مرة بنتي الحلوة ديا 

جات وجايبة ف إيدها حاجة 

مخبياها عن عنيا.. 

آل.. هدية 

وردة بيضا ووردة حمرا 

بلون شفايف مستحية 

رتبتهم بابتسامة ف مزهرية  

جات وسألت.. 

ماما انت قلب طيب 

عاش حياته بحب صافي 

قلب خالي من الآسية 

بس ليه ف عنيكي دايما 

حزن باين... 

حزن ساكن كل حاجة بتعمليها

بتقوليها... 

قلت... يمكن حزني عشش

والهنا في القلب ابدا يوم ما خشش

 لما ماتت السعادة جوا قلبي 

سكتت الحلوة لثواني 

بعدها سألتني تاني

السعادة!... هي إيه؟

 اتناهدت وقلت يااااااااه

السعادة دي الحياااة

السعادة تبقى بسمة 

فوق شفايف مشتاقين 

حضن دافي وضحكة صافية

تشرح القلب الحزين

لقمة حلوة مع الحبايب

لو هغيب بيكون لي نايب

وللا شاي في المغربية

ويا حد يخاف عليا

السعادة كلمة بيها القلب يهدا

قٌبلة ناعمة فوق خدود تشتاق مودة 

السعادة... 

هي قلبك... ويا قلبي 

ومزهرية... فيها وردة