شوية دردشة
لصديقاتى السيدات الفضليات اللى على صفحتى
فى ظل ظروف الغلاء التى تمر بها البلاد بل والعالم أجمع حابة انقل لكم بعض تجاربى وما عدت إليه بعد سنوات من التراخى فى تنفيذه ... شوفى ياستى .. بعد ماتفطرى انزلى الصبح اعملى الرياضة بتاعتك ايا كانت مشى .. شوية تمارين فى الجيم .. وارجعى بيتك ادخلى مطبخك وعودى لصناعة كل شئ بتحبيه سواء لكى أو لأولادك وبتشتريه جاهز بأسعار خيالية .. يعنى هقولك انا عملت ايه الفترة السابقة ... انا مدمنة بسطرمة دى أساسية عندى فى البيت رجعت اعملها بأيدى من تانى واجمل وانظف مليون مرة من البسطرمة الجاهزة دون ذكر اسماء المصانع المنتجة لها ... عملت كمان لانشون فراخ ولانشون رومى تحفة . عملت كمان الطحينة وطلعت روووووعة .. جميع أصناف المربات لفاكهة الموسم ... المخللات بأنواعها ... وشوية حاجات تانية من حلويات ومخبوزات ... وطبعا الحاجات دى عملتها لثلاث بيوت انا واولادى ونزلت بنفسى ودتها لهم لا تتخيلوا فرحتهم بيها ...
تانى حاجة رجعت لها كانت التفصيل ... فصلت لنفسى كام فستان وبنطلون قصيتهم وسرجتهم وخليت الخياط بتاعى يادوب يخيط على الماكينة ويشطب ... التكلفة أقل جدا وعملت موديلات بذوقى ...
ممكن كمان نتعلم الحاجات البسيطة فى البيت زى تصليح حنفية ... حاجة فى الكهرباء ... فى النجارة ... دهان باب أو أى شئ محتاج دهان .... اتعلمى ازاى تحلقى شعر زوجك وأولادك صدقينى مش عيب انزلى اشترى عدة حلاقة كاملة واتعلمى ... انا كنت بحلق لزوجى الله يرحمه ولابنى شعرهم وكان احلى من اشيك حلاق ... كلها أمور هتيجى بالممارسة والتعلم ... النهاردة علشان تدخلى عامل عندك البيت الاسعار بقت رهيبة وعلشان يصلح حاجة يبوظ عشرة قدامها وبيقيم أجرته على حسب مستوى البيت اللى داخله بيرفع أسعاره فى السما ... حاولى ... وجربى هتستفيدى كتير وتوفرى واللى هتعمليه فى اى مجال صدقينى انظف واجمل .. لغاية بس ما نعدى المرحلة الصعبة دى ❤️