وصلنا - لفين
سايبني لوحدي ف الدنيا
ألِف وأدور ورا خطاويك
وناسي إني بشر من طين
هتغرس فيا .. هلطَّخ فيك
دا طول الوقت بنهاتي
بتوجعني وأنا برازيك
لا صنت هوايا والعِشرة
ولا أنا قادرة خلاص أراضيك
وتاهت بينا خطاوينا
لا بتسبق... ولا هعديك
شربنا المر لكيعانا
ولسه عطاشى للتلاكيك؟!!!!!
طريق مسدود ملوش آخر
لا بسمعلك ولا هناديك
تعالى قولي :
#وصلنا_لفين
وصلنا لفين ف رحلتنا
وإيه باقي.. وإيه ناقص
وليه هدادي ..وليه هطبطب
وأقول ممكن.. وأقول جايز
معدش فيه خُلق ولا طاقة
ولا لذِكرانا مشتاقة
ومت معاك .. لكن عايشة
بلاها مناهدة ومناكفة
خلاص فرهدنا وبعدنا
وحتى عتابنا.. بقى ماسخ
وكتر الشكوى ..بقى مش شِيك
أنا ودموعي مع صبري
رفعنا الراية لسيادتك
وبنسلِّم .. وبنقولك
تمام جدااااا
ومية بوسة
وسلاااام معاليك