من الأفكار اللى عمرى ما إقتنعت بيها هى فكرة إن كل واحد فينا ليه فى الدنيا 24 قيراط وكلنا زى بعض بس مختلفين فى التقسيمة يعنى ناس وخداهم شوية صحة وشوية فلوس وشوية راحة بال وناس تانية وخداهم شوية أطفال و شوية نجاح و شوية جمال.... الخ
المهم الفكرة دى عمرها ما دخلت عقلى لأن الواقع مبيقولش كده لأن بالفعل لو بصينا حوالينا هنلاقى تقسيم الأرزاق مش كده يعنى فيه ناس معاها فلوس وعندها أطفال و فى مراكز مرموقة وصحتهم كويسة ومشاكلهم عادية و فى المقابل تلاقى ناس مش لاقية تاكل و لا تأكل اولادها و يعانون صحيا .. ومتقوليش يملكوا راحة البال والسعادة لأن اولا مفيش راحة بال أبدا وانت مش معاك تكاليف علاج إبنك أو مصاريف بيتك ..ثانيا مين اللى قالك ان الغنى لا يملك راحة البال والسعادة
لو فكرنا هنلاقى عادى فيه فقير محروم من الاطفال وغنى محروم من الصحة وفقير محروم من راحة البال وغنى محروم من السعادة وفقير يملك الستر وغنى يملك حب الناس..فنلاقى ناس تملك 18 قيراط وناس 5 وناس 14 وناس 12
جبنا منين بقى فكرة ال24 قيراط دى.. أعتقد الفكرة دى إخترعها بعض المشايخ لتحقيق توازن نفسى عند الناس.. وبصفة خاصة الشيخ الشعراوى هو صاحب تلك المقولة الخاطئة .. وكلهم ساروا على هداه
طيب يبقى هنا فيه سؤال يطرح نفسه أين العدل؟
العدل المطلق هو الله يعنى مستحيل يظلم عبد من عباده لكن مين أصلا قال إن الدنيا دار العدل مين قال إن الفرص متكافئة والأرزاق متكافئة و النعم متكافئة والإبتلاءات متكافئة
أعتقد إن عدل ال24 قيراط هيكون دنيا و آخرة لكل إنسان ... وده الأقرب للمنطق واللى اقدر اقتنع به .