طيب
جوه
حسن دخل ودقايق وساعدتها اختها فاللبس ، وطلعت ونزلو سوا يوديها دار التحفيظ
ورجع يكمل الشوط الى مبدأهوش
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
"كلمة حبيبى استحرمها ، مع حد تانى غيرك اقولها "
كان حسن بيحلق دقنه وجات المسج دى ع فونه ، فتحها وابتسم
حسن: وحشتنى يا راجل ، بقالك كام يوم غايب
ههههههههه
(بدأ يدندن ) غايب عنى ليه ياترى
بتبعد عنى ليه ...صدقنى وحشتنى
خلص وطلع يغير هدومه سمع صوت دب من فوق ركز كده وبعدين عمل حركة امتعاض بشفايفه!
توقع ان تقى بتحاول تنط عشان تنزل البيبى ، بس مهمهوش
فكل دقيقة بعد صدمته فيها كان حابب يبرهن لها انه من السهل يخرج اى حد من حياته
مهما حصلله
ومبقاش يعنى له شئ فحياته...بس دى تقى !
هل يعتقد انه هيفضل ثابت ع موقفه ناحيتها كده كتير ؟ ولا ممكن يتغير
الاسئلة كانت كتير ، واجابتها عند حسن الى كان بيستعد انه يروح حفلة لحد يعرفه ورايح هو والباند بتاعته يهنوه بطريقتهم
راح وغنى وهيص وغير جو واتعرف ع بنت و٢و ٣
وكلهم اتحفظو تحت بعض فال Phonebook
عادى زى الى قبلهم والى قبلهم ....واهى ايام وبتعدى
جيلان بالادوية والمتابعه الى حسن مستمر معاها عليهم ، بدأ انهيارها يخف عن الاول وبتقدر تتكلم بهدوء عن الاول
واهى دلوقت قدامه وبتفجأه بمفجآت مش متوقعه لوحيد ....
جيلان: لاقتنى كل م يطلب حاجه بعملها من غير م احس ، نتعرف واتعرفنا
نتجوز
اتجوزنا
نهاجر وافقت ، حتى فلوسى من غير تفكير اديتهمله
ليه عمل كده
حسن: جيلان ، عايزين نوصل لاى حاجه توصلنا بوحيد فالنهاية
احسن طريقه انك تهدى
تجمعى افكارك
وتتكلمى
وانا والله معاكى مش ضدك
هو ايوة كان صاحبي، بس انتى مقدرش اعوضك
وحتى لو كنت ماليش ذنب فاللى حصل ، بس انتى كنت ضحية فكرة انا الى وديتك ليها
جيلان: بصحى من النوم عشان اروح الشغل زى كل يوم ، لاقيته سايب ورقه كاتبلى
جيلان
انا عملت كده ومش قصدى انى اتسببلك فالمتاعب، الحياه كده
خد وهات
وانا لاقيت وكان لازم اخد ، انا. سافرت او بمعنى اصح
هاجرت
ومش لكندا زى م انتى عارفه ..هتسألى نفسك ليه مجتيش معايا زى م اتفقنا هقولك عشان عايز ابدأ صح ولوحدى
فلوسك هتوقفنى ع رجلى ..وجوزانا هو الى ملالى النقط الفاضيه للهجرة
اظن مفيش فرصه احسن من دى
انا ماشى ومش هتشوفينى تانى ...صحيح الشقه الى انتى فيها ايجار مفروش
يعنى ي تخليها من اول الشهر ، ياتكملى انتى بعقد جديد
والخاتم متحاوليش تبيعيه لانه مش حقيقى
سلام يا اجمل جولى
حسن:ابن الحيوان!!!!
جيلان: فجأة كله طلع وهم وكدب ونصب واحتيال وقرف
بعد م قولت انى بدأت الدنيا تحبنى وتيجى فصفى
انا مش عارفه ليه انا بالذات الى بيحصللى كده فالدنيا
(بدأت تنهار)
حسن:(بيهديها) اهدى واسمعينى ، مشكلتك دلوقتى مش الفلوس
كده كده كانت جايالك من جوازه انتى مش عايزاها
ومكانتش فارقه معاكى
واهلك عليهم الدور يسدو الى عليهم من ناحيتك
بالنسبة للحلم الجميل الى فوقتى منه ع كابوس ...ده قدرك ومحدش كان هيقدر يمنعه
ووحيد هعرف اجيبلك الى خلفوه ومتقلقيش
لكن مشكلتك دلوقت ...فالجواز
انتو معندكنش طلاق يعنى حياتك كده وقفت فاهمة يعنى ايه؟
لازم بدل انهيارك ده واستسلامك ، نفكر فحل يخلصك من وحيد اولا
وبعدين نجيبلك حقك ثانيآ
جيلان هديت بعد ءخر كلمتين من حسن وحست ان عمرها م عملت حساب ل كل ده
وجه الوقت
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
وفيوم تانى وجلسة تانية مع حبيبة
حبيبة: اصلا انا هبقى كويسة ، عشان عندى الحاجه الى خلتنى كويسة كده
حسن: ممكن قبل م اعرفها اقولك ع حاجه احلى تخليكى اخسن بكتييير وبعدها تقوليلى
حبيبة: قول يا حسن
حسن: شركتك وفيلتك
ومكتب تأجير السيارات
انتى فين منهم
حبيبة: (سرحت) مش فاهمه
حسن: اقصد انتى هنا ، مابين علاج ومنومات ونظام اكل معين
مع انى شايف انك ملكيش مكان هنا لانك بجد مش مريضه
نفسيآ خلاص
والحجات دى كلها ، بتتمتع بيها عزة مع مجدى !!!
حبيبة قامت منفوضه وعلامات وشها اتغيرت
حبيبة: ايه ؟؟؟
حسن: اومال انتى فاكرة ايه ، هيستنوكى ويقعدو يعيطو ع فراقك
انتى هنا متبهدلة ومش عايشة حياتك
وهما هناك عايشين بفلوسك حياتهم
قولسلى طبعا انتى لسه ع ذمة مجدى ؟
حبيبة: (بضيق وعصبيه) ايوة
حسن: لازم تخلصى منه ، وتسيبيه لحياته معاها
وترجعى انتى لحياتك
برنسس حبيبة! (غمزلها بعنيه)
حبيبة: بس ...بس ازاى
حسن: مع بعض هقولك ازاى ، بس تعملى كل الى هقوله من غير نقاش
لانى بفضل الله بسببك
بقيت اشطر دكتور هنا
بعد معاناة ٦شهور معاكى من كل زملائى، انا قظرت اكسر الجليد ده
حبيبة: مبروك يا حسن (بزعل)
حسن: وليه زعلانه وانتى بتقوليها ؟
حبيبة: يعنى انت كل اهتمامك بيا عشان انا حالة عندك وبس
وتبقى اشهر دكتور فالعلاج النفسي
حسن: لا طبعا انتى قيمتك عندى اكبر من كده
حبيبة: (حريت عليه بلهفه) حسن ...حسن مين الحالة الى من ساعه م جت وانت مهتم بيها ودايما تروحلها قبلى
حسن: انتى مين الى قالك
حبيبة: حسن انا بعرف كل حاجة وبالذات عنك
لازم تقولى تعرفها
اصحاب..بتحبو بعض؟
حسن: حبيبة اسلوبك اتغير معايا فالكلام
حبيبة: لازم يتغير ...عشان
عشان انت الدكتور بتاعى انا
حسن: انا تحت امر اى حالة محتحانى يا حبيبة، وانتى لما تطلعى من هنا مش هتفتكرينى غير يدوب دكتور قدر يخليكى تتخطى المرحلة الصعبه
حبيبة: لا يا حسن متقولش كده ، انت ....
انت حبيبى
ايوة
انا بحبك ياحسن
حسن وقف لثوان ساكت ، لازم يتصرف بدهاء ومرونه
حسن: حبيبة لازم امشى دلوقت ، الجلسة الجاية نشوف حكايتك ايه
وخلى بالك حوالينا كاميرات
شاور عليهم وخرج وسابها واقفه بتبصله ....
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
كلام حبيبة مكانش مفجأة تبرجله ، بس هو مكانش عارف ليه قرر انه يغير بروجرام يومه
ويروح بدرى انهاردة
ويدوب لسه بيطلع عالسلم ورايح لشقته كانت تقى خارجه من الاسانسير باين عليها التعب جامد ، وخرجت حتى مبصتش ناحيته
طلعت تتسند وهى طالعه ف فضول حسن يبص ناحيتها وفوجأ
خط دم طويل وراها بينزل منها وهى مش حاسه ...طلع وراها ينبهها يدوب لفت ووقعت فحضنه!!
نزل بيها وكلاكيت المشهد بيتعاد
تقى بين ايدين حسن غرقانه هدومها دم وفاقظة الوعى، وهى بنفس اللهفة والخوف المسبقين
طلع بأقصى سرعه بالعربية ووصل مستشفى غير الى راحوها من قبل
فالطوارئ
خرجو الدكاترة منزعجين من عندها
الدكتور: دى بتموت ، نزفت كتير نتيجه اجهاض والطفل لسه حوه
لازملها عملية تنضيف ونقل دم بسرعه
حسن: (بخوف) اعمل اى حاجة ربنا يخليك، خدظو منى انا الدم
الدكتور: روح اعمل تحليل عينه ولو مطابق هناخد منك كيسين وعايزين كيسين كمان
حسن: مفيش مشكله بس بسرعه تلحقوها
تحليل عينه حسن مش زى تقى ، بالعربية ع كل بنوك الدم
اشترى كل الاكياس فصيلة تقى
كان ماشى بتهور وسرعه جنونية رهيبه لازم يلحقها
يدوب وصل واخدو الدم ، مضوه اقرار دخولها العمليات
دخلت وحسن مابين القوم والقعاد والبص فالساعه والتمشيه
دخل الحمام يشرب سيجارة ولقى المرايه قدامه
كلم نفسه
حسن: وبعدين ، وبعديييييين
من قتل لسم لاعتقال
لحبس لضحى لجميلة لتقى لحبيبة
انا تعبت
ورحمة ابويا وامى تعببببببببت
(بيخبط بايديه ) يوم ارتاح
يوم يارب
بس ازاى هرتاح وانا بعصيك، زى م اكون بطلب فلوس وانا مبشتغلش
هاخد فلوس ازاااااااى
يارب صلحنى من جوايا ، تعبت فحياتى ونفسي ارتاح
نفسي يوم يعدى من غير كارثه
نزل عالارض وقعد وسند ضهره ،
حسن: يارب لو طلعت من العملية كويسة وبقت كويسة انا هتغير
عشانها
وعشان ضحى وجميلة واختى سلمى ومحمد وابنه
وامى وابويا الى كان نفسهم يشفونى انسان كويس
عشان كل دول ...وقبلهم عشان حسن
الى انا تعبته اوى
اوى
وكمان غبي بذكر اسمك فالحمام، يارب خدنى
خد عبدك الغبي الى مش بيفهم الى مش حاسس بأى نعمه من
النعم الكتير الى حواليه
يارب تموت وتريح كل الى حواليك ، أذتهم بما فيه الكفايه
يا مفكوك يابن المفكوكة
حتى امك بتشتمها ، ده انت الغباء نفسه يلعن ابو منظرك
دخل حد وهو بيكلم نفسه ومتأثر قام وقف ومسح دموعه
حسن: متستغربش كلنا بنكلم روحنا ، مش جريمةيعنى
الراجل :(باصص بذهول ع منظره وهيئته مش ماشيه مع قعاده ع ارض التواليت وكلامه لنفسه)
حسن (طلع كارت) اصل انا شهرتى شيزوفرينيا ! فاهم يعنى ايه
مش فاهم صح
الراجل :..........
حسن: ده الكارت بتاعى وقت م تحتاح نقعد سوا ان شالله فحمام زى ده وتتكلم انا معاك
سلام
مشى والراجل مذهول وبصة عالكارت و٢٠ ع حسن الى كأنه اتبدل انسان تانى لما شافه
فعلا شيزوفرينيا!!
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
"عايزين بنت ولا ولد"
محمد ماسك ايد عنان ...
محمد: كله كويس من عند ربنا
الدكتور: طيب ولد ياسيدى مبروك
عنان:(ابتسمت جامد) كان نفسي فولد الحمدلله
قامت من ع سرير الكشف وكتبلها عالمقويات والفيتامينات ومشيو
وهما مروحين
عنان : الحمدلله ولد ، ولد يا محمد
محمد: بصراحه كان نفسي فبنت ، مبحبش خلفه الولاد
عنان:ليه بس
محمد: متعبين ، وكمان اتعقدت منهم من حسن اخويا
لكن بنت تدلعيها وتربيها عالدين
زى سلمى اختى كده ، تبقى حبيبة ابوها
عنان: طب ايه رأيك اهو طلع ولد وعشان اغيظك اكتر
هنسميه حسن
مشيت قدامه وهى بتضحك لكن محمد هدى مشيته عنها وعاد الاسم فسره باستغراب
"حسن!"
♦♦♦♦♦
ح١٩
ببطئ فتحت عيونها، لقت نفسها متوصله ع جهاز اكسجين
وخراطيم متعرفش رايحه فين جايه منين
بتحاول تستعيد وعيها
لقت حسن قدامها !
رايح فالنوم عالفوتيه ومتغطى بالجاكيت بتاعه ...كانت مفجأة كافيه تفرح تقى تقوم تحاول تتكلم عشان يسمعها
تقى : حس..حسن، ياحسن
حسن بيصحصح لان اصلا نومه خفيف ع صوتها الهادى الى بيحاول يطلع ، قام لها بابتسامه
ميل ع راسها باسها مع كلمه
"حمدلله عالسلامة يا توتى "
تقى: (مبتسمة) توتى !
حسن: عايزة تعرفى يعنى انك غاليه ومقدرش استغنى عنك مثلا ولا ايه
تقى : حسن ،انا جيت هنا امتى
وايه الى حصل
حسن: انت انهاردة اتولدتى من اول وجديد ، زى كده من ٢٢سنة لما اتولدتى وكنت اول ايد تشيلك
وبوست خدودك الناعمه
تقى :(بتضحك) سامحتنى ياحسن ؟
حسن: انا الى عايزك تسامحينى
تقى : انا هحكيلك كل حاجة ومش هخبي حاجة خالص ،انا كنت غلطانة من الاول
حسن: متستعجليش ، انا من انهاردة مش هسيبك خالص
تقى: حسن معلش هو سؤال سخيف ، البيبى ....
حسن: البيبى نزل ، انا معرفش انتى عملتى ايه فنفسك
بكرة هتطلعى وهنتكلم ومتخافيش عمرى مهما سمعت منك م هقسي عليكى
انتى بنت قلبي يابت
تقى: (بتعب) ميل هات بوسه ياحسن
ميل باسها فخدها وعيونه مدمعه وبيلعب فشعرها بحنيه ، يمكن كانت اول مرة من سنين تحس حنان كده تقى
خلاها اقوى وخلاها تتحدى الخوف بحسن ...الاب الروحى ليها
♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦♦
فدار التحفيظ ،جميلة كانت مع زميلاتها بتحفظ الورد الى المفروض حفظه
كانت لوحدها خدت ع انها تروح وتيجى من غير حسن
بتتعلم الاماكن بسرعه ،وزى م ربنا بياخد من شئ ويوصل فشئ
اخد منها نعمه البصر بس محرمهاش البصيرة
بعد م خلص الدرس وهى بتحاول تتطلع كانت بتساعدها زميله ليها
زميلة جميلة: تعالى يا جميلة اساعدك تخرجى للبوابه
جميلة: شكرا
زميلتها: مبسوطة معانا يا جميلة
جميلة: الحمدلله ع كل نعمه
زميلتها: بس ماشاء الله عندك ملكه حفظ هايله ، اتوقع ان لما يعملو المسابقه انتى الى هتفوزى
جميلة: ياريت يبقى ربنا بيحبنى اوى ان حفظنى كلامه بسرعه كده
زميلتها:ممكن اسألك سؤال لو متدايقيش
جميلة: اتفضلى
زميلتها: هو مين الى جه وصلك اول كام يوم ؟
جميلة: (ارتبكت تجاوب ب ايه) قريبى
زميلتها: اه
جميلة: فى حاجه يعنى
زميلتها: لا مجرد سؤال، ادينا بندردش
وصلتها للبوابة وكملت جميلة لوحدها ، السؤال خلاها ارتبكت
ولا حست بشئ اول مرة تحس بيه؟
معقول تكون بتغير ع حسن !
♦♦♦♦♦♦♦♦♦♦♦♦♦♦♦♦♦♦♦♦♦
"ايوة انا لايص هنا خلصينى "
سلمى :ياحسن تسلق الفراخ او اللحمه الاول
حسن: هو انا لسه هسلق ! وبيتسلقو ازاى بقى
سلمى : يالهوى ده انت خيبه خالص
حسن: معلش مجربتش ابقى ست بيت قبل كده
سلمى :ههههه مسمعتش سمير غانم فالمسرحيه لما قال شويه ميه وترمى فيها الفرخه تبقى شوربة يالينا هههههه
حسن: عارفه خفه دمك دى هتخليكى تسمعى الرقم الذى طلبته يبدو انه مغلقا ، قولى ياسلمى بقى اعمل ايه
سلمى: طيب خلاص متتعصبش، حط ميه فحلة وقطع بصل وشويه خضروات كده وتحط بهارات وو
حسن: كل ده عشان شوية شوربة لسان عصفور !
سلمى :اساسا الى بقوله ليك ده مبدئيا بعد كده تستنى الميه تغلى تحط الفراخ وتستوى
تطلعها وتحمر اللسان عصفور فحاجه تانيه
وبعدين
حسن: بس بس ، الله يرحمك يا امى كنتى بتعمليها فثوانى
والله م انا عامل
سلمى:طيب لما نفسك فطبق شوربه تعلالى اعملهولك يا حبيبى
حسن: خلاص ياسلمى انا هخلى مرات عم رضوان تعمله بلا وجع قلب
سلمى: اسمع بس تعالى اتغدى معايا انهاردة
حسن: لا ياستى انا صايم
سلمى: صايم !بركاتك بس انهاردة الحد
حسن: مانا بصوم حد واربع ،سلام يا سلمى عشان بتموتى فالرغى
باى
سلمى : هههههه سلام
قفل حسن ووقف محتاس قدام الحجات الى قدامه فالمطبخ ، كان حابب يأكل تقى اكل بيتى يقويها
احسن من الدليفرى
وفالاخر ع المتضرر الجوء لمرات البواب..تعمل كل حاجة
وبعد م جهز اكل تقى ، ونضفت شقتها بهدوء نزلت بعد م حسن طبعا شكرها وادالها مبلغ محترم
دخل لتقى الى غرقانه فنوم عميييق بسبب المسكنات الى واخدها بعد العمليه
ابتدى بصحيها
تقى:ماليش نفس آكل يا حسن
حسن: لا قومى متتعبنيش زى وانتى صغيرة، قومى يلا
تقى:مين عمل الاكل ده انت ؟
حسن: قومى بس وبعدين نحكى فقصة الاكل
تقى : مش قادرة اقوم
حسن : حاضر ياستى ، (قومها) اتسندى عالمخدة
تقى : كده مش هعرف آكل الاكل هسقط عليا
حسن: ياتعبااااانى
تقى :ههههه
حسن:(قعد وراها وسندها ع صدره وايده محوطاها) كده تمام يا توتى
تقى :تمام ههههه
بيأكلها بإيده فبوقها واحده واحده ...وصمم انها تخلص طبقها كله لانها نزفت كتير
خلصت الاكل
وشاله وجه قعد قدامها
حسن: يلا خدى الدوا ، وانا شوية وراجع
تقى: هتروح فين
حسن: المستشفى والعيادة ،متخافيش هاخد لفتى المعتادة وجاى
تقى : هتسهر برة يعنى فالنايت؟
حسن :(ابتسم بهدوء) مفيش نايت تانى ياتقى ...هقوم بقى انا انزل البس ومتخافيش
هاجى بدرى
بس متتعبيش نفسك
لحد م اجى
تقى :اوك حاضر
حسن: لو عايزة اى حاجة اتصلى بيا ، سلام مؤقت يا تكتوكة
تقى :ههههه تانى تكتوكة سلام
♦♦♦♦♦♦♦♦♦♦♦♦♦♦♦♦♦♦♦♦♦
لغاية م حسن يجهز ويروح المستشفى
كانت حبيبة فحالة لا يرثى لها ، التفكير تعبها من اخر جلسه مع حسن
فتح عنيها ع حجات مكانتش شايفاها
كانت محبوسة فدوامة محكومة بالتعليمات والنظام، وكل حاجة تقدر تتمتع بيها
الناس الى هما السبب فدخولها هنا
بيتمتعو بيها بدون وجه حق
تخبيط برجلها فالارض وعالشباك، الممرضه دخلت عندها
الممرضه: انتى برضو منمتيش يا مدام حبيبة
حبيبة: لا مش عارفه انام ، حسن جه ولا لسه
الممرضه: لا لسه ، بس انتى خدتى جرعه منوم تهد جبل
حبيبة: مش قادرة انااااام
دخل حسن اوضتها
حسن :(شاور للممرضه تطلع ) ايه الاخبار انهاردة
حبيبة: هو اناليه بقيت اخر حسبانك ( بعصبيه)
حسن: ممكن تهدى ، اخر حسبانى ايه انا جيت عادى فمعاد جلستى
معاكى
حبيبة: بقولك بحبك يا اخى انت مبتفهمش بحبك
حسن: ششششش الكاميرات
حبيبة: يا اخى تولع الكاميرات
حسن: انتى عصبيه كده ليه
حبيبة: انتى برجلت دماغى، اخر برجين فعلقى طارو بسبب كلامك اخر مرة
حاجتى وفلوسي ناس بكرهها السبب فحرقه قلبي وموت بنتى بيتمتعو بيها
وواحد بحبه وهو زى الصنم
حسن: (خد نفس ومسك ايدها قعدها) اهدى ياحبيبة ، انتى مش بتحبينى ولا حاجة
حبيبة: لا بحبك
حسن: واحدة محطمة من اقرب الناس ، قررت العزله فجأة
دخلت نفسها حياة واطار جديد
جه حد من وسط ده كله انقذها وبدا يحطها ع اول الطريق
شافته منقذها الوحيد ....شافته حبيبها
فوقت مينفعش حب فيه
بعد م تفوقى من الى انتى فيه هتعرفى كلامى ده ...انتى اعتبرتينى حبيبك لكن انا مش حبيبك
حبيبة: انت بتخرف اكيد، هتعرف اكتر منى
ايوة بحبك
وهطلع من هنا وهتطلق من مجدى وهنتجوز عشان انا عايزة كده
حسن: (بعصبيه) عشان انا عالجتك من كل حاجة الا حب الامتلاك يا حبيبة ، لسه برضو لما تشوف حاجه ا تصممى تاخديها
ولو عاندت وياكى بتعندى اكتر المهم تفوزى بيها وبعدين ترميها
ده مش حب
حبيبة: (بتحاول تشيل ايدها) اوعى كده انت اكيد علاجك للمجانين اثر عليك
حسن: انتى هتطلعى وتاخدى حقك وترجعى لحياتك ولاهلك ، وانا مش هسيبك
اقسم بالله معاكى للاخر
لحد م انتى الى تنسينى يا حبيبة
لكن مش حبيب، صاحب او اخ
او مساعدك كدكتور عارفك
لكن حب وحواز لا ، كده انا عالجتك من مرض كبير دخلتك فمرض اكبر
وتتكرر حكايتك تانى ،لحد م تلاقينى فيوم بخونك فسريرك
حبيبة: (عيطت) م انت لو بتحبنى مش هتقولى كده
حسن: انا بحبك والله ، بس حب خوف اخ ع اخته وبنوتة جميله حرام تفضل فعذاب المرض
لكن مش حبيب
انتى ليكى حياتك وانا ليا حياتى
احنا الاتنين زى قضيب القطر متوازيين...مستحيل نتلاقى
زى م انتى عايزة
حبيبة هدى رد فعلها بكلام حسن ، اثر فيها متنكرش
لكن حسن وراها لحد م تشيل الفكرة من دماغها ،والى قدر يحول كتله العصبيه والعنف لبنوتة وديعه كده
حاجة زى دى مش هتعصى عليه!
♦♦♦♦♦♦♦♦♦♦♦♦♦♦♦♦♦♦♦♦♦
"هتنزل معايا انهاردة نجيب هدوم حسن ولا اعدى ع سلمى "
محمد:(بضيق) وخلاص عقدتى الامر انه حسن
انا مش هسمىه حسن
عنان: وليه ده اسم جميل والله، كفاية انه اسم اخوك
بص حسن محمد
بص ماشى ازاى
محمد: والله انا حر ، ابنى ومش هسميه كده
عنان: فيه ايه يا محمد بتزعق ليه
محمد:والنبي سيبنى فحالى
عنان:لا خد تعالى هنا ، من يوم م عرفنا انه ولد وانت قالب عليا
حصل ايه لكل ده
محمد: لا وانتى الصادقه من ساعة م قولتى انك عايزة تسميه حسن
عنان:ومالو الاسم
محمد:مالو الاسم ! واشمعنا اسم اخويا يعنى
ليه مش اخوكى
ليه مش ابويا
ليه مش اى اسم فالدنيا
عارفه ليه يا عنان، عشان اى حاجة بتحصل لحسن لهفتك الغريبة عليه
عشان يوم م جيت خطبتك عينك كانت عليه هو مش انا وسكتت
عشان اول بيبى لينا عايزة تسميه ع اسمه
عشان ده حسن الى بتتجننى لما تعرفى انه عرف بنت جديدة
بس حسن ده ياهانم ، عذب ابوه وامه
كانو بيبوسو ايده يذاكر وهو بيشرب حشيش مع اصحابه
عيل فثانوى بيشرب حشيش وبيضرب كوك
ويسقط ويعيد عشان معندوش مسؤليه
حسن الى عاجبك ده ...بكى امه بالدموع من حسرتها عليه
كل يوم فحته شكل وفمصيبه جديدة
مش بتلاحظى انى مش بتأثر لما بتحصله حاجه، عشان خدت ع كده
حسن الى كل يوم فحضن بنت شوارع شكل
حسن الى بيسبح بإيد وبالايد التانيه الكاس
حسن الى مش عايز يتجوز ويفتح بيت عشان هو انسان مستهتر وبيحب حياة الزبالة والقرف
لكن ميعرفش ان بكرة فيه اخره
وحساب وعقاب
حسن الى يوم م ابوه وامه ماتو وهما بيحجو ،ملاقيناش خياله فالعزا
حتى عزا ابوه وامه مش قاعد فيه
عشان مفيش فالدنيا حاجه اهم من نفسه عنده
حسن الى كل يوم بكره نفسي عشان هو اخويا
والهانم مراتى عايزة تسمى ع اسمه، لكن مستحيل ده يحصل
لان عمرى م هحب ابدا اشوف ابنى زييه فيوم من الايام
عنان بعد سكوووووت دام طول م محمد بيتكلم وذهول قفلت الكلام الكلمة واحده
عنان: انا ماشيه وسايبه البيت يا محمد !!!
♦♦♦♦♦♦♦♦♦♦♦♦♦♦♦♦♦♦♦♦♦
وداعى ليك الاخير...
متنساااش قبل نومك تفكر فيا
عشان اجيلك فأحلامك.....
قام من نومه منفوض وكأنه شايفها قدامه ...
حسن :ضحى !! اعوذ بالله من الشيطان الرجيم
نومه قلق ، اتوضى وصلى ركعتين وبعدين وقف فالبلكونه ولع سيحارة عاديه
دخل فتح اللاب توب وجاب كل صورها ، مش عارف ليه كان بيراقب ضحكة عنيها الى كانوبينورو وشها لما بتضحك
شعرها الطاير وراها فصوره طالعه فيها عالهرم وبتعمل علامه بايدها لحسن
صورتها جمب لوحه من لوحاتها فالمرسم ، كان بيسمع وقتها اغنية وكأنها عليهم
فيها جملة خلته اتهز
"يوم م جتلى وحضنتنى وبعدين مشينا ،ليه مقولتش ان ده الحضن الاخير "
عيونه دمعت ، اشتياق لشخص كان فوق درجه الملائكيه حياته خلصت
كان نفسه يسعدها
بس مقدرش عشان مش بيضحك ع حد باسم الحب
وعمره م نطقها غير مرة فحياته وندم عليها
لذلك قرر من يومها ميقولهاش ولا يحسها تانى
الجنونة جت !
قوم البس هدومك وخد مفاتيح عربيتك ، واطلع لف بعد نص الليل فالبلد مش عارف رايح و لا جاى منين
لقى نفسه رايح مكان مرسم ضحى ومش عارف ليه ، يمكن سبطرتها ع عقله انهاردة بعد الحلم
خلته عايز يشوف حاجه منها
وصل هناك ....
غريبة النور مفتوح ، نزل من عربيته وراح ناحيه المرسم بخطوات هاديه
خطوة والتانيه والتالته
وقف عالباب المفتوح ،لقى حد بضهرها ليه
لابسه الحجاب وواقفه بعكاز وتقريبا فيه واحدة من رجليها طرف صناعى
واقف بيتأملها لسه هينطق...لفت بهدوء
"لولا ريحتك المميزة الى بتدخل قبلك المكان ، كنت افتكرت انى بحلم "
حسن اتخشب !
وقع من طوله مرة واحدة ......
♦♦
ح٢٠
خطوة والتانيه والتالته
وقف عالباب المفتوح ،لقى حد بضهرها ليه
لابسه الحجاب وواقفه بعكاز وتقريبا فيه واحدة من رجليها طرف صناعى
واقف بيتأملها لسه هينطق...لفت بهدوء
"لولا ريحتك المميزة الى بتدخل قبلك المكان ، كنت افتكرت انى بحلم "
حسن اتخشب !
وقع من طوله مرة واحدة ......
حاولت تتعكز لمكانه وبمقدرة صعبه منها نزلت عالارض تحاول تقومه ، رشت ع وشه برفان من شنطتها
حسن ابتدى يفوق تانى ،لقى نفسه مسنود منها
ضحى !!!
حسن:(بفزع بعد بجسمه ورا) ده الى هو ازاى ده ؟؟ اه مانا جاى فنص الليل لازم الاقى عفريتك فالمكان
ضحى :عفريت !هههههه مش عيب دكتور واد الدنيا زيك يؤمن بالحجات دى
انا انسانة زيي زيك ياحسن
فاكر ليه انى ميته طيب انا قدامك اهو المسنى ....
حسن ببطئ قرب ايده من وشها لمسه وايديها وفلحظة ضمت الاشتياق والاسف والحنين
خدها بين احضانه ودموعه على طرحتها
حسن: انتى كنتى فين ؟ كنتى فين
ليه تسيبنى كل ده فاكر انك متتى وبتعذب ليه ياضحى
ضحى كانت اتاخدت من تصرفه واستحت وانسحبت من حضنه بهدوء غير ملحوظ
ضحى: طب يلا قوم من عالارض
حسن: خلينى باصصلك شويه
ضحى: عايز تقولى انك اشتاقت لى الفترة دى
حسن: اكتر ماتتصورى
ضحى: بس انامن اول م ربنا كتبلى الحياة من تانى، وانا معاک ياحسن
حسن: ازاى انتى ....بصى احكيلى بالظبط حصل ايه ،ازاى انتى هنا وازاى لسه عايشه
ضحى :دلوقت! الوقت أخر ولازم اروح
ممكن لو كنت حابب
حسن: طبعا هحب نشوف بعض تانى ، انا همشى دلوقتى
ضحى: بس اشمعنا دلوقتى الى جيت المرسم ياحسن من. يوم الحادثه
حسن: فيه واحدة قالتلى وداعى ليك الاخير ،تشوفنى فأحلامك
حلمت بيگى ????????
♦♦♦♦♦♦♦♦♦♦♦♦♦♦♦♦♦♦♦♦♦♦
جيلان رجعت كما كانت، بيت باباها
شايلة الحسرة والهم وخيبة الامل فالحب الى مكملش والحلم الى متمش!
ماجى: برضو مش هتاكلى، طيب عالاقل اسمعى كلام الدكتور بتاعك وكلى عشان ادويتك
جيلان:محدش له اى دعوة بيا ،آكل انحرق اموت
ماجى: ليه يعنى كل ده عشان حته نصاب وكلب
جيلان: ماجى انتى اكتر حد مش طايقه يتكلم معايا
ماجى: انا حذرتك من الاول ونبهتك وانتى الى مسمعتيش الكلام
جيلان: ايوة ياستى ،انتى الى بتفهمى وواعيه وانا مدب واندبيت ع وشى واتنصب عليا فكل حاجه
حتى انى اخلص من جوازه هيفضل جوزى لحد ما اروح لربنا
ماجى :طيب مش تغيطى (طبطبت عليها ) كل حاجة محلولة متخافيش
جيلان بتمسح دموعها بس كلام ماجى ليها وراه إن....
♦♦♦♦♦♦♦♦♦♦♦♦♦♦♦♦♦♦♦♦♦♦
" خلاص هتمشى وتسيبينا "
حبيبة: دكتور حسن كتبلى ع خروج وانى خلاص مش محتاجه لعلاج نفسي تانى
الممرضه: والله يامدام حبيبة اتعودنا عليكى وع هزارك ودمك الخفيف
حبيبة: زى م قولتلك لو كنتى تعبتى من الشغل هنا انا اديتلك عنوانى تعاليلى وهتلاقى شغل ياما عندى
الممرضه: ربنا يخليكى يارب ويحميكى من كل شر
جهزت شنطتها واستعدت ، كان فى عربية مستنياها من مكتبها طلبتها من غير م تقول هى مين
الفلوس وكل حاجة لسه تحت امرها
حتى جوزها لما كان بيلاقى ف مصروفات من حسابها الخاص كان عنده يقين انها موجودة وعايشه لكن هى فين...الله اعلم !
والمفجأه ان حبيبة رتبت لكل حاجه مظبوط مع حسن
خرجت ظبطت دنيتها لبس وراحت بيوتى سنتر تعيد برنسي حبيبة من جديد
ع المحامى بتاعها رفعت قضية خلع وعندها الدلائل الكافيه انها تخلص منه زى الشعرة من العجين.
كانت كل ده مقيمة ففندق لحد م خلصت كل الى اتفقو عليه واستعدت لاقوى لقاء كانت خايفه منه طول الفترة دى ،بس استعدت بقوة
عشان حسن كان معاها خطوة خطوة
دخلت بخطوات ثابته فيلتها وكانو الخدم مش مصدقين انها رجعت !
بعد الترحيب، لاحظت ان الخدم مرتبكين
كانت عزة نازله تشوف فيه ايه .....وغير المتوقع انها كانت حامل !
ونازله كانها صاحبة المكان
حبيبة: هاهاهاه، مبروك يا مدام ده عرفى ولا شرعى بقى
ولا حاجه كده فالمتدارى زى ماشوفت
عزة :حبيبة! انتى جيتى امتى
حبيبة: انتى متسأليش جيت مكانى وفيلتى وبيتى امتى ، مفيش خدامه بتسأل ستها السؤال ده
عزة: خدامه ! احترمى نفسك
حبيبة: انتى الى تحترمى نفسك وتطلعى تلمى قرفك وهلاهيلك وتغورى لحسن امشيكى بفضيحه
ولا لو عايزة تعملى حاجه تكفرى بيها عن ذنبك معايا ،اطلعى فضيلى الشنط ورصى هدومى زى زمان
واستنى اديكى الى مش محتاجاه تلبسيه بعدى
زى م اخدتى جوزى كده
عزة :مش بيحبك بيحبنى انا واتحوزنا وفبطنى ابنى الى مستنيه بلهفه
حبيبة: هههههه اتحرقو ببعض، كانت غلطتى من الاول انى عليت حشرات وخليتهم يحسو انهم ناس
اطلعى برة
وابقى بلغى جوزك المبجل المحترم انى فوقت قريب هتوصله قرار المحكمة بالخلع
خليه يرجع شحات زى ماكان ،سفرجى ابن سفرجى
عزة:(متضايقه) مش مهم اى حته مع مجدى حبيبى جنه
حبيبة: ياسلاااام شادية ففيلم معبودة الجماهيىر بتتكلم ! طب يلا ياختى انكشحى بالذوق
ومتورنيش وشك لا انتى ولا جوزك تانى ...فاهمين
يا سعدية ! سعدية
الخادمة:ايوة ياست حبيبة
حبيبة: خلى الزبالة دى تلم بلاويها وتغور فاسرع وقت ، واعمليلى نسكافيه وخليهم يجهزوا الحمام عشان هنحضر لسهرة الليلة
احتفال رجوع البرنسس حبيبة .....
♦♦♦♦♦♦♦♦♦♦♦♦♦♦♦♦♦♦♦♦♦♦
فالريسبشان ....قدام التى فى
كانت تقى بتبتدى تحكى تفاصيل كل حاجة حصلت معاها وهى فلوس انجلوس
من اول م راحت
لحد م رجعت...شايله جواها مصيبه!
تقى: روحت ...ودانى مدرسة داخلى
مكانش فاضى يبص فوشى غير وقت الاجازات ودقايق معدودة ويمشى اهم حاجة يرمى فلوس
اتخرجت من الثانوية العامة ، كان لازم بقى اروح اعيش معاه
عيشت مع بابا اغراب، عشان اشوفه اتصل بيه وهو جوه البيت معايا
طول الوقت شغل واجتماعات وصفقات، وتقى مالهاش فحياته ثوانى
تعبت من الوحدة، ع اد الى عيشته مكانش عندى صحاب كتير
كانت تسليتى الفيس بوك والنادى
كان في جروب مصريين مغتربين فالخارج
دخلته يمكن احس بدفا وسطهم
اتعرفت ع ناس كتير وكنت بفرح بكلامى معاهم ، لحد ....
حسن:(ماسك ايدها) كملى متخافيش
تقى:لحد م اتعرفت عليه من وسطهم كلهم حبيته ،حبيت كلامه
واهتمامه بيا
وحبه وخوفه عليا
احساس الاهتمام حلو اوى خصوصا لو كنت بتعانى من وحدة وخوف هما صحابك فالدنيا دى من يوم م اتولدت
حسن: انشديتى ليه وحبتيه
تقى :(دمعه نزلت)اوى ياحسن اوى
حسن: فبدأتى تخصيه هو بوجودك واهتمامك وبطلتى تدخلى الجروب
تقى:بالظبط كده، اتعرفنا اكتر ومن فيس لسكايب لمكالمات يوميا
وفيوم قررنا نتقابل
كان فولاية جمبي ولاية تكساس
قربنا المسافات واتقابلنا ،كان احلى يوم فحياتى
قضيناه سوا
حكالى شغله وحياته كلها وانا حكيتله كمان ....
حسن: طلب علاقتكم تبقى اقوى من كده
تقى : انت ازاى عرفت ،صح طلب كده
حسن: كملى بس وبعدين
تقى: بعد الحاح شديد منه وبصراحه كمان انا كنت محتجاله اوى
وافقت اننا ...نتحوز عرفى
حسن: كويس ..كملى
تقى :ايه هو الى كويس
حسن: اناخوفت تتحول علاقتكم لشكل غير شرعى زى ماشوفت
تقى :انت شوفت ايه بالظبط ؟ انالحد دلوقتى معرفش انت يومها ضربتنى ليه
حسن: فيديو فمنتهى السفاله لحضرتك وواحد وكل مصر شافته ،عامل اعلى نسلة مشاهدة
والواضح انك مش عارفه انك بتتصورى
تقى : ايه (بخضه وعياط) يالهوى! عملها
حسبي الله ونعم الوكيل
مانا اديتله كل الى كان عايزه والله
حسن:(حضنها يطمنها) اهدى اهدى ياتقى
تقى : اهدى ازاى انا اتفضحت ،بتقول كل مصر شافته
منه لله
حسن: ،مع ان ليكى تزعلى بس متقلقيش هياخد وقته والناس هتنساه وانا هحاول اعرف بيتشال ازاى وامسحهولك
تقى :بعد ايه بعد م اتفضحت ....كل م اطلع من حفرة ادخل فغيرها
يارب يتفضح زى م فضحنى يارب
حسن: افهم منك انه ابتزك يعنى ؟
تقى :ايوة عرف منى ان بابا عنده فلوس كتير ومليونير
بقى يطلب فلوس وانا كنت بجيبهاله من غير م بابا يعرف
وبعدين طلب منى مبلغ كبير مقدرتش خوفت بابا يحس
لانه اكيد ظاهر انه مبلغ كبير
من حسابه
رفضت ،هددنى بانه مصورنى وهيفحنى بيه
كنت فاكره انه بيضحك عليا
قولتله يطلقنى طيب وانا قصاد كده هجيبله المبلغ ، هو وافق وطلقنى وقطعنا الورقه
انا كنت عاملة كل احتياطاتى انى مخلفش ولا احمل منه
اول م طلقنى فكرت انى اهرب اخترعت لبابا ان ماما اتصلت وقالت انها اتطلقت رجعت شقتنا المقفولة وهرجع اعيش معاها
اخدت اول طيارة وجيت
حسن: ومجبتيش ليه المبلغ طبعا
تقى :ايوة بس مكنتش متصوره انه حقير كده ، والمصيبة الاكبر اكتشافى بحملى هنا
مكنتش عارفه اعمل ايه
فكرت كتير اقولك
بس كنت خايفه رد فعلك والى حسبته لاقيته
حسن: طيب ودلوقت انا سمعتك وقدرتك
تقى :ربنا يخليك ليا ياحسن ،معرفش من غيرك كنت عملت ايه
حسن: انا مش عايزك تفكرى فحاجه ، ربنا نجاكى من الى كنتى واقعه فيه
والحمدلله
هنبتدى من جديد ومتخافيش مش هسيبك وهفضل وراكى لحد م بيدى اوصلك لابن الحلال
تقى :هات بوسه ياحسن
حسن: ههههه(باسها فدماغها زى م متعود)
دلوقتى نامى وارتاحى ومتفكريش غير انك تاكلى وتشربي تعوضى جسمك
وان شاء الله بكرة احسن
تصبحى ع خير
تقى :وانت من اهله يا حسن ...
♦♦♦♦♦♦♦♦♦♦♦♦♦♦♦♦♦♦♦♦♦♦
"سعد انت رجعت تانى للفكرة دى ليه "
سعد:كل م اتعلق بحاجه فحياتى بتروح، انا مش فاهم انا عايش ليه
الموت احسن لى
حسن: وهو انت الى هتقرر امتى تموت، ربنا وقت م يعوزك هياخدك
يابنى متفكرش بالسلبيه دى
عندك ام واب غيرك معندوش وبيتمنى يحس بوجودهم ان شاء الله يضربوه بالطوب
عندك اخوات بيخافو عليك وبيحبوك غير معندوش وبيعانى من وحدته
عندك خطيبتك الى مش عارف تحبها زى م بتحبك عشان بتبص تحت رجلك ولازم تحب واحدة تعذبك وتبهدلك وفالاخر تقولك سورى احنا مش لبعص
سعد: دكتور حسن، انت مش زيي
انا فاشل كل م احب الدنيا تدينى ضهرها
حسن: عارف ياسعد انت اكتر حد يائس قابلته فحياتى
لو تعرف انا عايش ازاى
نفسي فنص الى عندك
ومع ذلك عمرى م فكرت انتحر ، دايما مواجه الدنيا رغم كل الى بيحصل وبقولها وايه تانى
ثق دايما ان بعد الوحش بييجى الحلو ،وبعد الليل بيطلع فجر
الدنيا مش ع طول وحشه ومش ع طول حلوة
سعد: انا مش شايف غير الوحش بس
حسن: (بيكتب) جرعه الدوا دى هتزيد ، واقابلك الجلسة الجاية
سعد: اوك سلام يا دكتور
مشى سعد ودخلت سمر
سمر:شكلك مرهق يا دكتور
حسن: سعد اكتر حد بعد جلسته بحتاج جلسه اعادة للحياه،كتله من اليأس
حجزتى التذاكر
سمر :ايوة حضرتك ٤تذاكر لمسرح مصر
خلاص فاضل عالحفله يدوب كام ساعه
حسن: شكرا ياسمر تعبتك،فعلا الواحد عايز يغير جو شويه
سمر:هو مين ال ٤الجايين معاك يا دكتور
حسن: انتى حشريه ليه ؟
سمر :معلش عايزة اعرف عشان احسدهم واقول يابختهم
حسن: انا وحسن والدكتور حسن معايا
سمر: هههههههه
حسن: اقفلى وروحى يا حشرية ،سلام
روح حسن واشترى حجات كانت ف ٣اكياس
خبط ع باب جميلة
فتحت اختها
اختها:تعالى ياعمو حسن
دخل لقى جميله واخواتها قاعدين فالصاله وهى بتسمع القران وبتردد وراه من الى حفظته
جميلة: صدق الله العظيم ...ازيك يا حسن
حسن: معلش جيت ومش قايلك لكن انا بصراحه كانت حابب نغير جو
ف حجزت لينا فمسرح انهاردة
وجبتلكم هدوم تنفع للخروجه دى
اختها:(جريت عالاكياس)هيييييييه ،انت عمو حلو اوى ياعمو حسن
اخوها:مسرحيه ايه دى ياعمو حسن
حسن: مش عارف والله ،احنا هنروح ونتفرج، ايه ياجميله مش عايزة ؟
جميلة: لا ماشى مدام هتنبسطو هناك
حسن: (ابتسم) انا جبتلك فستان هيعجبك اوى
جميلة ،:(بهدوء)تفتكر هشوفه يعنى
حسن: اسف مش قصدى،بس حاسس انه هيبقى حلو عليكى وجبتلك طرحه مناسبه ليه مدام اتحجبتى
اختها:تعالى يا جميلة نلبس جوة واساعدك فاللبس يلا
اخوها:قولى زى م اتعلمتى من الاستاذ بتاعنا
اختها:عن اذنك ياعمو
حسن:(ابتسم) اتفضلو
دخلت جميله مع اختها تلبس وجوه بقى ..
اخت جميلة: قومى اقفى يا جميلةوانا هقف عالسرير عشان اطولك،ده فستان حلو اوى
جميلة: انا وقفتلك اهو
اختها: (بتحاول تغير هدومها وتلبسها الفستان اتلخبطت وقعت منها عالارض جميلة)
يالهوى ، استنى طيب اقومك
حاولت معرفتش راحت جريت برة
جميلة:انتى يابت روحتى فين ؟
برة... .
اختها:عمو حسن اا بلبس جميلة راحت وقعت تعالا قومها من عالارض لحسن انا مش عارفه
حسن: حاضر
دخل جرى ملهوف يقومها، كانت لاول مرة يشوفها
بالشكل ده
ولبسها مش كامل !!
اول م لمسها جسمها ارتعش
جميلة: ايه ده حسن !!!
حسن: قومى بس
قومها وقعدها عالسرير وهى بتشد اى حاجة تدارى نفسها منه ..، لكن حسن مكانش عارف ايه الشعور الى امتلكه ساعتها
مش قادر يقوم من قدامها
وبيراقب خجلها ووشها الاحمر وحياءها من جوزها برغم انها مش شايفاه
جميلة: ايه فيه حاجة
حسن: اول مرة اشوفك جميلة كده
جميلة استحت واحمرت خدودها اكتر وهى برضو بتحاول تتدارى منه ، حسن من غير شعور منه
كأن فيه حاجة مسيطرة عليه ميل باسها فشعرها
وبعدين باس جزء من ودنها وميل ع خدها
كانت هى بعدت ورا من الكسوف ، اخد باله !
ورجع لوعيه
حسن: مستنيكى برة (قام لباب الاوضه) جميلة
انا اسف
خرج ...لكن هى لمست مكان شفايفه ع خدها وابتسمت وباست ايدها ????????????
♦♦
هبة سامي علي
دينا سعيد عاصم
د. راقية جلال محمد الدويك
د. محمد عبد الوهاب المتولي بدر
محمد محمد جاد محسن
سهر محمد رمضان صيام
هند حمدي عبد الكريم السيد
محاسن علي عبد الرحيم أحمد (مقلد)
خالد عبد الرحيم خضير العامري
د. سمر ابراهيم ابراهيم السيد
د. نهله عبد الحكم احمد عبد الباقي 
زينب حمدي 
د. عبد الوهاب المتولي بدر 
ياسر محمود سلمي 
د. نهى فؤاد محمد رشاد 
د. شيماء أحمد عمارة 
م. اشرف عبد الصبور الكرم 
حنان صلاح الدين محمد أبو العنين